ਸੀਰੀਆਈ ਫ਼ੌਜ ਨੇ ਦੇਸ਼ 'ਚ ਇਸਲਾਮਿਕ ਸਟੇਟ ਦਾ ਗੜ੍ਹ ਕਹਾਉਣ ਵਾਲੇ ਹੋਮਜ਼ ਸੂਬੇ 'ਤੇ ਕਬਜ਼ਾ ਕਰ ਕੇ ਦੇਸ਼ ਦੇ ਪੂਰਬੀ ਹਿੱਸੇ 'ਚ ਜ਼ਿਹਾਦਿਆਂ 'ਤੇ ਹਮਲਾ ਕਰਨ ਦਾ ਰਸਤਾ ਸਾਫ਼ ਕਰ..
ਬੇਰੂਤ, 6 ਅਗੱਸਤ : ਸੀਰੀਆਈ ਫ਼ੌਜ ਨੇ ਦੇਸ਼ 'ਚ ਇਸਲਾਮਿਕ ਸਟੇਟ ਦਾ ਗੜ੍ਹ ਕਹਾਉਣ ਵਾਲੇ ਹੋਮਜ਼ ਸੂਬੇ 'ਤੇ ਕਬਜ਼ਾ ਕਰ ਕੇ ਦੇਸ਼ ਦੇ ਪੂਰਬੀ ਹਿੱਸੇ 'ਚ ਜ਼ਿਹਾਦਿਆਂ 'ਤੇ ਹਮਲਾ ਕਰਨ ਦਾ ਰਸਤਾ ਸਾਫ਼ ਕਰ ਲਿਆ ਹੈ। ਸੀਰੀਆ ਦੇ ਪ੍ਰਸਿੱਧ ਪੁਰਾਣੇ ਸ਼ਹਿਰ ਪਾਲਮਾਇਰਾ ਤੋਂ 70 ਕਿਲੋਮੀਟਰ ਦੂਰ ਉੱਤਰ ਪੂਰਬ 'ਚ ਸਥਿਤ ਅਲ-ਸੁਖਨਾ 'ਤੇ ਸਾਲ 2015 ਦੀ ਸ਼ੁਰੂਆਤ ਤੋਂ ਹੀ ਆਈ.ਐਸ. ਦਾ ਕਬਜ਼ਾ ਸੀ।
ਬ੍ਰਿਟੇਨ ਦੀ ਨਿਗਰਾਨੀ ਸੰਸਥਾ ਦੀ ਸੀਰੀਅਨ ਆਬਜ਼ਰਵੇਟਰੀ ਫ਼ਾਰ ਹਿਊਮਨ ਰਾਈਟਸ ਨੇ ਦਸਿਆ ਕਿ ਸਰਕਾਰੀ ਫ਼ੌਜਾਂ ਨੇ ਸਰਕਾਰ ਦੇ ਸਹਿਯੋਗੀ ਰੂਸ ਦੇ ਹਵਾਈ ਹਮਲਿਆਂ ਅਤੇ ਭਾਰੀ ਗੋਲੀਬਾਰੀ ਤੋਂ ਬਾਅਦ ਸ਼ਹਿਰ 'ਤੇ ਕਬਜ਼ਾ ਕਰ ਲਿਆ। ਸੀਰੀਆ ਸਰਕਾਰ ਵਲੋਂ ਕਬਜ਼ੇ ਦੀ ਅਧਿਕਾਰਕ ਪੁਸ਼ਟੀ ਨਹੀਂ ਕੀਤੀ ਗਈ ਹੈ। ਅਲ-ਸੁਖਨਾ ਸ਼ਹਿਰ ਸਰਕਾਰ ਦੇ ਕਬਜ਼ੇ ਵਾਲੇ ਪੁਰਾਣੇ ਸ਼ਹਿਰ ਪਲਮਾਇਰਾ ਦੇ ਉੱਤਰੀ-ਪੂਰਬੀ ਇਲਾਕੇ 'ਚ ਸਥਿਤ ਹੈ। ਇਹ ਡੇਅਰ ਅਲ ਜ਼ੋਰ ਸੂਬੇ ਦੀ ਪ੍ਰਸ਼ਾਸਨਿਕ ਸਰਹੱਦ ਤੋਂ 50 ਕਿਲੋਮੀਟਰ ਦੂਰ ਸਥਿਤ ਹੈ। ਸੀਰੀਆ ਦੀ ਸਰਕਾਰੀ ਏਜੰਸੀ ਸਨਾ ਨੇ ਦਸਿਆ ਕਿ ਫ਼ੌਜ ਨੇ ਅਲ-ਸੁਖਨਾ ਸ਼ਹਿਰ ਨੂੰ ਪੂਰੀ ਤਰ੍ਹਾਂ ਨਾਲ ਘੇਰ ਲਿਆ ਹੈ। ਜ਼ਿਕਰਯੋਗ ਹੈ ਕਿ ਇਸ ਸਾਲ ਮਈ ਤੋਂ ਸੀਰੀਆਈ ਫ਼ੌਜ ਰੂਸ ਦੀ ਮਦਦ ਨਾਲ ਇਸਲਾਮਿਕ ਸਟੇਟ ਦੇ ਅਤਿਵਾਦੀਆਂ ਨੂੰ ਭਜਾਉਣ ਲਈ ਵੱਡੀ ਮੁਹਿੰਮ ਚਲਾ ਰਹੀ ਹੈ। ਇਰਾਕ 'ਚ ਅਪਣੇ ਗੜ੍ਹ ਮੋਸੁਲ 'ਚ ਹਾਰਨ ਤੋਂ ਬਾਅਦ ਇਸਲਾਮਿਕ ਸਟੇਟ ਸੀਰੀਆ 'ਚ ਕਈ ਹਮਲਿਆਂ ਦਾ ਸਾਹਮਣਾ ਕਰ ਰਿਹਾ ਹੈ। (ਪੀਟੀਆਈ)