ਇਸ ਸਬੰਧੀ ਇਕ ਵੀਡੀਓ ਵੀ ਵਾਇਰਲ ਹੋ ਰਹੀ ਹੈ
Pakistan News: ਇਸਲਾਮਾਬਾਦ - ਪਾਕਿਸਤਾਨ ਦੇ ਸੂਬਾ ਸਿੰਧ 'ਚ ਘੱਟ-ਗਿਣਤੀ ਹਿੰਦੂ ਭਾਈਚਾਰੇ ਦੇ ਹਾਲਾਤ ਲਗਾਤਾਰ ਖ਼ਰਾਬ ਹੁੰਦੇ ਜਾ ਰਹੇ ਹਨ। ਜਾਣਕਾਰੀ ਅਨੁਸਾਰ ਸੂਬਾ ਸਿੰਧ `ਚ ਦੋ ਨਾਬਾਲਗ ਹਿੰਦੂ ਕੁੜੀਆਂ ਦਾ ਜਬਰੀ ਧਰਮ ਪਰਿਵਰਤਨ ਕਰਵਾਉਣ ਮਗਰੋਂ ਉਹਨਾਂ ਦਾ ਗ਼ੈਰ-ਧਰਮ `ਚ ਨਿਕਾਹ ਕਰਵਾਇਆ ਗਿਆ। ਜਾਣਕਾਰੀ ਅਨੁਸਾਰਸੂਬਾ ਸਿੰਧ ਦੇ ਜ਼ਿਲ੍ਹਾ ਟਾਡੋ ਮੁਹੰਮਦ ਖਾਨ ਦੇ ਪਿੰਡ ਹਾਜੀ ਮੁਹੰਮਦ ਸਲਾਹ ਨਿਜ਼ਾਮੀ ਦੇ ਬਾਘੁ ਕੋਲਹੀ ਦੀ ਪੁੱਤਰੀ ਮਾਇਆ ਕੋਲਹੀ ਦਾ ਜ਼ਿਲ੍ਹਾ ਉਮਰਕੋਟ ਦੀ ਤਹਿਸੀਲ ਸਾਮਰੋ ਦੀ ਦਰਗਾਹ ਗੁਲਜ਼ਾਰ-ਏ-ਖਲੀਲ ਦੇ ਪੀਰ ਆਗ਼ਾ ਜਾਨ ਸਰਹੰਦੀ ਨੇ ਧਰਮ ਪਰਿਵਰਤਨ ਕਰਵਾਇਆ।
ਇਸ ਬਾਰੇ 'ਚ ਜਾਰੀ ਕੀਤੀ ਵੀਡੀਓ 'ਚ ਮੌਲਵੀ ਇਹ ਕਹਿੰਦਾ ਸੁਣਿਆ ਜਾ ਸਕਦਾ ਹੈ ਕਿ ਉਹ ਅਦਾਲਤ `ਚ ਆਪਣੀ ਉਮਰ 16 ਸਾਲ ਨਹੀਂ ਬਲਕਿ 18 ਸਾਲ ਦੱਸੇਗੀ। ਜਾਣਕਾਰੀ ਅਨੁਸਾਰ ਮੀਰਪੁਰ ਖ਼ਾਸ ਦੀ ਅਦਾਲਤ 'ਚ ਲੜਕੀ ਨੂੰ ਪੇਸ਼ ਕਰਨ ਉਪਰੰਤ ਉਸ ਦਾ ਆਬਿਦ ਅਲੀ ਪੁੱਤਰ ਮੁਹੰਮਦ ਰਮਜ਼ਾਨ ਨਾਲ ਨਿਕਾਹ ਕਰਵਾਇਆ ਗਿਆ।
ਜੋ ਇਕ ਹੋ ਮਾਮਲਾ ਸਾਹਮਣੇ ਆਇਆ ਹੈ ਉਸ ਵਿਚ ਸਿੰਧ ਦੇ ਲਿਆਰੀ ਦੇ ਪ੍ਰੇਮ ਕੁਮਾਰ ਦੀ ਧੀ ਪੂਜਾ ਕੁਮਾਰੀ (14 ਸਾਲ) ਦਾ ਜ਼ਿਲ੍ਹਾ ਘੋਟਕੀ ਦੀ ਤਹਿਸੀਲ ਡਹਿਰਕੀ ਦੀ ਦਰਗਾਹ-ਏ-ਆਲੀਆ ਬਰਚੂੰਡੀ ਸ਼ਰੀਫ਼ ਵਿਖੇ ਪੀਰ ਮੀਆਂ ਮਿੱਠੂ ਵਲੋਂ ਧਰਮ ਪਰਿਵਰਤਨ ਕਰਵਾ ਕੇ ਰਹੀਮ ਕੁਮਾਰੀ ਯਾਰ ਖ਼ਾਨ ਸ਼ਹਿਰ ਦੇ ਵਿਆਜ਼ ਅਲੀ ਨਾਲ ਨਿਕਾਹ ਕਰਵਾਇਆ ਗਿਆ।
ਇਸ ਸਭ ਤੋਂ ਇਲਾਵਾ ਦੱਸ ਦਈਏ ਕਿ ਜ਼ਿਲ੍ਹਾ ਸੰਘਰ ਦੇ ਜ਼ਾਮ ਨਵਾਜ਼ ਅਲੀ ਰੂਰਲ ਹਸਪਤਾਲ 'ਚ ਡਾਕਟਰ ਦੀ ਲਾਪਰਵਾਹੀ ਨਾਲ ਗਲਤ ਟੀਕਾ ਲਗਾਏ ਜਾਣ ਕਰਕੇ ਆਸ਼ਾ ਮੇਘਵਾਰ ਦੀ ਮੌਤ ਹੋ ਗਈ। ਪੁਲਿਸ ਦੇ ਹਸਪਤਾਲ 'ਚ ਪਹੁੰਚਣ ਤੋਂ ਪਹਿਲਾਂ ਡਾਕਟਰ ਵੀ ਉੱਥੋਂ ਫਰਾਰ ਹੋ ਗਏ ਤੇ ਹੁਣ ਤੱਕ ਉਹਨਾਂ ਦਾ ਕੁੱਝ ਪਤਾ ਨਹੀਂ ਲੱਗ ਸਕਿਆ।
