ਕਿਹਾ, “ਤਣਾਅ ਨਾ ਮੁੱਕਦਾ ਤਾਂ ਪਰਮਾਣੂ ਯੁੱਧ ਵੀ ਲੱਗ ਸਕਦਾ ਸੀ”
Trump again spoke on the India-Pakistan issue
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਕਿਹਾ ਕਿ ਭਾਰਤ ਤੇ ਪਾਕਿਸਤਾਨ ਵਿਚ ਗੱਲਬਾਤ ਕਰਨਾ ਤੇ ਉਨ੍ਹਾਂ ਨੂੰ ਕਗਾਰ ਤੋਂ ਵਾਪਸ ਲਿਆਉਣਾ ਉਨ੍ਹਾਂ ਦੀ ਇੰਨੀ ਵੱਡੀ ਸਫ਼ਲਤਾ ਹੈ ਕਿ ਉਸ ਦਾ ਸਿਹਰਾ ਉਨ੍ਹਾਂ ਨੂੰ ਕਦੇ ਵੀ ਨਹੀਂ ਮਿਲ ਸਕੇਗਾ।
ਉਨ੍ਹਾਂ ਨੇ ਕਿਹਾ ਕਿ ਦੋਵਾਂ ਦੇਸ਼ਾਂ ਵਿਚ ਨਫ਼ਤਰ ਬਹੁਤ ਹੈ ਤੇ ਤਣਾਅ ਉਸ ਪੱਧਰ ਉੱਤੇ ਪਹੁੰਚ ਗਿਆ ਸੀ ਜਿਥੇ ਅਗਲਾ ਕਦਮ ਸੰਭਾਵਤ ਤੌਰ ਉੱਤੇ ਪਰਮਾਣੂ ਯੁੱਧ ਸੀ।
ਟਰੰਪ ਨੇ ਇਕ ਇੰਟਰਵਿਊ ਵਿਚ ਕਿਹਾ, "ਇਹ ਮੇਰੀ ਇੰਨੀ ਵੱਡੀ ਸਫ਼ਲਤਾ ਹੈ ਜਿਸ ਦਾ ਮੈਨੂੰ ਕਦੇ ਵੀ ਸਿਹਰਾ ਨਹੀਂ ਮਿਲੇਗਾ। ਉਹ ਵੱਡੀਆਂ ਪਰਮਾਣੂ ਸ਼ਕਤੀਆਂ ਹਨ। ਉਨ੍ਹਾਂ ਵਿਚਕਾਰ ਕੋਈ ਸਮਾਨਤਾ ਨਹੀਂ ਹੈ। ਉਹ ਗੁੱਸੇ ਵਿੱਚ ਸਨ।
ਇੰਟਰਵਿਊ ਦੌਰਾਨ, ਟਰੰਪ ਤੋਂ ਪੱਛਮੀ ਏਸ਼ੀਆਂ ਦੀ ਉਨ੍ਹਾਂ ਦੀ ਫੇਰੀ ਤੋਂ ਪਹਿਲਾਂ "ਕੁਝ ਵਿਦੇਸ਼ ਨੀਤੀ ਦੀਆਂ ਸਫ਼ਲਤਾਵਾਂ" ਦਾ ਹਵਾਲਾ ਦਿੰਦੇ ਹੋਏ ਪੁੱਛਿਆ ਗਿਆ ਕਿ ਉਨ੍ਹਾਂ ਨੇ ਭਾਰਤ ਅਤੇ ਪਾਕਿਸਤਾਨ ਨੂੰ ਫ਼ੋਨ ਕੀਤਾ ਸੀ। ਟਰੰਪ ਨੇ ਜਵਾਬ ਦਿੱਤਾ, "ਹਾਂ, ਮੈਂ ਕੀਤਾ।"
ਟਰੰਪ ਨੇ ਕਿਹਾ, "ਕੀ ਤੁਸੀਂ ਦੇਖਿਆ ਕਿ ਇਹ (ਟਕਰਾਅ) ਕਿੱਥੇ ਜਾ ਰਿਹਾ ਸੀ? ਇਹ ਇੱਕ ਤੋਂ ਬਾਅਦ ਇੱਕ ਸੀ। ਇਹ ਹੋਰ ਵੀ ਵਿਗੜਦਾ ਜਾ ਰਿਹਾ ਸੀ। ਮੇਰਾ ਮਤਲਬ ਹੈ ਕਿ ਮਿਜ਼ਾਈਲਾਂ ਦੀ ਵਰਤੋਂ ਵੱਧ ਤੋਂ ਵੱਧ ਹੋ ਰਹੀ ਸੀ। ਦੋਵੇਂ ਮਜ਼ਬੂਤ ਹਨ। ਇਸ ਲਈ ਅਗਲਾ ਕਦਮ ਜਿਸ 'ਤੇ ਇਹ ਪਹੁੰਚਣ ਵਾਲਾ ਸੀ, ਤੁਸੀਂ ਜਾਣਦੇ ਹੋ ਕਿ ਇਹ ਕੀ ਸੀ? 'N'।"
ਇੰਟਰਵਿਊ ਲੈਣ ਵਾਲੇ ਨੇ ਪੁੱਛਿਆ ਕਿ ਕੀ 'N' ਸ਼ਬਦ ਦਾ ਅਰਥ 'ਪ੍ਰਮਾਣੂ' ਹੈ?
ਟਰੰਪ ਨੇ ਕਿਹਾ, "ਇਹ 'N' ਸ਼ਬਦ ਹੈ। ਇਹ ਬਹੁਤ ਬੁਰਾ ਸ਼ਬਦ ਹੈ, ਹੈ ਨਾ? ਕਈ ਤਰੀਕਿਆਂ ਨਾਲ। N ਸ਼ਬਦ, ਜੋ ਕਿ ਪ੍ਰਮਾਣੂ ਅਰਥਾਂ ਵਿੱਚ ਵਰਤਿਆ ਜਾਣ ਵਾਲਾ ਸ਼ਬਦ ਸਭ ਤੋਂ ਬੁਰਾ ਹੋ ਸਕਦਾ ਹੈ। ਮੈਨੂੰ ਲੱਗਦਾ ਹੈ ਕਿ ਉਹ ਬਹੁਤ ਕਰੀਬ ਸਨ। ਨਫ਼ਰਤ ਬਹੁਤ ਜ਼ਿਆਦਾ ਸੀ। ਮੈਂ ਕਿਹਾ, 'ਅਸੀਂ ਵਪਾਰ ਬਾਰੇ ਗੱਲ ਕਰਾਂਗੇ। ਅਸੀਂ ਬਹੁਤ ਜ਼ਿਆਦਾ ਵਪਾਰ ਕਰਨ ਜਾ ਰਹੇ ਹਾਂ।’
ਟਰੰਪ ਨੇ ਕਿਹਾ, "ਮੈਂ ਵਪਾਰ ਦੀ ਵਰਤੋਂ ਬਦਲੇ ਤੈਅ ਕਰਨ ਅਤੇ ਸ਼ਾਂਤੀ ਬਣਾਉਣ ਲਈ ਕਰ ਰਿਹਾ ਹਾਂ।"
ਟਰੰਪ ਨੇ ਕਿਹਾ, "ਭਾਰਤ... ਦੁਨੀਆਂ ਦੇ ਸਭ ਤੋਂ ਜ਼ਿਆਦਾ ਟੈਰਿਫ਼ ਲਗਾਉਣ ਵਾਲਿਆਂ ਵਿੱਚੋਂ ਇੱਕ ਹੈ, ਉਹ ਵਪਾਰ ਨੂੰ ਲਗਭਗ ਅਸੰਭਵ ਬਣਾਉਂਦੇ ਹਨ। ਕੀ ਤੁਸੀਂ ਜਾਣਦੇ ਹੋ ਕਿ ਉਹ ਸੰਯੁਕਤ ਰਾਜ ਅਮਰੀਕਾ ਲਈ ਆਪਣੇ ਟੈਰਿਫਾਂ ਵਿੱਚ 100 ਪ੍ਰਤੀਸ਼ਤ ਕਟੌਤੀ ਕਰਨ ਲਈ ਤਿਆਰ ਹੈ?।”
ਇਸ ਮੁੱਦੇ 'ਤੇ ਭਾਰਤ ਵੱਲੋਂ ਕੋਈ ਪ੍ਰਤੀਕਿਰਿਆ ਨਹੀਂ ਆਈ ਹੈ।
ਜਦੋਂ ਟਰੰਪ ਤੋਂ ਪੁੱਛਿਆ ਗਿਆ ਕਿ ਕੀ ਭਾਰਤ ਨਾਲ ਕੋਈ ਸੌਦਾ ਜਲਦੀ ਹੋਣ ਵਾਲਾ ਹੈ, ਤਾਂ ਉਨ੍ਹਾਂ ਕਿਹਾ, "ਹਾਂ, ਇਹ ਜਲਦੀ ਹੀ ਹੋਵੇਗਾ। ਮੈਨੂੰ ਕੋਈ ਜਲਦੀ ਨਹੀਂ ਹੈ। ਦੇਖੋ, ਹਰ ਕੋਈ ਸਾਡੇ ਨਾਲ ਸੌਦਾ ਕਰਨਾ ਚਾਹੁੰਦਾ ਹੈ।"
ਟਰੰਪ ਨੇ ਕਿਹਾ, "ਦੱਖਣੀ ਕੋਰੀਆ ਇੱਕ ਸੌਦਾ ਕਰਨਾ ਚਾਹੁੰਦਾ ਹੈ... ਪਰ ਮੈਂ ਹਰ ਕਿਸੇ ਨਾਲ ਸੌਦੇ ਨਹੀਂ ਕਰਨਾ ਚਾਹੁੰਦਾ। ਮੈਂ ਸਿਰਫ਼ ਸੀਮਾਵਾਂ ਤੈਅ ਕਰਨ ਜਾ ਰਿਹਾ ਹਾਂ। ਮੈਂ ਕੁਝ ਹੋਰ ਸੌਦੇ ਕਰਾਂਗਾ। 150 ਦੇਸ਼ ਹਨ ਜੋ ਸੌਦੇ ਕਰਨਾ ਚਾਹੁੰਦੇ ਹਨ।"
ਪਿਛਲੇ ਕੁਝ ਦਿਨਾਂ ਵਿੱਚ ਇਹ ਸੱਤਵਾਂ ਮੌਕਾ ਹੈ ਜਦੋਂ ਟਰੰਪ ਨੇ ਦਾਅਵਾ ਕੀਤਾ ਹੈ ਕਿ ਉਨ੍ਹਾਂ ਨੇ ਭਾਰਤ ਅਤੇ ਪਾਕਿਸਤਾਨ ਵਿਚਕਾਰ ਤਣਾਅ ਨੂੰ ਖ਼ਤਮ ਕਰਨ ਵਿੱਚ ਮਦਦ ਕੀਤੀ ਹੈ।
ਭਾਰਤ ਨੇ 22 ਅਪ੍ਰੈਲ ਨੂੰ ਪਹਿਲਗਾਮ ਵਿੱਚ ਹੋਏ ਅਤਿਵਾਦੀ ਹਮਲੇ ਦੇ ਜਵਾਬ ਵਿੱਚ 7 ਮਈ ਦੀ ਸਵੇਰ ਨੂੰ 'ਆਪ੍ਰੇਸ਼ਨ ਸਿੰਦੂਰ' ਤਹਿਤ ਅਤਿਵਾਦੀ ਟਿਕਾਣਿਆਂ 'ਤੇ ਹਮਲੇ ਕੀਤੇ ਸਨ। ਪਹਿਲਗਾਮ ਅਤਿਵਾਦੀ ਹਮਲੇ ਵਿੱਚ 26 ਲੋਕ ਮਾਰੇ ਗਏ ਸਨ।
ਭਾਰਤ ਦੀ ਕਾਰਵਾਈ ਤੋਂ ਬਾਅਦ, ਪਾਕਿਸਤਾਨ ਨੇ 8, 9 ਅਤੇ 10 ਮਈ ਨੂੰ ਭਾਰਤੀ ਫ਼ੌਜੀ ਠਿਕਾਣਿਆਂ 'ਤੇ ਹਮਲਾ ਕਰਨ ਦੀ ਕੋਸ਼ਿਸ਼ ਕੀਤੀ। ਇਸ ਤੋਂ ਬਾਅਦ ਭਾਰਤੀ ਫੌਜ ਨੇ ਕਈ ਪਾਕਿਸਤਾਨੀ ਫੌਜੀ ਟਿਕਾਣਿਆਂ 'ਤੇ ਭਿਆਨਕ ਜਵਾਬੀ ਹਮਲਾ ਕੀਤਾ।
ਚਾਰ ਦਿਨਾਂ ਤੱਕ ਸਰਹੱਦ ਪਾਰ ਡਰੋਨ ਅਤੇ ਮਿਜ਼ਾਈਲ ਹਮਲਿਆਂ ਤੋਂ ਬਾਅਦ, 10 ਮਈ ਨੂੰ ਭਾਰਤ ਅਤੇ ਪਾਕਿਸਤਾਨ ਵਿਚਕਾਰ ਫੌਜੀ ਟਕਰਾਅ ਨੂੰ ਖ਼ਤਮ ਕਰਨ ਲਈ ਇੱਕ ਸਮਝੌਤਾ ਹੋਇਆ ਸੀ।
ਟਰੰਪ ਨੇ 10 ਮਈ ਨੂੰ ਐਲਾਨ ਕੀਤਾ ਸੀ ਕਿ ਭਾਰਤ ਅਤੇ ਪਾਕਿਸਤਾਨ ਅਮਰੀਕਾ ਦੀ ਵਿਚੋਲਗੀ ਵਿੱਚ "ਲੰਬੀ ਗੱਲਬਾਤ" ਤੋਂ ਬਾਅਦ "ਪੂਰੀ ਅਤੇ ਤੁਰੰਤ ਜੰਗਬੰਦੀ" ਲਈ ਸਹਿਮਤ ਹੋ ਗਏ ਹਨ।
