ਬੀਮਾਰੀ ਦੇ ਚਲਦੇ ਪਿਛਲੇ ਕੁੱਝ ਸਮੇਂ ਤੋਂ ਸਨ ਹਸਪਤਾਲ 'ਚ ਦਾਖ਼ਲ 

ਨਵੀਂ ਦਿੱਲੀ : ਦੁਨੀਆਂ ਦੀ ਸੱਭ ਤੋਂ ਵੱਡੀ ਸ਼ਰਾਬ ਕੰਪਨੀ ਡਿਆਜੀਓ ਦੇ ਭਾਰਤੀ ਮੂਲ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ (ਸੀ.ਈ.ਓ.) ਇਵਾਨ ਮੈਨੁਅਲ ਮੇਨੇਜ਼ੇਸ ਦੀ ਬੁੱਧਵਾਰ ਨੂੰ ਮੌਤ ਹੋ ਗਈ। ਕੰਪਨੀ ਨੇ ਇਹ ਜਾਣਕਾਰੀ ਸਾਂਝੀ ਕੀਤੀ ਹੈ। ਮੇਨੇਜ਼ੇਸ ਨੂੰ ਇਲਾਜ ਲਈ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ ਸੀ।
ਮਾਮਲੇ ਦੀ ਜਾਣਕਾਰੀ ਰੱਖਣ ਵਾਲੇ ਸੂਤਰਾਂ ਨੇ ਦਸਿਆ ਕਿ 63 ਸਾਲਾ ਮੇਨੇਜ਼ੇਸ ਇਸ ਮਹੀਨੇ ਦੇ ਅੰਤ 'ਚ ਸੇਵਾਮੁਕਤ ਹੋਣ ਵਾਲੇ ਸਨ। ਉਨ੍ਹਾਂ ਨੂੰ ਢਿੱਡ ਦੇ ਅਲਸਰ ਅਤੇ ਹੋਰ ਪੇਚੀਦਗੀਆਂ ਦੇ ਇਲਾਜ ਲਈ ਹਸਪਤਾਲ 'ਚ ਭਰਤੀ ਕਰਵਾਇਆ ਗਿਆ ਸੀ। ਲੰਡਨ ਵਿਚ ਉਨ੍ਹਾਂ ਦੀ ਮੌਤ ਦੇ ਕਾਰਨਾਂ ਦਾ ਤੁਰਤ ਪਤਾ ਨਹੀਂ ਲੱਗ ਸਕਿਆ।

ਜ਼ਿਕਰਯੋਗ ਹੈ ਕਿ ਡਿਆਜੀਓ ਨੇ ਸੋਮਵਾਰ ਨੂੰ ਐਲਾਨ ਕੀਤੀ ਕਿ ਮੇਨੇਜ਼ੇਸ ਦਾ ਇਲਾਜ ਚੱਲ ਰਿਹਾ ਹੈ ਅਤੇ ਸੀ.ਈ.ਓ. ਨਿਯੁਕਤ ਕੀਤੇ ਗਏ ਡੇਬਰਾ ਕਰਿਊ ਤੁਰਤ ਅਧਾਰ 'ਤੇ ਆਪਣਾ ਅਹੁਦਾ ਸੰਭਾਲਣਗੇ। ਡਿਆਜੀਓ ਨੇ ਇਕ ਬਿਆਨ ਵਿਚ ਕਿਹਾ: "ਹਫ਼ਤੇ ਦੇ ਅੰਤ ਵਿਚ, ਸਾਨੂੰ ਪਤਾ ਲੱਗਾ ਕਿ ਅਲਸਰ ਦੀ ਸਰਜਰੀ ਅਤੇ ਕਈ ਹੋਰ ਪੇਚੀਦਗੀਆਂ ਤੋਂ ਬਾਅਦ ਇਵਾਨ ਦੀ ਹਾਲਤ ਵਿਗੜ ਗਈ ਸੀ।"

ਮੇਨੇਜ਼ੇਸ ਨੇ ਦਿੱਲੀ ਦੇ ਵੱਕਾਰੀ ਸੇਂਟ ਸਟੀਫ਼ਨ ਕਾਲਜ ਅਤੇ ਇੰਡੀਅਨ ਇੰਸਟੀਚਿਊਟ ਆਫ਼ ਮੈਨੇਜਮੈਂਟ-ਅਹਿਮਦਾਬਾਦ ਤੋਂ ਪੜ੍ਹਾਈ ਕੀਤੀ। ਗਿਨੀਜ਼ ਅਤੇ ਗ੍ਰੈਂਡ ਮੈਟਰੋਪੋਲੀਟਨ ਦੇ ਵਿਲੀਨ ਹੋਣ ਤੋਂ ਬਾਅਦ ਮੇਨੇਜ਼ੇਸ 1997 ਵਿਚ ਡਿਆਜੀਓ ਵਿਚ ਸ਼ਾਮਲ ਹੋਏ। ਉਹ ਜੁਲਾਈ 2012 ਵਿਚ ਕੰਪਨੀ ਦੇ ਕਾਰਜਕਾਰੀ ਨਿਰਦੇਸ਼ਕ ਅਤੇ ਜੁਲਾਈ 2013 ਵਿਚ ਮੁੱਖ ਕਾਰਜਕਾਰੀ ਅਧਿਕਾਰੀ ਬਣੇ।

2023 ਵਿਚ ਨਾਈਟ ਦੀ ਉਪਾਧੀ ਦਿਤੀ ਗਈ ਸੀ। ਉਨ੍ਹਾਂ ਦਾ ਭਰਾ ਵਿਕਟਰ ਮੇਨੇਜ਼ੇਸ ਸਿਟੀਬੈਂਕ ਦਾ ਸਾਬਕਾ ਚੇਅਰਮੈਨ ਅਤੇ ਸੀ.ਈ.ਓ. ਡਿਏਜੀਓ ਦੇ ਫਲੈਗਸ਼ਿਪ ਬ੍ਰਾਂਡਾਂ ਵਿਚ ਜੌਨੀ ਵਾਕਰ ਵਿਸਕੀ, ਟੈਂਕਵੇਰੇ ਜਿਨ ਅਤੇ ਡੌਨ ਜੂਲੀਓ ਟਕੀਲਾ ਸ਼ਾਮਲ ਹਨ। ਕੰਪਨੀ ਨੇ 28 ਮਾਰਚ ਨੂੰ ਮੇਨੇਜ਼ੇਸ ਦੀ ਜਗ੍ਹਾ ਡੇਬਰਾ ਕਰਿਊ ਦੀ ਨਿਯੁਕਤੀ ਦਾ ਐਲਾਨ ਕੀਤਾ ਸੀ।