300 ਫ਼ੁਟ ਤਕ ਉੱਠ ਰਿਹੈ ਲਾਵਾ
ਹਵਾਈ, 8 ਮਈ : ਅਮਰੀਕਾ ਦੇ ਹਵਾਈ ਟਾਪੂ 'ਚ ਪਿਛਲੇ ਕਈ ਦਿਨਾਂ ਤੋਂ ਜਵਾਲਾਮੁਖੀ ਨੇ ਭਾਰੀ ਤਬਾਹੀ ਮਚਾਈ ਹੈ। ਜਵਾਲਾਮੁਖੀ ਧਮਾਕੇ ਨਾਲ ਤਬਾਹ ਹੋਣ ਵਾਲੇ ਘਰਾਂ ਦੀ ਗਿਣਤੀ ਵੱਧ ਕੇ 35 ਹੋ ਗਈ ਹੈ। ਵਿਗਿਆਨੀਆਂ ਮੁਤਾਬਕ ਧਮਾਕਾ ਇੰਨਾ ਤੇਜ਼ ਸੀ ਕਿ ਲਾਵਾ ਹਵਾ 'ਚ 300 ਫ਼ੁਟ ਉੱਪਰ ਤਕ ਉੱਛਲਦਾ ਰਿਹਾ।
ਜਵਾਲਾਮੁਖੀ ਫੱਟਣ ਕਾਰਨ ਘਰਾਂ ਤੋਂ ਸੁਰੱਖਿਅਤ ਸਥਾਨਾਂ 'ਤੇ ਭੇਜੇ ਗਏ ਲੋਕਾਂ ਦੇ ਛੇਤੀ ਵਾਪਸੀ ਦੀ ਕੋਈ ਸੰਭਾਵਨਾ ਨਜ਼ਰ ਨਹੀਂ ਆ ਰਹੀ ਹੈ। ਹਵਾਈ ਦੇ ਅਧਿਕਾਰੀਆਂ ਨੇ ਦਸਿਆ ਕਿ ਤਬਾਹ ਹੋਏ ਘਰ ਲੀਲਾਨੀ ਅਸਟੇਟ 'ਚ ਹਨ, ਜਿਥੇ ਜਵਾਲਾਮੁਖੀ ਕਾਰਨ ਥਾਂ-ਥਾਂ ਤੋਂ ਜ਼ਮੀਨ ਫੱਟ ਗਈ ਹੈ, ਜਿਸ ਕਾਰਨ ਜ਼ਹਿਰੀਲੀ ਗੈਸ ਅਤੇ ਭਾਫ਼ ਨਿਕਲ ਰਹੀ ਹੈ।ਹਵਾਈ ਦੇ ਬੁਲਾਰੇ ਜੈਨੇਟ ਸੈਂਡਰ ਨੇ ਕਿਹਾ, ''ਅੰਕੜਿਆਂ 'ਚ ਬਦਲਾਅ ਆ ਸਕਦਾ ਹੈ। ਇਹ ਦਰਦਨਾਕ ਹੈ।'' ਅਮਰੀਕੀ ਅਧਿਕਾਰੀਆਂ ਦੇ ਸਰਵੇ ਮੁਤਾਬਕ ਅੰਦਰ ਅਜੇ ਵੀ ਮੈਗਮਾ ਹੈ ਜੋ ਅਜੇ ਵੀ ਨਿਕਲ ਰਿਹਾ ਹੈ। ਉਨ੍ਹਾਂ ਦਸਿਆ ਕਿ ਜਦ ਤਕ ਮੈਗਮਾ ਅੰਦਰ ਮੌਜੂਦ ਹੈ ਉਦੋਂ ਤਕ ਇਹ ਨਿਕਲਦਾ ਰਹੇਗਾ। ਇਸੇ ਲਈ ਇਸ ਇਲਾਕੇ ਨੂੰ ਖ਼ਾਲੀ ਕਰਵਾ ਲਿਆ ਗਿਆ ਹੈ। ਸੈਲਾਨੀਆਂ ਨੂੰ ਵੀ ਇਸ ਇਲਾਕੇ ਵਲ ਆਉਣ ਤੋਂ ਰੋਕ ਦਿਤਾ ਗਿਆ ਹੈ।
Volcano In Hawaii
ਜਵਾਲਾਮੁਖੀ ਫੱਟਣ ਅਤੇ ਲਾਵੇ ਦੀਆਂ ਲਪਟਾਂ ਨਿਕਲਣ ਕਾਰਨ ਹੁਣ ਤਕ ਕਿਸੇ ਦੀ ਜ਼ਖ਼ਮੀ ਹੋਣ ਦੀ ਕੋਈ ਸੂਚਨਾ ਨਹੀਂ ਹੈ, ਪਰ ਸਿਵਲ ਡਿਫੈਂਸ ਏਜੰਸੀ ਨੇ ਕਿਹਾ ਕਿ ਇਸ ਨਾਲ 35 ਘਰ ਤਬਾਹ ਹੋ ਗਏ ਅਤੇ ਕਈ ਮਕਾਨਾਂ ਨੂੰ ਨੁਕਸਾਨ ਪੁੱਜਾ ਹੈ। ਜਵਾਲਾਮੁਖੀ ਦਾ ਲਾਵਾ ਸੜਕਾਂ ਤਕ ਪਹੁੰਚ ਗਿਆ ਹੈ, ਜਿਸ ਨੂੰ ਵੀਡੀਉ 'ਚ ਕੈਦ ਕੀਤਾ ਗਿਆ। ਸੜਕ 'ਤੇ ਖੜੀ ਕਾਰ ਇਸ ਲਾਵੇ ਦੀ ਲਪੇਟ 'ਚ ਆ ਗਈ, ਜਿਸ ਕਾਰਨ ਕਾਰ ਬੁਰੀ ਤਰ੍ਹਾਂ ਨਾਲ ਨੁਕਸਾਨੀ ਗਈ।ਸੁਰੱਖਿਆ ਦੇ ਮੱਦੇਨਜ਼ਰ ਸਰਕਾਰ ਨੇ 10 ਹਜ਼ਾਰ ਲੋਕਾਂ ਨੂੰ ਪੁਨਾ ਅਸਟੇਟ ਖ਼ਾਲੀ ਕਰਨ ਲਈ ਕਿਹਾ ਹੈ। ਰੈਡਕ੍ਰਾਸ ਸੁਸਾਇਟੀ ਨੇ ਦੋ ਰਾਹਤ ਕੈਂਪ ਵੀ ਲਗਾÂੈ ਹਨ। 'ਉਬਰ' ਕੰਪਨੀ ਵੀ ਲੋਕਾਂ ਨੂੰ ਮੁਫ਼ਤ ਸੇਵਾਵਾਂ ਦੇ ਰਹੀ ਹੈ। ਲੋਕਾਂ ਦੇ ਰਹਿਣ ਲਈ ਕਮਿਊਨਿਟੀ ਸੈਂਟਰ ਖੋਲ੍ਹੇ ਗਏ ਹਨ, ਜਿਥੇ ਉਨ੍ਹਾਂ ਲਈ ਲਗਾਤਾਰ ਮਦਦ ਪਹੁੰਚਾਈ ਜਾ ਰਹੀ ਹੈ। (ਪੀਟੀਆਈ)
