ਬ੍ਰਿਟੇਨ ਅਤੇ ਦੁਨੀਆ ਭਰ ਵਿੱਚ ਡਾਇਨਾ ਦੇ ਪ੍ਰਸ਼ੰਸਕ ਉਸਦੀ 25ਵੀਂ ਬਰਸੀ 'ਤੇ ਉਸਨੂੰ ਕਰ ਰਹੇ ਹਨ ਯਾਦ
ਪੈਰਿਸ : ਕਾਰ ਹਾਦਸੇ ਵਿਚ ਰਾਜਕੁਮਾਰੀ ਡਾਇਨਾ ਦੀ ਮੌਤ ਦੇ 25 ਸਾਲ ਬਾਅਦ ਫਰਾਂਸੀਸੀ ਡਾਕਟਰ ਫਰੈਡਰਿਕ ਮੈਲੀਜ਼ ਨੂੰ ਜਦੋਂ ਇਹ ਘਟਨਾ ਯਾਦ ਆਉਂਦੀ ਹੈ ਤਾਂ ਉਹਨਾਂ ਨੂੰ ਲੱਗਦਾ ਹੈ ਕਿ ਉਹ ਡਾਇਨਾ ਨੂੰ ਬਚਾ ਸਕਦੇ ਸਨ। ਪੈਰਿਸ ਦੀ ਅਲਮਾ ਸੁਰੰਗ ਵਿੱਚ ਰਾਜਕੁਮਾਰੀ ਡਾਇਨਾ ਨਾਲ ਜਦੋਂ ਹਾਦਸਾ ਵਾਪਰਿਆ ਤਾਂ, ਉਸ ਸਮੇਂ ਉਹਨਾਂ ਦੇ ਆਖਰੀ ਪਲਾਂ ਵਿਚ ਉਹਨਾਂ ਨੂੰ ਜਿਉਂਦਾ ਵੇਖਣ ਵਾਲੇ ਲੋਕਾਂ ਵਿਚ ਮੈਲੀਜ ਵੀ ਸ਼ਾਮਲ ਸਨ।
Princess Diana
ਬ੍ਰਿਟੇਨ ਅਤੇ ਦੁਨੀਆ ਭਰ ਵਿੱਚ ਡਾਇਨਾ ਦੇ ਪ੍ਰਸ਼ੰਸਕ ਉਸਦੀ 25ਵੀਂ ਬਰਸੀ 'ਤੇ ਉਸਨੂੰ ਯਾਦ ਕਰ ਰਹੇ ਹਨ। ਇਸ ਮੌਕੇ ਮੈਲੀਜ਼ ਨੇ ਉਨ੍ਹਾਂ ਦੁੱਖ ਭਰੇ ਪਲਾਂ ਨੂੰ ਯਾਦ ਕੀਤਾ। ਮੈਲੀਜ਼ ਨੇ ਘਟਨਾ ਬਾਰੇ ਦੱਸਦਿਆਂ ਕਿਹਾ ਕਿ ਜਦੋਂ ਮੈਂ ਹਾਦਸਾਗ੍ਰਸਤ ਕਾਰ ਵੱਲ੍ਹ ਗਿਆ ਤਾਂ ਮੈਂ ਦਰਵਾਜ਼ਾ ਖੋਲ੍ਹ ਕੇ ਅੰਦਰ ਦੇਖਿਆ। ਚਾਰ ਜਣੇ ਸਨ, ਜਿਹਨਾਂ ਵਿੱਚੋਂ ਦੋ ਮਰੇ ਹੋਏ ਜਾਪਦੇ ਸਨ, ਅਤੇ ਕੋਈ ਹਿਲਜੁਲ ਨਹੀਂ ਹੋ ਰਹੀ ਸੀ ਅਤੇ ਉਹ ਸਾਹ ਵੀ ਨਹੀਂ ਲੈ ਰਹੇ ਸਨ। ਬਾਕੀ ਦੋ ਜਿਉਂਦੇ ਸਨ ਪਰ ਉਨ੍ਹਾਂ ਦੀ ਹਾਲਤ ਨਾਜ਼ੁਕ ਸੀ।
ਉਸ ਨੇ ਕਿਹਾ, ਜੋ ਕਾਰ ਦੇ ਅੱਗੇ ਵਿਅਕਤੀ ਬੈਠਾ ਸੀ ਉਹ ਚੀਕ ਰਿਹਾ ਸੀ। ਉਸ ਦੇ ਸਾਹ ਚੱਲ ਰਹੇ ਸਨ। ਇਸ ਦੇ ਨਾਲ ਹੀ ਕਾਰ 'ਚ ਇਕ ਔਰਤ ਸੀਟ ਦੇ ਹੇਠਾਂ ਗੋਡਿਆਂ ਭਾਰ ਸੀ ਅਤੇ ਉਸ ਦਾ ਸਿਰ ਹੇਠਾਂ ਸੀ। ਉਸ ਨੂੰ ਸਾਹ ਲੈਣ ਵਿੱਚ ਦਿੱਕਤ ਆ ਰਹੀ ਸੀ। ਉਸਨੂੰ ਤੁਰੰਤ ਮਦਦ ਦੀ ਲੋੜ ਸੀ। ਡਾਕਟਰ ਮੈਲੀਜ਼ ਆਪਣੀ ਕਾਰ ਵੱਲ੍ਹ ਭੱਜਿਆ ਤੇ ਐਮਰਜੈਂਸੀ ਸੇਵਾਵਾਂ ਲਈ ਫ਼ੋਨ ਵੀ ਕੀਤਾ।
ਡਾਕਟਰ ਮੈਲੀਜ਼ ਨੂੰ ਬਾਅਦ ਵਿਚ ਪਤਾ ਲੱਗਾ ਜਿਸ ਔਰਤ ਦਾ ਉਸ ਨੇ ਇਲਾਜ ਕਰਨ ਦੀ ਕੋਸ਼ਿਸ਼ ਕੀਤੀ, ਉਹ ਰਾਜਕੁਮਾਰੀ ਡਾਇਨਾ ਸੀ ਜੋ ਇੱਕ ਮਸ਼ਹੂਰ ਬ੍ਰਿਟਿਸ਼ ਹਸਤੀ ਸਨ, ਜਿਸ ਦੇ ਦੁਨੀਆ ਭਰ 'ਚ ਲੱਖਾਂ ਪ੍ਰਸ਼ੰਸਕ ਸਨ, ਅਤੇ ਜਿਸ ਦੀ ਉਸ ਹਾਦਸੇ 'ਚ ਮੌਤ ਹੋ ਗਈ ਸੀ।
ਮੈਲੀਜ਼ ਦੱਸਦੇ ਹਨ ਕਿ ਮੈਨੂੰ ਲੱਗਦਾ ਹੈ ਕਿ ਮੇਰਾ ਨਾਂ ਹਮੇਸ਼ਾ ਇਸ ਭਿਆਨਕ ਘਟਨਾ ਨਾਲ ਜੁੜਿਆ ਰਹੇਗਾ। ਮੈਂ ਉਸ ਦੇ ਆਖਰੀ ਪਲਾਂ ਲਈ ਆਪਣੇ ਆਪ ਨੂੰ ਥੋੜ੍ਹਾ ਜਿਹਾ ਜ਼ਿੰਮੇਵਾਰ ਸਮਝਦਾ ਹਾਂ।
