ਸਮੋਆ ਦਾ ਡੇਰਿਅਸ ਵਿਸੇਰ ਇਕ ਓਵਰ ’ਚ ਛੇ ਛੱਕੇ ਲਗਾਉਣ ਵਾਲੇ ਛੇਵਾਂ ਬੱਲੇਬਾਜ਼ ਬਣਿਆ
T20I Records : ਸਮੋਆ ਦੇ ਬੱਲੇਬਾਜ਼ ਡੇਰਿਅਸ ਵਿਸੇਰ ਨੇ ਮੰਗਲਵਾਰ ਨੂੰ ਰਾਜਧਾਨੀ ਏਪੀਆ ’ਚ ਟੀ-20 ਵਿਸ਼ਵ ਕੱਪ ਪੂਰਬੀ ਏਸ਼ੀਆ ਪੈਸੀਫਿਕ ਜ਼ੋਨ ਕੁਆਲੀਫਾਇਰ ’ਚ ਵਨਾਤੂ ਵਿਰੁਧ ਇਕ ਓਵਰ ’ਚ 39 ਦੌੜਾਂ ਬਣਾ ਕੇ ਨਵਾਂ ਟੀ-20 ਕੌਮਾਂਤਰੀ ਰੀਕਾਰਡ ਬਣਾਇਆ।
ਵਿਸੇਰ ਨੇ ਤੇਜ਼ ਗੇਂਦਬਾਜ਼ ਨਲਿਨ ਨਿਪਿਕੋ ਦੇ ਇਕ ਓਵਰ ’ਚ ਛੇ ਛੱਕੇ ਲਗਾਏ। ਇਸ ਓਵਰ ’ਚ ਤਿੰਨ ਨੋ-ਬਾਲ ਵੀ ਸ਼ਾਮਲ ਸਨ, ਜਿਸ ਨਾਲ ਟੀ-20 ਕੌਮਾਂਤਰੀ ਕ੍ਰਿਕਟ ’ਚ ਇਕ ਓਵਰ ’ਚ ਸੱਭ ਤੋਂ ਵੱਧ ਦੌੜਾਂ ਬਣਾਉਣ ਦਾ ਨਵਾਂ ਰੀਕਾਰਡ ਬਣ ਗਿਆ।
ਇਸ 28 ਸਾਲ ਦੇ ਖਿਡਾਰੀ ਦਾ ਇਹ ਤੀਜਾ ਟੀ-20 ਮੈਚ ਸੀ। ਉਸ ਨੇ 62 ਗੇਂਦਾਂ ’ਚ ਪੰਜ ਚੌਕਿਆਂ ਅਤੇ 14 ਛੱਕਿਆਂ ਦੀ ਮਦਦ ਨਾਲ 132 ਦੌੜਾਂ ਬਣਾਈਆਂ।
ਇਸ ਤੋਂ ਪਹਿਲਾਂ ਪੰਜ ਮੌਕਿਆਂ ’ਤੇ ਕਿਸੇ ਗੇਂਦਬਾਜ਼ ਨੇ ਇਕ ਓਵਰ ’ਚ 36 ਦੌੜਾਂ ਦਿਤੀਆਂ ਹਨ। ਇਨ੍ਹਾਂ ਗੇਂਦਬਾਜ਼ਾਂ ’ਚ ਸਟੂਅਰਟ ਬ੍ਰਾਡ (2007), ਅਕਿਲਾ ਦਨੰਜਯਾ (2021), ਕਰੀਮ ਜੰਨਤ (2024), ਕਾਮਰਾਨ ਖਾਨ (2024) ਅਤੇ ਅਜ਼ਮਤੁੱਲਾ ਉਮਰਜ਼ਈ (2024) ਸ਼ਾਮਲ ਹਨ। ਸਭ ਤੋਂ ਪਹਿਲਾਂ ਭਾਰਤੀ ਬੱਲੇਬਾਜ਼ ਯੁਵਰਾਜ ਸਿੰਘ ਨੇ ਸਟੂਅਰਟ ਬ੍ਰਾਡ ਨੂੰ ਛੇ ਗੇਂਦਾਂ ’ਚ ਛੇ ਛੱਕੇ ਮਾਰੇ ਸਨ।
ਵਿਸਰ ਇਸ ਫਾਰਮੈਟ ’ਚ ਸੈਂਕੜਾ ਲਗਾਉਣ ਵਾਲਾ ਸਮੋਆ ਦਾ ਪਹਿਲਾ ਬੱਲੇਬਾਜ਼ ਹੈ। ਉਨ੍ਹਾਂ ਦੀ ਧਮਾਕੇਦਾਰ ਪਾਰੀ ਦੇ ਬਾਵਜੂਦ ਸਮੋਆ ਦੀ ਟੀਮ 174 ਦੌੜਾਂ ’ਤੇ ਆਊਟ ਹੋ ਗਈ। ਵਿਸਰ ਤੋਂ ਬਾਅਦ ਉਸ ਦੀ ਟੀਮ ਦਾ ਦੂਜਾ ਸੱਭ ਤੋਂ ਵੱਡਾ ਸਕੋਰ ਕਪਤਾਨ ਕਾਲੇਬ ਜਸਮਤ ਨੇ 16 ਦੌੜਾਂ ਬਣਾਇਆ।
ਜਵਾਬ ’ਚ ਵਨੂਆਤੂ ਦੀ ਟੀਮ ਨੇ ਚੰਗੀ ਚੁਨੌਤੀ ਦਿਤੀ ਪਰ ਆਖਿਰ ’ਚ ਉਹ 9 ਵਿਕਟਾਂ ’ਤੇ 164 ਦੌੜਾਂ ਹੀ ਬਣਾ ਸਕੀ ਅਤੇ 10 ਦੌੜਾਂ ਨਾਲ ਮੈਚ ਹਾਰ ਗਈ।
