ਪੈਰਿਸ ’ਚ ਪੰਜਵੀਂ ਵਾਰ ਚੌਥੇ ਸਥਾਨ ’ਤੇ ਰਹਿ ਕੇ ਤਮਗਾ ਜਿੱਤਣ ਤੋਂ ਖੁੰਝਿਆ ਭਾਰਤ
ਪੈਰਿਸ: ਬੈਡਮਿੰਟਨ ਖਿਡਾਰੀ ਲਕਸ਼ਯ ਸੇਨ ਲਗਾਤਾਰ ਦੂਜੇ ਦਿਨ ਲੀਡ ਹਾਸਲ ਕਰਨ ਤੋਂ ਬਾਅਦ ਮੈਚ ਹਾਰ ਗਏ ਜਦਕਿ ਨਿਸ਼ਾਨੇਬਾਜ਼ ਮਹੇਸ਼ਵਰੀ ਚੌਹਾਨ ਅਤੇ ਅਨੰਤਜੀਤ ਸਿੰਘ ਨਰੂਕਾ ਦੀ ਸਕੀਟ ਮਿਕਸਡ ਟੀਮ ਵੀ ਕਾਂਸੀ ਤਮਗਾ ਮੁਕਾਬਲੇ ’ਚ ਹਾਰ ਗਏ, ਜਿਸ ਨਾਲ ਭਾਰਤ ਪੈਰਿਸ ਓਲੰਪਿਕ ਖੇਡਾਂ ’ਚ ਕੋਈ ਤਗਮਾ ਨਹੀਂ ਜਿੱਤ ਸਕਿਆ। ਮਹਿਲਾ ਟੇਬਲ ਟੈਨਿਸ ਟੀਮ ਨੇ ਕੁਆਰਟਰ ਫਾਈਨਲ ’ਚ ਜਗ੍ਹਾ ਬਣਾ ਕੇ ਜਸ਼ਨ ਮਨਾਉਣ ਦਾ ਮੌਕਾ ਦਿਤਾ।
ਲਕਸ਼ਯ ਪਹਿਲਾ ਗੇਮ ਜਿੱਤਣ ਅਤੇ ਦੂਜੇ ’ਚ ਲੀਡ ਹਾਸਲ ਕਰਨ ਦੇ ਬਾਵਜੂਦ ਕਾਂਸੀ ਤਮਗੇ ਦੇ ਪਲੇ ਆਫ਼ ’ਚ ਮਲੇਸ਼ੀਆ ਦੇ ਲੀ ਜੀ ਜਿਆ ਵਿਰੁਧ ਤਿੰਨ ਗੇਮਾਂ ਹਾਰ ਕੇ ਪੁਰਸ਼ ਸਿੰਗਲਜ਼ ਮੁਕਾਬਲੇ ’ਚ ਤਮਗਾ ਜਿੱਤਣ ਵਾਲੇ ਪਹਿਲੇ ਭਾਰਤੀ ਬਣਨ ਤੋਂ ਖੁੰਝ ਗਏ। ਸੈਮੀਫਾਈਨਲ ਵਾਂਗ ਕਾਂਸੀ ਤਮਗਾ ਪਲੇਅ ਆਫ ’ਚ ਵੀ ਦੁਨੀਆਂ ਦੇ 22ਵੇਂ ਨੰਬਰ ਦੇ ਖਿਡਾਰੀ ਲਕਸ਼ਯ ਨੂੰ 71 ਮਿੰਟ ਤਕ ਚੱਲੇ ਮੈਚ ’ਚ ਦੁਨੀਆਂ ਦੇ ਸੱਤਵੇਂ ਨੰਬਰ ਦੇ ਖਿਡਾਰੀ ਲੀ ਤੋਂ 21-13, 16-21, 11-21 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ।
ਲਕਸ਼ਯ ਨੇ ਲੀ ਵਿਰੁਧ ਪਹਿਲਾ ਗੇਮ ਜਿੱਤਣ ਤੋਂ ਬਾਅਦ ਦੂਜੇ ਗੇਮ ’ਚ 8-3 ਦੀ ਲੀਡ ਬਣਾ ਲਈ ਸੀ ਪਰ ਇਸ ਤੋਂ ਬਾਅਦ ਉਸ ਨੇ ਲਗਾਤਾਰ 9 ਅੰਕ ਗੁਆ ਕੇ ਮਲੇਸ਼ੀਆ ਦੇ ਖਿਡਾਰੀ ਨੂੰ ਵਾਪਸੀ ਦਾ ਮੌਕਾ ਦਿਤਾ, ਜਿਸ ਨੇ ਪਿੱਛੇ ਮੁੜ ਕੇ ਨਹੀਂ ਵੇਖਿਆ।ਰਾਸ਼ਟਰਮੰਡਲ ਖੇਡਾਂ ਦੇ ਸੋਨ ਤਮਗਾ ਜੇਤੂ ਲਕਸ਼ਯ ਦੀ ਲੀ ਵਿਰੁਧ ਛੇ ਮੈਚਾਂ ਵਿਚ ਇਹ ਦੂਜੀ ਹਾਰ ਸੀ।
ਇਸ ਹਾਰ ਨਾਲ ਲਕਸ਼ਯ ਸਾਇਨਾ ਨੇਹਵਾਲ (ਲੰਡਨ ਓਲੰਪਿਕ 2012 ਵਿਚ ਕਾਂਸੀ) ਅਤੇ ਪੀ.ਵੀ. ਸਿੰਧੂ (ਰੀਓ ਓਲੰਪਿਕ 2016 ਵਿਚ ਚਾਂਦੀ ਅਤੇ ਟੋਕੀਓ ਓਲੰਪਿਕ 2020 ਵਿਚ ਕਾਂਸੀ) ਤੋਂ ਬਾਅਦ ਓਲੰਪਿਕ ਤਮਗਾ ਜਿੱਤਣ ਵਾਲਾ ਤੀਜਾ ਭਾਰਤੀ ਬੈਡਮਿੰਟਨ ਖਿਡਾਰੀ ਬਣਨ ਤੋਂ ਵੀ ਖੁੰਝ ਗਏ।
ਮਹੇਸ਼ਵਰੀ ਅਤੇ ਨਰੂਕਾ ਵੀ ਕਾਂਸੀ ਦੇ ਤਗਮੇ ਦੇ ਮੈਚ ’ਚ ਹਾਰ ਗਏ: ਮਹੇਸ਼ਵਰੀ ਅਤੇ ਨਾਰੂਕਾ ਸਕੀਟ ਮਿਕਸਡ ਟੀਮ ਮੁਕਾਬਲੇ ਦੇ ਕਾਂਸੀ ਤਮਗਾ ਮੁਕਾਬਲੇ ਵਿਚ ਚੀਨ ਦੀ ਯਿਟਿੰਗ ਜਿਆਂਗ ਅਤੇ ਲਿਯੂ ਜਿਆਨਲਿਨ ਤੋਂ ਇਕ ਅੰਕ ਨਾਲ ਹਾਰ ਗਏ।
ਭਾਰਤੀ ਜੋੜੀ ਨੂੰ 48 ਨਿਸ਼ਾਨਿਆਂ ਦੇ ਫਾਈਨਲ ਮੈਚ ’ਚ 43-44 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਮਹੇਸ਼ਵਰੀ ਅਪਣੇ 24 ਨਿਸ਼ਾਨਿਆਂ ’ਚੋਂ ਤਿੰਨ ਤੋਂ ਖੁੰਝ ਗਈ ਜਦਕਿ ਨਾਰੂਕਾ ਦੋ ਨਿਸ਼ਾਨਿਆਂ ਤੋਂ ਖੁੰਝ ਗਏ। ਚੀਨ ਦੇ ਯਾਟਿੰਗ ਚਾਰ ਨਿਸ਼ਾਨੇ ਤੋਂ ਖੁੰਝ ਗਏ ਪਰ ਉਨ੍ਹਾਂ ਦੇ ਪੁਰਸ਼ ਖਿਡਾਰੀ ਜਿਆਨਲਿਨ ਨੇ ਅਪਣੇ ਸਾਰੇ ਨਿਸ਼ਾਨੇ ਸਹੀ ਤਰੀਕੇ ਨਾਲ ਮਾਰ ਕੇ ਇਸ ਦੀ ਪੂਰਤੀ ਕੀਤੀ।
ਇਸ ਤੋਂ ਪਹਿਲਾਂ ਭਾਰਤੀ ਜੋੜੀ ਨੇ 146 ਦੇ ਸਕੋਰ ਨਾਲ ਕਾਂਸੀ ਤਮਗਾ ਮੁਕਾਬਲੇ ਲਈ ਕੁਆਲੀਫਾਈ ਕੀਤਾ ਸੀ। ਕੁਆਲੀਫਿਕੇਸ਼ਨ ਦੇ ਪਹਿਲੇ ਪੜਾਅ ਤੋਂ ਬਾਅਦ ਭਾਰਤੀ ਟੀਮ 49 ਅੰਕਾਂ ਨਾਲ ਦੂਜੇ ਸਥਾਨ ’ਤੇ ਸੀ। ਪਹਿਲੇ ਗੇੜ ’ਚ ਨਾਰੂਕਾ ਨੇ 25 ’ਚੋਂ 25 ਅਤੇ ਮਹੇਸ਼ਵਰੀ ਨੇ 24 ਅੰਕ ਹਾਸਲ ਕੀਤੇ। ਦੂਜੇ ਗੇੜ ’ਚ ਮਹੇਸ਼ਵਰੀ ਨੇ 25 ਅੰਕ ਹਾਸਲ ਕੀਤੇ ਪਰ ਨਾਰੂਕਾ ਦੂਜੀ ਅਤੇ ਪੰਜਵੀਂ ਸੀਰੀਜ਼ ’ਚ 23 ਅੰਕ ਹਾਸਲ ਕਰਨ ਤੋਂ ਖੁੰਝ ਗਈ। ਤੀਜੇ ਗੇੜ ’ਚ ਮਹੇਸ਼ਵਰੀ ਨੇ 25 ਅਤੇ ਨਾਰੂਕਾ ਨੇ 24 ਅੰਕ ਹਾਸਲ ਕੀਤੇ।
ਲਕਸ਼ਯ ਅਤੇ ਮਹੇਸ਼ਵਰੀ ਅਤੇ ਨਾਰੂਕਾ ਮੌਜੂਦਾ ਖੇਡਾਂ ’ਚ ਨਿਸ਼ਾਨੇਬਾਜ਼ ਮਨੂ ਭਾਕਰ, ਅਰਜੁਨ ਬਬੂਤਾ ਅਤੇ ਤੀਰਅੰਦਾਜ਼ ਧੀਰਜ ਬੋਮਦੇਵਰ ਅਤੇ ਅੰਕਿਤਾ ਭਕਤ ਦੀ ਮਿਕਸਡ ਜੋੜੀ ਦੇ ਨਾਲ ਸ਼ਾਮਲ ਹੋ ਗਏ ਜੋ ਚੌਥੇ ਸਥਾਨ ’ਤੇ ਰਹਿਣ ਤੋਂ ਬਾਅਦ ਤਮਗਾ ਜਿੱਤਣ ਤੋਂ ਖੁੰਝ ਗਏ।
ਭਾਰਤੀ ਮਹਿਲਾ ਟੇਬਲ ਟੈਨਿਸ ਟੀਮ ਨੇ ਰੋਮਾਨੀਆ ਨੂੰ 3-2 ਨਾਲ ਹਰਾ ਕੇ ਕੁਆਰਟਰ ਫਾਈਨਲ ’ਚ ਜਗ੍ਹਾ ਬਣਾਈ : ਸਟਾਰ ਖਿਡਾਰੀ ਮਨਿਕਾ ਬੱਤਰਾ ਦੀ ਅਗਵਾਈ ’ਚ ਭਾਰਤ ਨੇ ਉੱਚ ਰੈਂਕਿੰਗ ਵਾਲੀ ਰੋਮਾਨੀਆ ਨੂੰ ਰੋਮਾਂਚਕ ਮੈਚ ’ਚ 3-2 ਨਾਲ ਹਰਾ ਕੇ ਮਹਿਲਾ ਟੇਬਲ ਟੈਨਿਸ ਟੀਮ ਮੁਕਾਬਲੇ ਦੇ ਕੁਆਰਟਰ ਫਾਈਨਲ ’ਚ ਪ੍ਰਵੇਸ਼ ਕੀਤਾ। ਭਾਰਤ 2-0 ਨਾਲ ਅੱਗੇ ਸੀ ਪਰ ਰੋਮਾਨੀਆ ਨੇ ਵਾਪਸੀ ਕੀਤੀ ਅਤੇ 2-2 ਨਾਲ ਬਰਾਬਰੀ ਕਰ ਲਈ ਪਰ ਨਿਰਣਾਇਕ ਮੈਚ ਵਿਚ ਮਨਿਕਾ ਨੇ ਮੈਚ ਜਿੱਤ ਕੇ ਟੀਮ ਨੂੰ ਆਖਰੀ ਅੱਠ ਵਿਚ ਪਹੁੰਚਾਇਆ।
ਸ਼੍ਰੀਜਾ ਅਕੁਲਾ ਅਤੇ ਅਰਚਨਾ ਕਾਮਥ ਨੇ ਡਬਲਜ਼ ਮੈਚ ਦੀ ਸ਼ੁਰੂਆਤ ਐਡੀਨਾ ਡਾਈਕੋਨੂ ਅਤੇ ਐਲਿਜ਼ਾਬੈਥ ਸਮਾਰਾ ਨੂੰ 11-9, 12-10, 11-7 ਨਾਲ ਹਰਾ ਕੇ ਕੀਤੀ ਜਦਕਿ ਮਨਿਕਾ ਨੇ ਬਿਹਤਰ ਰੈਂਕਿੰਗ ਵਾਲੇ ਬਰਨਾਡੇਟ ਜ਼ੋਕਸ ਨੂੰ 11-5, 11-7, 11-7 ਨਾਲ ਹਰਾ ਕੇ 11ਵੀਂ ਦਰਜਾ ਪ੍ਰਾਪਤ ਭਾਰਤ ਨੂੰ ਚੌਥੀ ਦਰਜਾ ਪ੍ਰਾਪਤ ਵਿਰੋਧੀ ਟੀਮ ਵਿਰੁਧ 2-0 ਦੀ ਲੀਡ ਦਿਵਾਈ।
ਦੂਜੇ ਸਿੰਗਲਜ਼ ’ਚ ਸ਼੍ਰੀਜਾ ਨੂੰ ਯੂਰਪੀਅਨ ਚੈਂਪੀਅਨ ਸਮਾਰਾ ਤੋਂ 2-3 (11-8, 4-11, 11-7, 6-11, 8-11) ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਸ਼੍ਰੀਜਾ ਦੀ ਹਾਰ ਤੋਂ ਬਾਅਦ ਅਰਚਨਾ ਅਤੇ ਬਰਨਾਡੇਟ ਵਿਚਾਲੇ ਮੁਕਾਬਲਾ ਹੋਇਆ। ਬਰਨਾਡੇਟ ਨੇ ਪਹਿਲਾ ਗੇਮ 11-5 ਨਾਲ ਜਿੱਤਿਆ ਪਰ ਭਾਰਤੀ ਖਿਡਾਰੀ ਨੇ ਦੂਜਾ ਗੇਮ 11-8 ਨਾਲ ਜਿੱਤ ਕੇ ਮੈਚ ਬਰਾਬਰ ਕਰ ਦਿਤਾ। ਬਰਨਾਡੇਟ ਨੇ ਅਗਲੇ ਦੋ ਗੇਮ 11-7, 11-9 ਨਾਲ ਜਿੱਤ ਕੇ ਮੈਚ ਜਿੱਤ ਲਿਆ ਅਤੇ ਮੈਚ 2-2 ਨਾਲ ਬਰਾਬਰ ਕਰ ਦਿਤਾ। ਮਨਿਕਾ ਨੇ ਇਸ ਤੋਂ ਬਾਅਦ ਐਡੀਨਾ ਨੂੰ 3-0 (11-5, 11-9, 11-9) ਨਾਲ ਹਰਾ ਕੇ ਭਾਰਤ ਨੂੰ ਆਖਰੀ ਅੱਠ ਵਿਚ ਜਗ੍ਹਾ ਦਿਵਾਈ।
ਕਿਰਨ 400 ਮੀਟਰ ਹੀਟ ’ਚ ਸੱਤਵੇਂ ਸਥਾਨ ’ਤੇ ਰਹੀ, ਰੈਪੇਚੇਜ ’ਚ ਹਿੱਸਾ ਲਵੇਗੀ: ਕਿਰਨ ਪਹਿਲ ਅਪਣੀ ਹੀਟ ਰੇਸ ’ਚ ਸੱਤਵੇਂ ਸਥਾਨ ’ਤੇ ਰਹਿਣ ਤੋਂ ਬਾਅਦ ਔਰਤਾਂ ਦੀ 400 ਮੀਟਰ ’ਚ ਆਟੋਮੈਟਿਕ ਸੈਮੀਫਾਈਨਲ ’ਚ ਜਗ੍ਹਾ ਬਣਾਉਣ ’ਚ ਅਸਫਲ ਰਹੀ। ਹੁਣ ਉਹ ਰੈਪੇਚੇਜ ਰਾਊਂਡ ’ਚ ਦੌੜੇਗੀ। ਅਪਣਾ 24ਵਾਂ ਜਨਮਦਿਨ ਮਨਾ ਰਹੀ ਕਿਰਨ ਨੇ 52.51 ਸੈਕਿੰਡ ਦਾ ਸਮਾਂ ਕਢਿਆ, ਜੋ ਉਸ ਦੇ ਸੀਜ਼ਨ ਦੇ 50.92 ਸੈਕਿੰਡ ਦੇ ਨਿੱਜੀ ਬਿਹਤਰੀਨ ਸਮੇਂ ਤੋਂ ਵੀ ਖਰਾਬ ਹੈ।
ਛੇ ਹੀਟਾਂ ਵਿਚੋਂ ਹਰੇਕ ਵਿਚ ਚੋਟੀ ਦੀਆਂ ਤਿੰਨ ਟੀਮਾਂ ਨੇ ਸੈਮੀਫਾਈਨਲ ਵਿਚ ਜਗ੍ਹਾ ਬਣਾਈ, ਜਦਕਿ ਡੀਐਨਐਸ (ਜਿਨ੍ਹਾਂ ਨੇ ਦੌੜ ਸ਼ੁਰੂ ਨਹੀਂ ਕੀਤੀ), ਡੀਐਨਐਫ (ਜਿਨ੍ਹਾਂ ਨੇ ਦੌੜ ਪੂਰੀ ਨਹੀਂ ਕੀਤੀ) ਅਤੇ ਡੀਕਿਊ (ਅਯੋਗ) ਨੂੰ ਛੱਡ ਕੇ ਬਾਕੀ ਸਾਰੇ ਮੰਗਲਵਾਰ ਨੂੰ ਰੈਪੇਚੇਜ ਰਾਊਂਡ ਵਿਚ ਹਿੱਸਾ ਲੈਣਗੇ।
ਮਹਿਲਾ ਕੁਸ਼ਤੀ ’ਚ, ਨਿਸ਼ਾ ਕੁਆਰਟਰ ਫਾਈਨਲ ’ਚ ਹਾਰ ਗਈ: ਭਾਰਤੀ ਭਲਵਾਨ ਨਿਸ਼ਾ ਨੂੰ ਮਹਿਲਾਵਾਂ ਦੇ 68 ਕਿਲੋਗ੍ਰਾਮ ਕੁਸ਼ਤੀ ਮੁਕਾਬਲੇ ਦੇ ਕੁਆਰਟਰ ਫਾਈਨਲ ’ਚ ਉੱਤਰੀ ਕੋਰੀਆ ਦੀ ਪਾਕ ਸੋਲ ਗਮ ਤੋਂ 8-10 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਨਿਸ਼ਾ 8-2 ਨਾਲ ਅੱਗੇ ਸੀ ਪਰ ਇਸ ਤੋਂ ਬਾਅਦ ਉਸ ਦੇ ਸੱਜੇ ਹੱਥ ’ਚ ਸੱਟ ਲੱਗ ਗਈ ਅਤੇ ਇਸ ਦਾ ਫਾਇਦਾ ਉਠਾਉਂਦੇ ਹੋਏ ਉੱਤਰੀ ਕੋਰੀਆ ਦੀ ਖਿਡਾਰੀ ਅੱਠ ਹੋਰ ਅੰਕ ਹਾਸਲ ਕਰ ਕੇ ਜਿੱਤ ਹਾਸਲ ਕਰਨ ’ਚ ਸਫਲ ਰਹੀ। ਨਿਸ਼ਾ ਨੇ ਅਪਣੇ ਆਖਰੀ 16 ਮੈਚ ਦੀ ਸ਼ੁਰੂਆਤ ਯੂਕਰੇਨ ਦੀ ਟੇਟੀਆਨਾ ਸੋਵਾ ਨੂੰ 6-4 ਨਾਲ ਹਰਾ ਕੇ ਕੀਤੀ। ਨਿਸ਼ਾ ਸ਼ੁਰੂਆਤ ’ਚ ਟੇਟੀਆਨਾ ਤੋਂ ਪਿੱਛੇ ਸੀ ਪਰ 4-4 ਨਾਲ ਬਰਾਬਰੀ ਕਰਨ ਤੋਂ ਬਾਅਦ ਉਸ ਨੇ ਆਖਰੀ ਕੁੱਝ ਸਕਿੰਟਾਂ ’ਚ ਟੇਟੀਆਨਾ ਨੂੰ ਮੈਟ ਤੋਂ ਬਾਹਰ ਕੱਢ ਕੇ ਦੋ ਅੰਕ ਹਾਸਲ ਕਰ ਕੇ ਜਿੱਤ ਹਾਸਲ ਕੀਤੀ। ਨਿਸ਼ਾ ਨੂੰ ਹੁਣ ਇਹ ਵੇਖਣ ਲਈ ਇੰਤਜ਼ਾਰ ਕਰਨਾ ਪਵੇਗਾ ਕਿ ਕੀ ਉਸ ਨੂੰ ਰੈਪੇਚੇਜ ਰਾਹੀਂ ਕਾਂਸੀ ਦੇ ਤਗਮੇ ਲਈ ਮੁਕਾਬਲਾ ਕਰਨ ਦਾ ਮੌਕਾ ਮਿਲਦਾ ਹੈ। ਜੇਕਰ ਪਾਕ ਸੋਲ ਗੇਮਜ਼ ਫਾਈਨਲ ’ਚ ਪਹੁੰਚਦੀ ਹੈ ਤਾਂ ਨਿਸ਼ਾ ਰੈਪੇਚੇਜ ਰਾਊਂਡ ’ਚ ਜਾਵੇਗੀ।
ਪੈਰਿਸ ’ਚ ਪੰਜਵੀਂ ਵਾਰ ਚੌਥੇ ਸਥਾਨ ’ਤੇ ਰਹਿ ਕੇ ਤਮਗਾ ਜਿੱਤਣ ਤੋਂ ਖੁੰਝਿਆ ਭਾਰਤ
ਭਾਰਤੀ ਟੀਮ ਦਾ ਪੈਰਿਸ ਓਲੰਪਿਕ ’ਚ ਚੌਥਾ ਸਥਾਨ ਹਾਸਲ ਕਰਨਾ ਅਜੇ ਖਤਮ ਨਹੀਂ ਹੋਇਆ ਹੈ ਕਿਉਂਕਿ ਬੈਡਮਿੰਟਨ ’ਚ ਲਕਸ਼ਯ ਸੇਨ ਅਤੇ ਨਿਸ਼ਾਨੇਬਾਜ਼ੀ ’ਚ ਮਿਕਸਡ ਸਕੀਟ ਟੀਮ ਕਾਂਸੀ ਦੇ ਤਗਮੇ ਜਿੱਤਣ ਤੋਂ ਖੁੰਝ ਗਈ।
ਭਾਰਤ ਨੇ ਹੁਣ ਤਕ ਤਿੰਨ ਕਾਂਸੀ ਦੇ ਤਮਗੇ ਜਿੱਤੇ ਹਨ। ਮਨੂ ਭਾਕਰ ਨੇ ਸਰਬਜੋਤ ਸਿੰਘ ਨਾਲ ਮਿਲ ਕੇ ਮਹਿਲਾਵਾਂ ਦੀ 10 ਮੀਟਰ ਏਅਰ ਪਿਸਟਲ ਅਤੇ 10 ਮੀਟਰ ਮਿਕਸਡ ਟੀਮ ਪਿਸਟਲ ’ਚ ਕਾਂਸੀ ਦਾ ਤਗਮਾ ਜਿੱਤਿਆ ਹੈ। ਇਸ ਤੋਂ ਇਲਾਵਾ ਸਵਪਨਿਲ ਕੁਸਲੇ ਨੇ 50 ਮੀਟਰ ਰਾਈਫਲ 3 ਪੋਜ਼ੀਸ਼ਨ ’ਚ ਕਾਂਸੀ ਦਾ ਤਗਮਾ ਜਿੱਤਿਆ ਸੀ।
ਇਨ੍ਹਾਂ ਤੋਂ ਇਲਾਵਾ ਮਨੂ ਭਾਕਰ 25 ਮੀਟਰ ਪਿਸਤੌਲ ’ਚ ਚੌਥੇ ਸਥਾਨ ’ਤੇ ਰਹੀ ਹੈ। ਤੀਰਅੰਦਾਜ਼ੀ ’ਚ ਧੀਰਜ ਬੋਮਦੇਵਰਾ ਅਤੇ ਅੰਕਿਤਾ ਭਕਤ ਦੀ ਜੋੜੀ ਮਿਕਸਡ ਟੀਮ ਮੁਕਾਬਲੇ ’ਚ ਕਾਂਸੀ ਤਮਗਾ ਮੁਕਾਬਲੇ ’ਚ ਅਮਰੀਕੀ ਜੋੜੀ ਤੋਂ ਹਾਰ ਗਈ।
ਅਰਜੁਨ ਬਬੂਤਾ ਪੁਰਸ਼ਾਂ ਦੀ 10 ਮੀਟਰ ਏਅਰ ਰਾਈਫਲ ਮੁਕਾਬਲੇ ’ਚ ਚੌਥੇ ਸਥਾਨ ’ਤੇ ਰਿਹਾ ਸੀ। ਲਕਸ਼ਯ ਬੈਡਮਿੰਟਨ ਪੁਰਸ਼ ਸਿੰਗਲਜ਼ ਮੈਚ ’ਚ ਲੀ ਜੀਆ ਤੋਂ ਹਾਰਨ ਤੋਂ ਬਾਅਦ ਕਾਂਸੀ ਦਾ ਤਗਮਾ ਜਿੱਤਣ ਤੋਂ ਖੁੰਝ ਗਏ ਨਿਸ਼ਾਨੇਬਾਜ਼ ਮਹੇਸ਼ਵਰੀ ਚੌਹਾਨ ਅਤੇ ਅਨੰਤਜੀਤ ਸਿੰਘ ਨਾਰੂਕਾ ਨੂੰ ਸਕੀਟ ਮਿਕਸਡ ਟੀਮ ਮੁਕਾਬਲੇ ਦੇ ਕਾਂਸੀ ਤਮਗਾ ਮੁਕਾਬਲੇ ਵਿਚ ਚੀਨ ਦੀ ਯਿਟਿੰਗ ਜਿਆਂਗ ਅਤੇ ਲਿਯੂ ਜਿਆਨਲਿਨ ਤੋਂ 44--43 ਨਾਲ ਹਾਰ ਦਾ ਸਾਹਮਣਾ ਕੀਤਾ ਗਿਆ।
