ਪੰਜ ਮਹੀਨਿਆਂ ਦੇ ਮਿਸ਼ਨ ਲਈ ਭੇਜੇ ਤਿੰਨ ਪੁਲਾੜ ਯਾਤਰੀ
ਬੀਜਿੰਗ : ਚੀਨ ਨੇ ਮੰਗਲਵਾਰ ਨੂੰ ਸ਼ੇਨਜ਼ੂ-16 ਮਨੁੱਖ ਵਾਲੇ ਪੁਲਾੜ ਯਾਨ ਨੂੰ ਸਫ਼ਲਤਾਪੂਰਵਕ ਲਾਂਚ ਕੀਤਾ ਅਤੇ ਇਕ ਨਾਗਰਿਕ ਸਮੇਤ ਤਿੰਨ ਪੁਲਾੜ ਯਾਤਰੀਆਂ ਨੂੰ ਪੰਜ ਮਹੀਨਿਆਂ ਦੇ ਮਿਸ਼ਨ ਲਈ ਅਪਣੇ ਪੁਲਾੜ ਸਟੇਸ਼ਨ 'ਤੇ ਭੇਜਿਆ।
'ਚਾਈਨਾ ਮੈਨਡ ਸਪੇਸ ਏਜੰਸੀ' (ਸੀ.ਐਮ.ਐਸ.ਏ.) ਦੇ ਅਨੁਸਾਰ, ਪੁਲਾੜ ਯਾਨ ਨੂੰ 'ਲੌਂਗ ਮਾਰਚ-2 ਐਫ਼ ਕੈਰੀਅਰ ਰਾਕੇਟ' ਰਾਹੀਂ ਉਤਰ-ਪਛਮੀ ਚੀਨ ਦੇ ਜਿਉਕੁਆਨ ਸੈਟੇਲਾਈਟ ਲਾਂਚ ਸੈਂਟਰ ਤੋਂ ਸਵੇਰੇ 9:31 ਵਜੇ (ਚੀਨ ਦੇ ਸਮੇਂ) 'ਤੇ ਲਾਂਚ ਕੀਤਾ ਗਿਆ ਸੀ।
ਸੀ.ਐਮ.ਐਸ.ਏ. ਦੇ ਅਨੁਸਾਰ, ਸ਼ੇਨਜ਼ੂ-16 ਰਾਕੇਟ ਤੋਂ ਵੱਖ ਹੋ ਗਿਆ ਅਤੇ ਲਾਂਚ ਕਰਨ ਤੋਂ ਲਗਭਗ 10 ਮਿੰਟ ਬਾਅਦ ਅਪਣੇ ਨਿਰਧਾਰਤ ਔਰਬਿਟ ਵਿਚ ਦਾਖ਼ਲ ਹੋਇਆ। ਚਾਲਕ ਦਲ ਦੇ ਮੈਂਬਰ ਠੀਕ ਹਨ ਅਤੇ ਲਾਂਚਿੰਗ ਪੂਰੀ ਤਰ੍ਹਾਂ ਸਫ਼ਲ ਰਹੀ।
China's Shenzhou-16 Mission Takes Off Bound for Space Station
ਪੁਲਾੜ ਯਾਤਰੀਆਂ ਦੇ ਸੱਤ ਘੰਟਿਆਂ ਤੋਂ ਵੀ ਘੱਟ ਦੀ ਯਾਤਰਾ ਤੋਂ ਬਾਅਦ, ਜ਼ਮੀਨ ਤੋਂ ਲਗਭਗ 400 ਕਿਲੋਮੀਟਰ ਉੱਪਰ ਸਟੇਸ਼ਨ ਦੇ ਤਿਆਨਹੇ ਕੋਰ ਮੋਡਿਊਲ 'ਤੇ ਪਹੁੰਚਣ ਦੀ ਉਮੀਦ ਹੈ। ਬੀਜਿੰਗ ਦੀ ਬੇਹਾਂਗ ਯੂਨੀਵਰਸਿਟੀ ਦੇ ਪ੍ਰੋਫੈਸਰ ਗੁਈ ਹੈਚਾਓ ਤਿੰਨ ਪੁਲਾੜ ਯਾਤਰੀਆਂ ਵਿਚੋਂ ਇਕ ਹਨ।
ਹੋਰ ਪੁਲਾੜ ਯਾਤਰੀਆਂ ਵਿਚ ਮਿਸ਼ਨ ਕਮਾਂਡਰ ਜਿੰਗ ਹੈਪੇਂਗ ਸ਼ਾਮਲ ਹਨ, ਜੋ ਰਿਕਾਰਡ ਚੌਥੀ ਵਾਰ ਪੁਲਾੜ ਵਿਚ ਜਾਣ ਵਾਲਾ ਪਹਿਲਾ ਚੀਨੀ ਪੁਲਾੜ ਯਾਤਰੀ ਬਣ ਕੇ ਇਤਿਹਾਸ ਰਚਣ ਲਈ ਤਿਆਰ ਹੈ। ਇਸ ਦੇ ਨਾਲ ਹੀ ਪੁਲਾੜ ਯਾਤਰੀ ਫ਼ਲਾਈਟ ਇੰਜੀਨੀਅਰ ਜ਼ੂ ਯਾਂਗਜ਼ੂ ਪੁਲਾੜ ਦੀ ਅਪਣੀ ਪਹਿਲੀ ਯਾਤਰਾ ਕਰ ਰਿਹਾ ਹੈ।
ਸੀ.ਐਮ.ਐਸ.ਏ. ਦੇ ਡਿਪਟੀ ਡਾਇਰੈਕਟਰ ਲਿਨ ਸ਼ਿਕਿਯਾਂਗ ਨੇ ਸੋਮਵਾਰ ਨੂੰ ਪੱਤਰਕਾਰਾਂ ਨੂੰ ਦਸਿਆ ਕਿ ਚੀਨ ਦੇ ਸਪੇਸ ਸਟੇਸ਼ਨ ਪ੍ਰੋਗਰਾਮ ਦੇ ਐਪਲੀਕੇਸ਼ਨ ਅਤੇ ਵਿਕਾਸ ਪੜਾਅ ਵਿਚ ਦਾਖ਼ਲ ਹੋਣ ਤੋਂ ਬਾਅਦ ਸ਼ੇਨਜ਼ੂ-16 ਪਹਿਲਾ ਚਾਲਕ ਮਿਸ਼ਨ ਹੋਵੇਗਾ।
