ਜ਼ਖ਼ਮੀ ਹੋਣ ਤੋਂ ਬਾਅਦ ਵੀ ਕੀਤਾ ਟੀਮ ਲਈ ਇਕ ਗੋਲ
ਮੈਡ੍ਰਿਡ, 22 ਜਨਵਰੀ: ਰਿਆਲ ਮੈਡ੍ਰਿਡ ਦੇ ਮਸ਼ਹੂਰ ਫ਼ੁਟਬਾਲਰ ਕ੍ਰਿਸਟਿਆਨੋ ਰੋਨਾਲਡੋ ਦੇ ਸਿਰ 'ਤੇ ਗੰਭੀਰ ਸੱਟ ਲੱਗ ਗਈ ਹੈ। ਇਹ ਹਾਦਸਾ ਐਤਵਾਰ ਨੂੰ ਮੈਡ੍ਰਿਡ 'ਚ ਲਾ ਲੀਗਾ ਲੀਗ ਮੁਕਾਬਲੇ 'ਚ ਡੈਪੋਰਟਿਵੋ ਵਿਰੁਧ ਖੇਡਿਆ ਵਾਪਰਿਆ। ਹਾਲਾਂ ਕਿ ਰਿਆਲ ਮੈਡ੍ਰਿਡ ਮੈਚ 'ਚ 7-1 ਨਾਲ ਜਿੱਤ ਦਰਜ ਕਰਨ 'ਚ ਕਾਮਯਾਬ ਹੋ ਗਈ ਪਰ ਸਿਰ 'ਤੇ ਸੱਟ ਵੱਜਣ ਕਾਰਨ ਰੋਨਾਲਡੋ ਮੈਦਾਨ 'ਤੇ ਹੀ ਲਹੂ-ਲੁਹਾਨ ਹੋ ਗਏ।ਸੱਟ ਕਾਰਨ ਰੋਨਾਲਡੋ ਨੂੰ ਮੈਦਾਨ ਛੱਡ ਕੇ ਜਾਣਾ ਪਿਆ ਪਰ ਇਸ ਤੋਂ ਬਾਅਦ ਵੀ ਉਨ੍ਹਾਂ ਨੇ ਜ਼ਬਰਦਸਤ ਵਾਪਸੀ ਕਰਦਿਆਂ ਅਪਣੀ ਟੀਮ ਲਈ ਦੂਜਾ ਗੋਲ ਕੀਤਾ। ਜ਼ਖ਼ਮੀ ਹੋਣ ਤੋਂ ਪਹਿਲਾਂ ਉਹ ਅਪਣੀ ਟੀਮ ਲਈ ਇਕ ਗੋਲ ਕਰ ਚੁਕੇ ਸਨ।
ਡੈਪੋਰਟਿਵੋ ਵਲੋਂ ਖੇਡਦਿਆਂ ਐਡੀਅਨ ਲੋਪੇਜ ਅਲਵਾਰੋਜ ਨੇ ਮੈਚ ਦੇ 23ਵੇਂ ਮਿੰਟ 'ਚ ਗੋਲ ਕਰ ਕੇ ਅਪਣੀ ਟੀਮ ਨੂੰ 1-0 ਵਾਧਾ ਦਿਵਾਇਆ ਪਰ ਇਸ ਤੋਂ ਬਾਅਦ ਰਿਆਲ ਮੈਡ੍ਰਿਡ ਨੇ ਅਪਣੇ ਹਮਲਾਵਰ ਅੰਦਾਜ਼ ਨੂੰ ਜਾਰੀ ਰਖਦਿਆਂ ਵਿਰੋਧੀਆਂ ਦੇ ਗੋਲ-ਪੋਸਟ 'ਤੇ ਇਕ ਤੋਂ ਬਾਅਦ ਇਕ ਲਗਾਤਾਰ 7 ਗੋਲ ਕੀਤੇ।ਇਸ ਦੌਰਾਨ ਮੈਚ 'ਚ ਇਕ ਵੱਡਾ ਹਾਦਸਾ ਉਸ ਸਮੇਂ ਵਾਪਰਿਆ, ਜਦੋਂ ਡੈਪੋਰਟਿਵੋ ਦੇ ਡਿਫ਼ੈਂਡਰ ਫ਼ੈਬਿਅਨ ਸਕਾਰ ਦਾ ਪੈਰ ਰੋਨਾਲਡੋ ਦੇ ਸਿਰ 'ਤੇ ਜਾ ਵੱਜਿਆ। ਸਿਰ 'ਤੇ ਲੱਗੀ ਸੱਟ ਤੋਂ ਬਾਅਦ ਰੋਨਾਲਡੋ ਮੈਦਾਨ 'ਤੇ ਹੀ ਢੇਰ ਹੋ ਗਿਆ ਅਤੇ ਉਸ ਦੇ ਸਿਰ ਤੋਂ ਕਾਫ਼ੀ ਖ਼ੂਨ ਵਹਿ ਰਿਹਾ ਸੀ। ਜ਼ਿਕਰਯੋਗ ਹੈ ਕਿ ਰਿਆਲ ਮੈਡ੍ਰਿਡ ਵਲੋਂ ਖੇਡਦਿਆਂ ਇਕ ਵਾਰ ਪਹਿਲਾਂ ਵੀ ਰੋਨਾਲਡੋ ਦੇ ਸਿਰ 'ਤੇ ਸੱਟ ਵੱਜੀ ਸੀ। ਇਸ ਤੋਂ ਬਾਅਦ ਵੀ ਉਸ ਨੇ ਅਪਣਾ ਸ਼ਾਨਦਾਰ ਖੇਡ ਦਾ
ਪ੍ਰਦਰਸ਼ਨ ਕੀਤਾ। (ਏਜੰਸੀ)