Sydney News : ਕਿਸ਼ਤੀ ’ਤੇ ਕੋਕੀਨ ਦੇ ਲਗਭਗ 1,110 ਬਲਾਕ ਮਿਲੇ, ਜਿਨ੍ਹਾਂ ਦਾ ਭਾਰ 1,039 ਕਿਲੋਗ੍ਰਾਮ ਸੀ ਅਤੇ ਜਿਸਦੀ ਬਾਜ਼ਾਰ ਕੀਮਤ 623.4 ਮਿਲੀਅਨ ਆਸਟਰੇਲੀਆਈ ਡਾਲਰ

Sydney News in Punjabi : ਆਸਟਰੇਲੀਆਈ ਪੁਲਿਸ ਨੂੰ ਵੱਡੀ ਸਫ਼ਲਤਾ ਹਾਸਲ ਹੋਈ ਹੈ। ਆਸਟਰੇਲੀਆਈ ਪੁਲਿਸ ਨੇ ਦੇਸ਼ ਦੇ ਪੂਰਬੀ ਤੱਟ ਤੋਂ ਇਕ ਕਿਸ਼ਤੀ ’ਤੇ ਇਕ ਟਨ ਤੋਂ ਵੱਧ ਕੋਕੀਨ ਸਮੇਤ ਪੰਜ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਆਸਟਰੇਲੀਆਈ ਸੰਘੀ ਪੁਲਿਸ (ਏ.ਐਫ਼.ਪੀ) ਅਤੇ ਨਿਊ ਸਾਊਥ ਵੇਲਜ਼ (ਐਨ.ਐਸ.ਡਬਲਿਊ) ਰਾਜ ਪੁਲਿਸ ਨੇ ਐਤਵਾਰ ਨੂੰ ਇਕ ਸਾਂਝੀ ਮੀਡੀਆ ਰਿਲੀਜ਼ ਵਿਚ ਇਹ ਜਾਣਕਾਰੀ ਦਿਤੀ। 

ਅਧਿਕਾਰੀਆਂ ਅਨੁਸਾਰ ਨੰਬੂਕਾ ਹੈੱਡਸ ਦੇ ਤੱਟ ਤੋਂ ਲਗਭਗ ਨੌਂ ਸਮੁੰਦਰੀ ਮੀਲ ਦੂਰ ਜਹਾਜ਼ ਨੂੰ ਰੋਕਿਆ। ਕਿਸ਼ਤੀ ’ਤੇ ਕੋਕੀਨ ਦੇ ਲਗਭਗ 1,110 ਬਲਾਕ ਮਿਲੇ, ਜਿਨ੍ਹਾਂ ਦਾ ਭਾਰ 1,039 ਕਿਲੋਗ੍ਰਾਮ ਸੀ ਅਤੇ ਜਿਸਦੀ ਬਾਜ਼ਾਰ ਕੀਮਤ 623.4 ਮਿਲੀਅਨ ਆਸਟਰੇਲੀਆਈ ਡਾਲਰ (ਲਗਭਗ 399.7 ਮਿਲੀਅਨ ਅਮਰੀਕੀ ਡਾਲਰ) ਸੀ। ਇਸ ਸਬੰਧ ਵਿੱਚ ਕਿਸ਼ਤੀ ’ਤੇ ਸਵਾਰ 24 ਅਤੇ 26 ਸਾਲ ਦੇ ਦੋ ਆਦਮੀਆਂ ਨੂੰ ਗ੍ਰਿਫ਼ਤਾਰ ਕਰ ਕੇ ਕਿਨਾਰੇ ਲਿਜਾਇਆ ਗਿਆ। ਉਸੇ ਸਮੇਂ, 28, 29 ਅਤੇ 35 ਸਾਲ ਦੀ ਉਮਰ ਦੇ ਤਿੰਨ ਹੋਰ ਆਦਮੀਆਂ ਨੂੰ ਤੱਟ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ।

ਕਿਸ਼ਤੀ ’ਤੇ ਸਵਾਰ ਦੋ ਲੋਕਾਂ ’ਤੇ ਵੱਡੀ ਮਾਤਰਾ ਵਿਚ ਪਾਬੰਦੀਸ਼ੁਦਾ ਨਸ਼ੀਲੇ ਪਦਾਰਥਾਂ ਦੀ ਸਪਲਾਈ ਕਰਨ ਅਤੇ ਇਕ ਅਪਰਾਧਿਕ ਸਮੂਹ ਵਿਚ ਹਿੱਸਾ ਲੈਣ ਦੇ ਦੋਸ਼ ਲਗਾਏ ਗਏ ਹਨ। ਬਾਕੀ ਤਿੰਨ ਵਿਅਕਤੀਆਂ ’ਤੇ ਵੱਡੀ ਮਾਤਰਾ ਵਿਚ ਪਾਬੰਦੀਸ਼ੁਦਾ ਨਸ਼ੀਲੇ ਪਦਾਰਥਾਂ ਦੀ ਸਪਲਾਈ ਕਰਨ ਅਤੇ ਇਕ ਅਪਰਾਧਿਕ ਸਮੂਹ ਵਿਚ ਹਿੱਸਾ ਲੈਣ ਦੇ ਦੋਸ਼ ਲਗਾਏ ਗਏ ਹਨ।

 (For more news apart from Australian police arrest five with one ton of cocaine News in Punjabi, stay tuned to Rozana Spokesman)