ਪਾਕਿਸਤਾਨ ਤੇ ਇਤਾਲਵੀ ਪੁਰਾਤੱਤਵ ਮਾਹਰਾਂ ਨੂੰ ਬਾਰੀਕੋਟ ਘੁੰਡਈ ਵਿਚ ਖੁਦਾਈ ਦੌਰਾਨ ਮਿਲਿਆ ਮੰਦਰ
ਪੇਸ਼ਾਵਰ : ਉਤਰੀ-ਪਛਮੀ ਪਾਕਿਸਤਾਨ ਦੇ ਸਵਾਤ ਜ਼ਿਲ੍ਹੇ ਦੇ ਇਕ ਪਹਾੜ ਵਿਚੋਂ ਪਾਕਿਸਤਾਨ ਤੇ ਇਤਾਲਵੀ ਪੁਰਾਤੱਤਵ ਮਾਹਰਾਂ ਨੇ 1300 ਸਾਲ ਪੁਰਾਣਾ ਇਕ ਹਿੰਦੂ ਮੰਦਰ ਲੱਭਿਆ ਹੈ। ਬਾਰੀਕੋਟ ਘੁੰਡਈ ਵਿਚ ਖੁਦਾਈ ਦੌਰਾਨ ਇਸ ਮੰਦਰ ਦਾ ਪਤਾ ਲੱਗਾ। ਖੈਬਰ ਪਖ਼ਤੂਨਖਵਾ ਦੇ ਪੁਰਾਤੱਤਵ ਵਿਭਾਗ ਦੇ ਫਜਲੇ ਖਲੀਕ ਨੇ ਵੀਰਵਾਰ ਨੂੰ ਇਸ ਦੀ ਘੋਸ਼ਣਾ ਕਰਦੇ ਹੋਏ ਕਿਹਾ ਕਿ ਇਹ ਮੰਦਰ ਭਗਵਾਨ ਵਿਸ਼ਣੂ ਜੀ ਦਾ ਹੈ।
Hindu temple
ਉਨ੍ਹਾਂ ਕਿਹਾ ਕਿ ਇਸ ਮੰਦਰ ਨੂੰ 1300 ਸਾਲ ਪਹਿਲਾਂ ਹਿੰਦੂ ਸ਼ਾਹੀ ਕਾਲ ਦੌਰਾਨ ਬਣਾਇਆ ਗਿਆ ਸੀ। ਹਿੰਦੂ ਸ਼ਾਹੀ ਜਾਂ ਕਾਬੁਲ ਸ਼ਾਹੀ (850-1026ਈ.) ਦਾ ਹਿੰਦੂ ਰਾਜਵੰਸ਼ ਸੀ, ਜਿਸ ਨੇ ਕਾਬੁਲ ਘਾਟੀ (ਪੂਰਬੀ ਅਫਗਾਨਿਸਤਾਨ), ਗੰਧਾਰ( ਆਧੁਨਿਕ ਪਾਕਿਸਤਾਨ) ਅਤੇ ਵਰਤਮਾਨ ਉਤਰੀ-ਪਛਮੀ ਭਾਰਤ ਵਿਚ ਸ਼ਾਸਨ ਕੀਤਾ ਸੀ।
Hindu temple
ਪੁਰਾਤੱਤਵ ਮਾਹਰਾਂ ਨੂੰ ਖੁਦਾਈ ਦੌਰਾਨ ਮੰਦਰ ਨੇੜੇ ਛਾਉਣੀ ਅਤੇ ਪਹਿਰੇ ਲਈ ਬਣੀਆਂ ਕੰਧਾਂ ਵੀ ਮਿਲੀਆਂ ਹਨ। ਮੰਦਰ ਕੋਲ ਪਾਣੀ ਦਾ ਇਕ ਕੁੰਡ ਵੀ ਮਿਲਿਆ ਹੈ। ਖਲੀਕ ਨੇ ਕਿਹਾ ਕਿ ਇਲਾਕੇ ਵਿਚ ਪਹਿਲੀ ਵਾਰ ਹਿੰਦੂ ਸ਼ਾਹੀ ਕਾਲ ਦੇ ਨਿਸ਼ਾਨ ਮਿਲੇ ਹਨ। ਇਟਲੀ ਦੇ ਪੁਰਾਤੱਤਵ ਮਿਸ਼ਨ ਦੇ ਮੁਖੀ ਡਾ. ਲੁਕਾ ਨੇ ਕਿਹਾ ਕਿ ਸਵਾਤ ਜ਼ਿਲ੍ਹੇ ’ਚ ਮਿਲਿਆ ਗੰਧਾਰ ਸੱਭਿਅਤਾ ਦਾ ਇਹ ਪਹਿਲਾ ਮੰਦਰ ਹੈ। ਇਥੇ ਬੁੱਧ ਧਰਮ ਦੇ ਵੀ ਕਈ ਪੂਜਾ ਅਸਾਥਾਨ ਹਨ।
