ਲੰਡਨ ਦੇ ਬੋਨਹੈਮਜ਼ ਨਿਲਾਮੀ ਘਰ 'ਚ 1,75,000 ਪੌਂਡ ਦੀਆਂ ਵਿਕੀਆਂ ਵਾਲੀਆਂ
ਲੰਡਨ— ਮਹਾਰਾਣੀ ਜਿੰਦ ਕੌਰ ਦੀਆਂ ਵਾਲੀਆਂ ਇੰਗਲੈਂਡ ਦੀ ਰਾਜਧਾਨੀ ਲੰਡਨ ਦੇ ਬੋਨਹੈਮਜ਼ ਨਿਲਾਮੀ ਘਰ 'ਚ 1,75,000 ਪੌਂਡ ਦੀਆਂ ਵਿਕੀਆਂ ਹਨ। ਮਹਾਰਾਣੀ ਦੇ ਕੰਨਾਂ ਦੀਆਂ ਵਾਲੀਆਂ ਜਿਨ੍ਹਾਂ ਦਾ ਅੰਦਾਜ਼ਨ ਮੁੱਲ 20 ਤੋਂ 30 ਹਜ਼ਾਰ ਪੌਂਡ ਤੱਕ ਹੋਣ ਦੀ ਸੰਭਾਵਨਾ ਸੀ। ਜ਼ਿਕਰਯੋਗ ਹੈ ਕਿ ਮਹਾਰਾਜਾ ਰਣਜੀਤ ਸਿੰਘ ਦੀ ਮੌਤ ਸੰਨ 1836 ਵਿਚ ਹੋਣ ਤੋਂ ਬਾਅਦ ਪੰਜਾਬ ਦਾ ਰਾਜ ਕੁਝ ਚਿਰ ਮਹਾਰਾਣੀ ਜਿੰਦ ਕੌਰ ਨੇ ਵੀ ਸੰਭਾਲਿਆ। 1843 'ਚ ਉਸ ਦੇ ਪੰਜ ਸਾਲ ਦੇ ਪੁੱਤਰ ਦਲੀਪ ਸਿੰਘ ਨੂੰ ਪੰਜਾਬ ਦਾ ਮਹਾਰਾਜਾ ਘੋਸ਼ਿਤ ਕਰ ਦਿੱਤਾ ਗਿਆ ਸੀ ਤੇ ਮਹਾਰਾਣੀ ਜਿੰਦ ਕੌਰ ਨੂੰ ਰਾਜ ਪ੍ਰਬੰਧ ਚਲਾਉਣ ਦਾ ਅਧਿਕਾਰ ਦਿੱਤਾ ਸੀ। ਬਾਅਦ 'ਚ 1849 ਵਿਚ ਅੰਗਰੇਜ਼ਾਂ ਨੇ ਪੰਜਾਬ ਨੂੰ ਬ੍ਰਿਟਿਸ਼ ਰਾਜ ਵਿਚ ਮਿਲਾ ਲਿਆ ਤੇ ਉਸ ਦੀ ਨਿੱਜੀ ਜਾਇਦਾਦ ਜ਼ਬਤ ਕਰ ਲਈ। ਹੌਲੀ-ਹੌਲੀ ਬਰਤਾਨਵੀ ਫ਼ੌਜ ਨੇ ਲੁੱਟਿਆ ਸਰਕਾਰੀ ਖ਼ਜ਼ਾਨਾ ਜਿਸ ਵਿਚ ਕੋਹੇਨੂਰ ਤੇ ਤਾਮੂਰ ਰੂਬੀ ਆਦਿ ਨੂੰ ਮਹਾਰਾਣੀ ਵਿਕਟੋਰੀਆ ਲਈ ਤੋਹਫ਼ੇ ਵਜੋਂ ਲੰਡਨ ਭੇਜ ਦਿੱਤਾ ਗਿਆ।
1863 'ਚ ਮਹਾਰਾਣੀ ਜਿੰਦ ਦੀ ਬਰਤਾਨੀਆ 'ਚ ਮੌਤ ਹੋਈ। ਇਸਲਾਮਕ ਤੇ ਭਾਰਤੀ ਵਿਭਾਗ ਦੇ ਬੌਨਹੈਮ ਦੇ ਮੁਖੀ ਓਲੀਵਰ ਵਾਈਟ ਨੇ ਕਿਹਾ ਕਿ ਇਹ ਸੋਨੇ ਦੀਆਂ ਵਾਲੀਆਂ ਉਸ ਮਹਾਨ ਔਰਤ ਦੀਆਂ ਹਨ, ਜਿਸ ਨੇ ਆਪਣਾ ਰਾਜ ਭਾਗ ਗਵਾ ਕੇ ਵੀ ਹਿੰਮਤ ਨਹੀਂ ਹਾਰੀ। ਮਹਾਰਾਣੀ ਦੀਆਂ ਇਹ ਵਾਲੀਆਂ ਦੀ ਬੋਲੀ ਟੈਲੀਫ਼ੋਨ ਰਾਹੀਂ ਕਰਵਾਈ ਗਈ ਅਤੇ ਖ੍ਰੀਦਣ ਵਾਲੇ ਗਾਹਕ ਦੀ ਪਹਿਚਾਣ ਅਜੇ ਤੱਕ ਨਹੀਂ ਹੋ ਸਕੀ।