ਸੋਮਾਲੀਆ ਵਿਚ ਹੜ੍ਹ ਦੇ ਪਾਣੀ ਵਿਚ ਫਸੇ ਲਗਭਗ 2,400 ਲੋਕਾਂ ਤਕ ਪਹੁੰਚਣ ਦੀ ਕੋਸ਼ਿਸ਼ ਜਾਰੀ

International News: ਨੈਰੋਬੀ ਦੇ ਕੀਨੀਆ ਅਤੇ ਸੋਮਾਲੀਆ ਵਿਚ ਭਾਰੀ ਮੀਂਹ ਅਤੇ ਹੜ੍ਹਾਂ ਕਾਰਨ ਘੱਟੋ-ਘੱਟ 40 ਲੋਕਾਂ ਦੀ ਮੌਤ ਹੋ ਗਈ ਹੈ ਅਤੇ ਦਸ ਹਜ਼ਾਰ ਤੋਂ ਵੱਧ ਲੋਕ ਬੇਘਰ ਹੋ ਗਏ ਹਨ। ਰਾਹਤ ਅਤੇ ਬਚਾਅ ਏਜੰਸੀਆਂ ਨੇ ਸੋਮਵਾਰ ਨੂੰ ਇਹ ਜਾਣਕਾਰੀ ਦਿੱਤੀ।

ਸੋਮਾਲੀਆ ਦੀ ਸਰਕਾਰ ਨੇ ਬਹੁਤ ਜ਼ਿਆਦਾ ਖ਼ਰਾਬ ਮੌਸਮ ਕਾਰਨ ਹੋਈ ਤਬਾਹੀ ਤੋਂ ਬਾਅਦ ਰਾਸ਼ਟਰੀ ਐਮਰਜੈਂਸੀ ਦਾ ਐਲਾਨ ਕੀਤਾ ਹੈ। ਸੋਮਾਲੀਆ ਵਿਚ ਇਸ ਤਬਾਹੀ ਕਾਰਨ ਘੱਟੋ-ਘੱਟ 25 ਲੋਕਾਂ ਦੀ ਮੌਤ ਹੋ ਗਈ ਹੈ ਅਤੇ ਵੱਡੀ ਗਿਣਤੀ ਵਿਚ ਘਰ, ਸੜਕਾਂ ਅਤੇ ਪੁਲ ਤਬਾਹ ਹੋ ਗਏ ਹਨ। ਐਮਰਜੈਂਸੀ ਅਤੇ ਬਚਾਅ ਕਰਮਚਾਰੀ ਦੱਖਣੀ ਸੋਮਾਲੀਆ ਦੇ ਜੁਬਾਲੈਂਡ ਰਾਜ ਦੇ ਲੂਕ ਜ਼ਿਲ੍ਹੇ ਵਿਚ ਹੜ੍ਹ ਦੇ ਪਾਣੀ ਵਿਚ ਫਸੇ ਲਗਭਗ 2,400 ਲੋਕਾਂ ਤਕ ਪਹੁੰਚਣ ਦੀ ਕੋਸ਼ਿਸ਼ ਕਰ ਰਹੇ ਹਨ।

ਏਜੰਸੀ ਦੇ ਪ੍ਰਬੰਧਕ ਨਿਰਦੇਸ਼ਕ ਹਸਨ ਇਸਸੇ ਨੇ ਦੱਸਿਆ ਕਿ "ਕਿਸਮਾਯੋ ਤੋਂ ਦੋ ਕਿਸ਼ਤੀਆਂ ਭੇਜਣ ਦੀ ਯੋਜਨਾ ਹੈ। ਸੰਯੁਕਤ ਰਾਸ਼ਟਰ ਦੇ ਮਨੁੱਖੀ ਮਾਮਲਿਆਂ ਦੇ ਤਾਲਮੇਲ ਲਈ ਦਫਤਰ ਨੇ ਜੁਬਾ ਅਤੇ ਸ਼ਬੇਲੇ ਨਦੀਆਂ ਦੇ ਨਾਲ ਰਹਿਣ ਵਾਲੇ ਲੋਕਾਂ ਨੂੰ ਹੜ੍ਹ ਦੀ ਚੇਤਾਵਨੀ ਜਾਰੀ ਕੀਤੀ ਅਤੇ ਸਾਰੇ ਲੋਕਾਂ ਨੂੰ ਓਥੋਂ ਖਾਲੀ ਕਰਨ ਦਾ ਹੁਕਮ ਦਿਤਾ। ਸੋਮਾਲੀਆ ਆਫ਼ਤ ਪ੍ਰਬੰਧਨ ਏਜੰਸੀ ਸੰਕਟ ਨਾਲ ਨਜਿੱਠਣ ਲਈ ਸੁਚਾਰੂ ਢੰਗ ਨਾਲ ਕੰਮ ਕਰ ਰਹੀ ਹੈ ਅਤੇ ਲੋਕਾਂ ਨੂੰ ਕੱਢਣ ਵਿਚ ਮਦਦ ਲਈ ਇਕ ਜਹਾਜ਼ ਭੇਜ ਦਿਤਾ ਹੈ।" 

ਹਸਨ ਨੇ ਕਿਹਾ, ''ਮੌਜੂਦਾ ਹੜ੍ਹਾਂ ਦੀ ਸਥਿਤੀ ਅਗਲੇ ਕੁਝ ਦਿਨਾਂ 'ਚ ਵਿਗੜਨ ਦੀ ਸੰਭਾਵਨਾ ਹੈ ਕਿਉਂਕਿ ਉੱਚੇ ਇਥੋਪੀਆਈ ਹਾਈਲੈਂਡਸ ਤੋਂ ਹੇਠਾਂ ਵੱਲ ਹੋਰ ਪਾਣੀ ਵਹਿ ਸਕਦਾ ਹੈ।'' ਸੋਮਾਲੀਆ 'ਚ ਲਗਾਤਾਰ ਚਾਰ ਸਾਲਾਂ ਦੇ ਸੁੱਕੇ  ਤੋਂ ਬਾਅਦ ਇਸ ਸਾਲ ਦਾ ਹੜ੍ਹ ਦੇਸ਼ 'ਚ ਭਾਰੀ ਤਬਾਹੀ ਲੈ ਕੇ ਆਇਆ ਹੈ।

ਗੁਆਂਢੀ ਦੇਸ਼ ਕੀਨੀਆ 'ਚ ਕੀਨੀਆ ਰੈੱਡ ਕਰਾਸ ਨੇ ਕਿਹਾ ਕਿ ਸ਼ੁਕਰਵਾਰ ਤੋਂ ਸ਼ੁਰੂ ਹੋਈ ਭਾਰੀ ਬਾਰਿਸ਼ ਕਾਰਨ ਹੁਣ ਤਕ 15 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਰੈੱਡ ਕਰਾਸ ਮੁਤਾਬਕ ਕੀਨੀਆ ਦਾ ਬੰਦਰਗਾਹ ਸ਼ਹਿਰ ਮੋਂਬਾਸਾ, ਉੱਤਰ-ਪੂਰਬੀ ਸ਼ਹਿਰ ਮੰਡੇਰਾ ਅਤੇ ਵਜੀਰ ਭਾਰੀ ਬਾਰਸ਼ ਨਾਲ ਸਭ ਤੋਂ ਵੱਧ ਪ੍ਰਭਾਵਿਤ ਸ਼ਹਿਰ ਹਨ।
ਕੀਨੀਆ ਰੈੱਡ ਕਰਾਸ ਨੇ ਕਿਹਾ ਕਿ ਐਤਵਾਰ ਨੂੰ ਆਏ ਹੜ੍ਹਾਂ ਨੇ 241 ਏਕੜ ਖੇਤੀ ਵਾਲੀ ਜ਼ਮੀਨ ਤਬਾਹ ਕਰ ਦਿੱਤੀ ਅਤੇ 1,067 ਜਾਨਵਰ ਮਾਰੇ ਗਏ ਹਨ।
ਕੀਨੀਆ ਦੇ ਮੌਸਮ ਵਿਭਾਗ ਨੇ ਸਤੰਬਰ ਵਿਚ ਚੇਤਾਵਨੀ ਦਿਤੀ ਸੀ ਕਿ ਬਾਰਿਸ਼, ਜੋ ਆਮ ਤੌਰ 'ਤੇ ਅਕਤੂਬਰ ਅਤੇ ਦਸੰਬਰ ਦੇ ਵਿਚਕਾਰ ਕੁਝ ਦਿਨ ਰਹਿੰਦੀ ਹੈ, ਇਸ ਵਾਰ ਪਹਿਲਾਂ ਨਾਲੋਂ ਬਹੁਤ ਜ਼ਿਆਦਾ ਭਾਰੀ ਹੋਵੇਗੀ।

(For more news apart from Efforts To Reach Nearly 2,400 People Trapped In Floodwaters In Somalia, stay tuned to Rozana Spokesman).