ਪਾਕਿਸਤਾਨ : ਬਿਲਾਵਲ ਭੁੱਟੋ ਕੋਰੋਨਾ ਵਾਇਰਸ ਨਾਲ ਪੀੜਤ
ਇਸਲਾਮਾਬਾਦ, 26 ਨਵੰਬਰ : ਪਾਕਿਸਤਾਨ ਵਿਚ ਵਿਰੋਧੀ ਪਾਰਟੀ ਪਾਕਿਸਤਾਨ ਪੀਪਲਜ਼ ਪਾਰਟੀ (ਪੀ.ਪੀ.ਪੀ.) ਦੇ ਪ੍ਰਮੁੱਖ ਬਿਲਾਵਲ ਭੁੱਟੋ ਜ਼ਰਦਾਰੀ ਕੋਰੋਨਾ ਵਾਇਰਸ ਨਾਲ ਪੀੜਤ ਪਾਏ ਗਏ ਹਨ। ਪੀ.ਪੀ.ਪੀ. ਦੇ 32 ਸਾਲਾ ਪ੍ਰਧਾਨ ਅਤੇ ਦੇਸ਼ ਦੀ ਦੋ ਵਾਰ ਪ੍ਰਧਾਨ ਮੰਤਰੀ ਰਹੀ ਬੇਨਜ਼ੀਰ ਭੁੱਟੋ ਦੇ ਬੇਟੇ ਬਿਲਾਵਲ ਭੁੱਟੋ ਨੇ ਵੀਰਵਾਰ ਨੂੰ ਕਿਹਾ ਕਿ ਉਹਨਾਂ ਦੇ ਲਾਗ ਨਾਲ ਪੀੜਤ ਹੋਣ ਦੀ ਪੁਸ਼ਟੀ ਹੋਣ ਦੇ ਬਾਅਦ ਤੋਂ ਉਹ ਇਕਾਂਤਵਾਸ ਵਿਚ ਰਹਿ ਰਹੇ ਹਨ।
ਬਿਲਾਵਲ ਨੇ ਟਵੀਟ ਕੀਤਾ,''ਮੈਂ ਕੋਵਿਡ-19 ਨਾਲ ਪੀੜਤ ਪਾਇਆ ਗਿਆ ਹਾਂ ਅਤੇ ਸਵੈ ਇਕਾਂਤਵਾਸ ਵਿਚ ਹਾਂ। ਮੇਰੇ ਵਿਚ ਬੀਮਾਰੀ ਦੇ ਮਾਮੂਲੀ ਲੱਛਣ ਹਨ। ਮੈਂ ਘਰੋਂ ਕੰਮ ਕਰਨਾ ਜਾਰੀ ਰਖਾਂਗਾ ਅਤੇ ਵੀਡੀਉ ਲਿੰਕ ਦੇ ਮਾਧਿਅਮ ਨਾਲ ਪੀ.ਪੀ.ਪੀ. ਸਥਾਪਨਾ ਦਿਵਸ ਦੇ ਪ੍ਰੋਗਰਾਮ ਨੂੰ ਸੰਬੋਧਿਤ ਕਰਾਂਗਾ।'' ਉਹਨਾਂ ਦੇ ਰਾਜਨੀਤਕ ਸਕੱਤਰ ਜਮੀਲ ਸੂਮਰੋ ਦੇ ਪੀੜਤ ਪਾਏ ਜਾਣ ਦੇ ਬਾਅਦ, ਉਹਨਾਂ ਨੂੰ ਬੁਧਵਾਰ ਨੂੰ ਖੁਦ ਨੂੰ ਰਾਜਨੀਤਕ ਗਤੀਵਿਧੀਆਂ ਤੋਂ ਦੂਰ ਰਖਣ ਦਾ ਫ਼ੈਸਲਾ ਲਿਆ ਸੀ।ਇਸ ਦੌਰਾਨ ਪਾਕਿਸਤਾਨ ਵਿਚ ਬੀਤੇ 24 ਘੰਟਿਆਂ ਵਿਚ ਕੋਰੋਨਾ ਵਾਇਰਸ ਦੇ 3,306 ਨਵੇਂ ਮਰੀਜ਼ਾਂ ਦੀ ਪੁਸ਼ਟੀ ਹੋਈ ਹੈ, ਜਿਸ ਦੇ ਬਾਅਦ ਵੀਰਵਾਰ ਨੂੰ ਕੁੱਲ ਮਾਮਲੇ ਵੱਧ ਕੇ 3,86,198 ਪਹੁੰਚ ਗਏ।
image
ਸਿਹਤ ਮੰਤਰਾਲੇ ਨੇ ਦਸਿਆ ਕਿ ਬੀਮਾਰੀ ਦੇ ਕਾਰਨ 40 ਹੋਰ ਲੋਕਾਂ ਨੇ ਦਮ ਤੋੜ ਦਿਤਾ, ਜਿਸ ਨਾਲ ਮ੍ਰਿਤਕਾਂ ਦੀ ਗਿਣਤੀ 7,843 ਪਹੁੰਚ ਗਈ। ਮੰਤਰਾਲੇ ਨੇ ਦਸਿਆ ਕਿ ਦੇਸ਼ ਵਿਚ ਲਾਗ ਦਾ ਇਲਾਜ ਕਰਾ ਰਹੇ ਮਰੀਜ਼ਾਂ ਦੀ ਗਿਣਤੀ 43,963 ਹੈ।
(ਪੀਟੀਆਈ)
