ਅਫ਼ਗ਼ਾਨਿਸਤਾਨ ਦੇ ਖੁਜਾ ਉਮਾਰੀ ਜ਼ਿਲ੍ਹੇ ਵਿਚ ਇਕ ਸਰਕਾਰੀ ਇਮਾਰਤ 'ਤੇ ਬੀਤੀ ਰਾਤ ਤਾਲਿਬਾਨ ਲੜਾਕੂਆਂ ਨੇ ਹਮਲਾ ਕਰ ਦਿਤਾ
ਕਾਬਲ : ਅਫ਼ਗ਼ਾਨਿਸਤਾਨ ਦੇ ਖੁਜਾ ਉਮਾਰੀ ਜ਼ਿਲ੍ਹੇ ਵਿਚ ਇਕ ਸਰਕਾਰੀ ਇਮਾਰਤ 'ਤੇ ਬੀਤੀ ਰਾਤ ਤਾਲਿਬਾਨ ਲੜਾਕੂਆਂ ਨੇ ਹਮਲਾ ਕਰ ਦਿਤਾ ਜਿਸ ਵਿਚ ਤਿੰਨ ਅਧਿਕਾਰੀਆਂ ਅਤੇ 15 ਸੁਰੱਖਿਆ ਕਰਮੀਆਂ ਦੀ ਮੌਤ ਹੋ ਗਈ। ਗਜਨੀ ਪ੍ਰਾਂਤ ਦੇ ਪੁਲਿਸ ਉਪ ਪ੍ਰਧਾਨ ਰਮਜ਼ਾਨ ਅਲੀ ਮੋਸੇਨੀ ਨੇ ਦਸਿਆ ਕਿ ਹਮਲਾਵਰਾਂ ਨੇ ਬੀਤੀ ਰਾਤ ਜ਼ਿਲ੍ਹੇ ਦੇ ਇਕ ਉਚ ਸੁਰੱਖਿਆ ਵਾਲੀ ਇਮਾਰਤ 'ਤੇ ਹਮਲਾ ਕਰ ਦਿਤਾ। ਜਿਸ ਦਾ ਸੁਰੱਖਿਆ ਬਲਾਂ ਨੇ ਮੂੰਹ ਤੋੜ ਜਵਾਬ ਦਿਤਾ। ਉਨ੍ਹਾਂ ਦਸਿਆ ਕਿ ਜਵਾਬੀ ਹਮਲੇ ਵਿਚ ਤਾਲਿਬਾਨ ਦੇ 25 ਲੜਾਕੂ ਮਾਰੇ ਗਏ ਹਨ।
ਇਹ ਜ਼ਿਲ੍ਹਾ ਰਾਜਧਾਨੀ ਗਜਨੀ ਦੇ ਨਜ਼ਦੀਕ ਸਥਿਤ ਹੈ। ਅਫ਼ਗ਼ਾਨਿਸਤਾਨ ਦੇ ਸਾਂਸਦ ਮੋਹੰਮਦ ਆਰਿਫ਼ ਰਹਮਾਨੀ ਨੇ ਦਸਿਆ ਕਿ ਹਮਲੇ ਵਿਚ ਜ਼ਿਲ੍ਹੇ ਦੇ ਗਵਰਨਰ, ਖ਼ੁਫ਼ੀਆ ਸੇਵਾਵਾਂ ਦੇ ਨਿਰਦੇਸ਼ਕ ਅਤੇ ਪੁਲਿਸ ਉਪ ਪ੍ਰਧਾਨ ਵੀ ਮਾਰੇ ਗਏ ਹਨ। ਰਹਮਾਨੀ ਨੇ ਦਸਿਆ ਕਿ ਹਮਲਾਵਰਾਂ ਨੇ ਬਰੂਦੀ ਸੁਰੰਗਾਂ ਵਿਛਾ ਦਿਤੀਆਂ ਸਨ ਤਾਕਿ ਸਰਕਾਰੀ ਬਲਾਂ ਦੀ ਸਹਾਇਤਾ ਨੂੰ ਮੌਕੇ 'ਤੇ ਪਹੁੰਚਣ ਤੋਂ ਰੋਕਿਆ ਜਾ ਸਕੇ। ਮੋਸੇਨੀ ਨੇ ਦਸਿਆ, ਹਾਲਾਂਕਿ ਬਾਅਦ ਵਿਚ ਸਰਕਾਰੀ ਸਹਾਇਤਾ ਪਹੁੰਚ ਗਈ ਸੀ। ਉਨ੍ਹਾਂ ਦਸਿਆ ਕਿ ਅੱਠ ਸੁਰੱਖਿਆ ਕਰਮੀ ਜ਼ਖ਼ਮੀ ਵੀ ਹੋਏ ਹਨ।