ਦਖਣੀ ਅਫਰੀਕਾ ਹੁਣ ਤਕ ਦੇ ਸੱਭ ਤੋਂ ਘੱਟ ਟੀ-20 ਸਕੋਰ ਉਤੇ ਆਊਟ
ਕਟਕ : ਹਾਰਦਿਕ ਪਾਂਡਿਆ ਵਲੋਂ ਤਾਬੜਤੋੜ ਅਜੇਤੂ ਅਰਧ ਸੈਂਕੜੇ ਅਤੇ ਫਿਰ ਇਕ ਅਹਿਮ ਵਿਕਟ ਹਾਸਲ ਕਰ ਕੇ ਭਾਰਤੀ ਕ੍ਰਿਕਟ ਟੀਮ ਵਿਚ ਕੀਤੀ ਯਾਦਗਾਰੀ ਵਾਪਸੀ ਬਦੌਲਤ ਭਾਰਤ ਨੇ ਮੰਗਲਵਾਰ ਨੂੰ ਇੱਥੇ ਪੰਜ ਮੈਚਾਂ ਦੀ ਲੜੀ ਦੇ ਪਹਿਲੇ ਮੈਚ ਵਿਚ ਦਖਣੀ ਅਫਰੀਕਾ ਉਤੇ 101 ਦੌੜਾਂ ਨਾਲ ਜਿੱਤ ਦਰਜ ਕੀਤੀ।
ਇਸ ਜਿੱਤ ਨੇ ਭਾਰਤ ਨੂੰ ਲੜੀ ਵਿਚ ਆਸਾਨੀ ਨਾਲ 1-0 ਦੀ ਲੀਡ ਹਾਸਲ ਕਰਨ ਵਿਚ ਮਦਦ ਕੀਤੀ ਅਤੇ ਇਸ ਨੇ ਦਖਣੀ ਅਫਰੀਕਾ ਨੂੰ ਹੁਣ ਤਕ ਦੇ ਸੱਭ ਤੋਂ ਘੱਟ ਟੀ-20 ਸਕੋਰ ਉਤੇ ਆਊਟ ਹੋਣ ਲਈ ਮਜਬੂਰ ਕੀਤਾ। ਉਨ੍ਹਾਂ ਦਾ ਪਿਛਲਾ ਸੱਭ ਤੋਂ ਘੱਟ 2022 ਵਿਚ ਰਾਜਕੋਟ ਵਿਚ 87 ਦੌੜਾਂ ਦਾ ਆਲਆਊਟ ਸੀ।
ਹਾਲਾਂਕਿ ਭਾਰਤ ਦੀ ਸ਼ੁਰੂਆਤ ਚੰਗੀ ਨਹੀਂ ਰਹੀ ਜਦੋਂ ਦਖਣੀ ਅਫ਼ਰੀਕੀ ਗੇਂਦਬਾਜ਼ਾਂ ਨੇ ਉਨ੍ਹਾਂ ਨੂੰ ਲਾਲ ਮਿੱਟੀ ਦੀ ਸਤਹ ਉਤੇ ਪਹਿਲਾਂ ਬੱਲੇਬਾਜ਼ੀ ਕਰਨ ਲਈ ਕਿਹਾ ਸੀ, ਪਰ ਪਾਂਡਿਆ ਨੇ ਅਖ਼ੀਰਲੇ ਓਵਰਾਂ ਵਿਚ 28 ਗੇਂਦਾਂ ਉਤੇ ਅਜੇਤੂ 59 ਦੌੜਾਂ ਬਣਾਈਆਂ ਜਿਸ ਨਾਲ ਭਾਰਤ ਨੇ 175/6 ਦਾ ਸਕੋਰ ਖੜ੍ਹਾ ਕੀਤਾ।
ਅਨੁਸ਼ਾਸਨ ਦੀ ਮੰਗ ਕਰਨ ਵਾਲੀ ਪਿੱਚ ਉਤੇ, ਦਖਣੀ ਅਫਰੀਕਾ ਦੀ ਪੂਰੀ ਟੀਮ 12.3 ਓਵਰਾਂ ਵਿਚ ਸਿਰਫ 74 ਦੌੜਾਂ ਬਣਾ ਕੇ ਆਊਟ ਹੋ ਗਈ। ਅਰਸ਼ਦੀਪ ਸਿੰਘ, ਜਸਪ੍ਰੀਤ ਬੁਮਰਾਹ, ਵਰੁਣ ਚੱਕਰਵਰਤੀ ਅਤੇ ਅਕਸ਼ਰ ਪਟੇਲ ਨੇ ਦੋ-ਦੋ ਵਿਕਟਾਂ ਲਈਆਂ, ਜਦਕਿ ਪਾਂਡਿਆ ਨੇ ਇਕ ਵਿਕਟ ਲਈ। ਪਾਂਡਿਆ ਨੂੰ ‘ਪਰਸਨ ਆਫ਼ ਦ ਮੈਚ’ ਐਲਾਨਿਆ ਗਿਆ।
ਮੈਚ ਵਿਚ ਜਸਪ੍ਰੀਤ ਬੁਮਰਾਹ ਨੇ ਅਪਣੀਆਂ ਟੀ-20 ਮੈਚਾਂ ਵਿਚ 100 ਵਿਕਟਾਂ ਪੂਰੀਆਂ ਕੀਤੀਆਂ। ਇਸ ਨਾਲ ਹੀ ਉਹ ਟੈਸਟ, ਵਨਡੇ ਅਤੇ ਟੀ-20 ਮੈਚਾਂ ਵਿੱਚ 100 ਵਿਕਟਾਂ ਪੂਰੀਆਂ ਕਰਨ ਵਾਲੇ ਪਹਿਲੇ ਭਾਰਤੀ ਗੇਂਦਬਾਜ਼ ਬਣ ਗਏ ਹਨ।
