ਰੂਸ ਦੀ ਰਾਜਧਾਨੀ ਸਮੇਤ 53 ਸ਼ਹਿਰਾਂ 'ਚ ਜੰਗ ਖਿਲਾਫ਼ ਵੱਡੇ ਪੱਧਰ 'ਤੇ ਪ੍ਰਦਰਸ਼ਨ ਹੋ ਰਹੇ ਹਨ। ਪੁਲਿਸ ਹੁਣ ਤੱਕ 1700 ਪ੍ਰਦਰਸ਼ਨਕਾਰੀਆਂ ਨੂੰ ਗ੍ਰਿਫ਼ਤਾਰ ਕਰ ਚੁੱਕੀ ਹੈ
ਮਾਸਕੋ: ਯੂਕਰੇਨ 'ਤੇ ਹਮਲੇ ਦੇ ਵਲਾਦੀਮੀਰ ਪੁਤਿਨ ਦੇ ਫੈਸਲੇ ਖਿਲਾਫ਼ ਰੂਸ 'ਚ ਵਿਰੋਧ ਪ੍ਰਦਰਸ਼ਨ ਸ਼ੁਰੂ ਹੋ ਗਏ ਹਨ। ਰੂਸ ਦੀ ਰਾਜਧਾਨੀ ਮਾਸਕੋ ਸਮੇਤ 53 ਸ਼ਹਿਰਾਂ 'ਚ ਜੰਗ ਖਿਲਾਫ਼ ਵੱਡੇ ਪੱਧਰ 'ਤੇ ਪ੍ਰਦਰਸ਼ਨ ਹੋ ਰਹੇ ਹਨ। ਰੂਸੀ ਪੁਲਿਸ ਹੁਣ ਤੱਕ 1700 ਪ੍ਰਦਰਸ਼ਨਕਾਰੀਆਂ ਨੂੰ ਗ੍ਰਿਫ਼ਤਾਰ ਕਰ ਚੁੱਕੀ ਹੈ ਪਰ ਇਸ ਤੋਂ ਬਾਅਦ ਵੀ ਪ੍ਰਦਰਸ਼ਨ ਰੁਕਣ ਦਾ ਨਾਮ ਨਹੀਂ ਲੈ ਰਹੇ।
Anti-War Protests Across Russia
ਵਿਰੋਧ ਪ੍ਰਦਰਸ਼ਨ ਕਰਨ ਵਾਲੇ ਬਹੁਤ ਸਾਰੇ ਲੋਕ ਉਹ ਹਨ ਜਿਨ੍ਹਾਂ ਦੇ ਪਰਿਵਾਰ ਜਾਂ ਰਿਸ਼ਤੇਦਾਰ ਯੂਕਰੇਨ ਵਿਚ ਫਸੇ ਹੋਏ ਹਨ। ਇਹ ਲੋਕ ਜੰਗ ਦਾ ਵਿਰੋਧ ਕਰ ਰਹੇ ਹਨ ਅਤੇ ਗੱਲਬਾਤ ਰਾਹੀਂ ਮਸਲੇ ਨੂੰ ਹੱਲ ਕਰਨ ਦੀ ਮੰਗ ਕਰ ਰਹੇ ਹਨ। ਸਮਾਚਾਰ ਏਜੰਸੀ ਮੁਤਾਬਕ ਵੀਰਵਾਰ ਨੂੰ ਮਾਸਕੋ ਦੇ ਪੁਸ਼ਕਿਨ ਸਕੁਆਇਰ 'ਤੇ ਹਜ਼ਾਰਾਂ ਲੋਕ ਇਕੱਠੇ ਹੋਏ। ਉਹਨਾਂ ਦੇ ਹੱਥਾਂ ਵਿਚ ‘ਨੋ ਟੂ ਵਾਰ’ ਦੇ ਨਾਅਰੇ ਵਾਲੇ ਬੈਨਰ ਅਤੇ ਪੋਸਟਰ ਸਨ। ਲੰਬੇ ਵਿਰੋਧ ਤੋਂ ਬਾਅਦ ਰੂਸੀ ਪੁਲਿਸ ਪਹੁੰਚੀ ਅਤੇ ਇੱਥੋਂ 900 ਲੋਕਾਂ ਨੂੰ ਗ੍ਰਿਫਤਾਰ ਕਰ ਲਿਆ।
Anti-War Protests Across Russia
ਅਜਿਹਾ ਹੀ ਰੂਸ ਦੇ ਸੇਂਟ ਪੀਟਰਸਬਰਗ ਸ਼ਹਿਰ 'ਚ ਵੀ ਦੇਖਣ ਨੂੰ ਮਿਲਿਆ। ਇੱਥੇ ਵੀ 1000 ਦੇ ਕਰੀਬ ਲੋਕ ਸੜਕਾਂ 'ਤੇ ਆ ਕੇ ਜੰਗ ਦਾ ਵਿਰੋਧ ਕਰ ਰਹੇ ਸਨ। ਰੂਸੀ ਪੁਲਿਸ ਨੇ ਇੱਥੋਂ ਕਰੀਬ 400 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਸ ਤੋਂ ਇਲਾਵਾ ਰੂਸ ਦੇ 51 ਹੋਰ ਸ਼ਹਿਰਾਂ ਤੋਂ 400 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਰੂਸੀ ਸੰਸਦ ਦੇ ਬਾਹਰ ਵੀ ਵੱਡੀ ਗਿਣਤੀ 'ਚ ਪ੍ਰਦਰਸ਼ਨਕਾਰੀ ਇਕੱਠੇ ਹੋਏ ਸਨ।
Anti-War Protests Across Russia
ਮਾਸਕੋ 'ਚ ਪ੍ਰਦਰਸ਼ਨ ਕਰ ਰਹੀ 23 ਸਾਲਾ ਲੜਕੀ ਅਨਾਸਤਾਸੀਆ ਨੇਸਤੁਲਿਆ ਨੇ ਦੱਸਿਆ ਕਿ ਉਸ ਦੇ ਕਈ ਰਿਸ਼ਤੇਦਾਰ ਇਸ ਸਮੇਂ ਯੂਕਰੇਨ 'ਚ ਹਨ। ਉਹਨਾਂ ਨੂੰ ਆਪਣੇ ਰਿਸ਼ਤੇਦਾਰਾਂ ਦੀ ਚਿੰਤਾ ਹੈ। ਉਹਨਾਂ ਕਿਹਾ ਕਿ ਜਦੋਂ ਆਪਣੇ ਰਿਸ਼ਤੇਦਾਰਾਂ ਨਾਲ ਫ਼ੋਨ 'ਤੇ ਗੱਲ ਕੀਤੀ ਤਾਂ ਮੈਨੂੰ ਸਮਝ ਨਹੀਂ ਆ ਰਿਹਾ ਕਿ ਉਹਨਾਂ ਨੂੰ ਕੀ ਕਹਾਂ | ਸੇਂਟ ਪੀਟਰਸਬਰਗ 'ਚ ਪ੍ਰਦਰਸ਼ਨ ਕਰ ਰਹੀ 27 ਸਾਲਾ ਸਵੇਤਲਾਨਾ ਵੋਲਕੋਵਾਸ ਨੇ ਕਿਹਾ ਕਿ ਉਸ ਨੂੰ ਲੱਗਦਾ ਹੈ ਜਿਵੇਂ ਰੂਸੀ ਪ੍ਰਸ਼ਾਸਨ ਪਾਗਲਪਨ ਦਾ ਸ਼ਿਕਾਰ ਹੋ ਗਿਆ ਹੋਵੇ। ਲੋਕਾਂ ਨੂੰ ਵਿਰੋਧ ਪ੍ਰਦਰਸ਼ਨ ਕਰਨ ਦੀ ਆਜ਼ਾਦੀ ਦਿੱਤੀ ਜਾਵੇ।
