ਪੰਜਾਬ ਵਿਚ ਨਿਵੇਸ਼ ਕਰ ਰਹੇ ਉਦਯੋਗਪਤੀਆਂ ਨੂੰ ਕੀ ਸੰਦੇਸ਼ ਜਾਂਦਾ ਹੈ? ਇਹੀ ਕਿ ਇਹ ਕਿਸਾਨੀ ਖੇਤਰ ਵਾਸਤੇ ਉਦਯੋਗ ਨੂੰ ਕਿਸੇ ਸਮੇਂ ਵੀ ਬੰਦ ਕਰ ਦੇਣ ਦਾ ਹੁਕਮ ਕਰ ਸਕਦਾ ਹੈ
ਪੰਜਾਬ ਦਾ ਕਦੇ ਨਾ ਖ਼ਤਮ ਹੋਣ ਵਾਲਾ ਬਿਜਲੀ ਸੰਕਟ ਤੇ ਇਸ ਦੀ ਗੁੰਝਲਦਾਰ ਸਿਆਸਤ ਨਾ ਸਿਰਫ਼ ਇਸ ਮੌਸਮ ਵਿਚ ਪੰਜਾਬ ਲਈ ਜਾਨ ਦਾ ਖੌਅ ਬਣ ਰਹੇ ਹਨ ਬਲਕਿ ਇਹ ਪੰਜਾਬ ਦੇ ਆਉਣ ਵਾਲੇ ਕਲ ਵਾਸਤੇ ਇਕ ਮਾਯੂਸਕੁਨ ਤਸਵੀਰ ਵੀ ਪੇਸ਼ ਕਰ ਰਹੇ ਹਨ। ਅੱਜ ਪੰਜਾਬ ਵਿਚ ਨਿਵੇਸ਼ ਕਰ ਰਹੇ ਉਦਯੋਗਪਤੀਆਂ ਨੂੰ ਕੀ ਸੰਦੇਸ਼ ਜਾਂਦਾ ਹੈ? ਇਹੀ ਕਿ ਇਹ ਕਿਸਾਨੀ ਖੇਤਰ ਵਾਸਤੇ ਉਦਯੋਗ ਨੂੰ ਕਿਸੇ ਸਮੇਂ ਵੀ ਬੰਦ ਕਰ ਦੇਣ ਦਾ ਹੁਕਮ ਕਰ ਸਕਦਾ ਹੈ।
Electricity
ਅਜਿਹੇ ਸੁਨੇਹੇ ਨਾਲ ਉਦਯੋਗ ਕਿਉਂ ਪੰਜਾਬ ਵਿਚ ਅਪਣਾ ਪੈਸਾ ਲਗਾਏਗਾ? ਨਹੀਂ ਲਗਾਏਗਾ ਤਾਂ ਪੰਜਾਬ ਵਿਚ ਕਿਸਾਨੀ ਦੇ ਖੇਤਰ ਤੇ ਨਿਰਭਰਤਾ ਰਹੇਗੀ ਹੀ ਰਹੇਗੀ ਤੇ ਨੌਜਵਾਨਾਂ ਵਿਚ ਰੋਜ਼ਗਾਰ ਦੀ ਕਮੀ ਵੀ ਬਣੀ ਹੀ ਰਹੇਗੀ। ਬਿਜਲੀ ਦੀ ਸਮੱਸਿਆ ਅੱਜ ਦੀ ਨਹੀਂ ਬਲਕਿ ਪੰਜ ਦਰਿਆਵਾਂ ਦੇ ਮਾਲਕ ਸੂਬੇ ਵਿਚ ਲੰਮੇ ਅਰਸੇ ਤੋਂ ਚਲੀ ਆ ਰਹੀ ਹੈ ਤੇ ਅਰਬਾਂ ਖਰਬਾਂ ਦੇ ਨਿਵੇਸ਼ ਦੇ ਬਾਅਦ ਵੀ ਸੂਬੇ ਵਿਚ ਇਹ ਸਮੱਸਿਆ ਸੁਲਝਣ ਤੇ ਨਹੀਂ ਆ ਰਹੀ। ਥਰਮਲ ਬਿਜਲੀ ਲਗਾਉਣ ਦਾ ਮਕਸਦ ਤਾਂ ਪੰਜਾਬ ਦੇ ਮਸਲੇ ਹੱਲ ਕਰਨਾ ਸੀ
Bhatinda Thermal Plant
ਪਰ ਇਸ ਨਾਲ ਬਿਜਲੀ ਮਹਿੰਗੀ ਹੋ ਗਈ ਤੇ ਵਾਤਾਵਰਣ ਵਿਚ ਵੀ ਪ੍ਰਦੂਸ਼ਣ ਫੈਲ ਗਿਆ। ਬਠਿੰਡਾ ਥਰਮਲ ਪਲਾਂਟ ਨੂੰ ਬੰਦ ਕਰਨ ਪਿੱਛੇ ਇਹੀ ਕਾਰਨ ਕੰਮ ਕਰਦਾ ਸੀ ਕਿਉਂਕਿ ਬਠਿੰਡਾ ਪ੍ਰਦੂਸ਼ਣ ਤੇ ਬੀਮਾਰੀ ਦਾ ਘਰ ਬਣ ਗਿਆ ਸੀ। ਜਿਹੜੇ ਪ੍ਰਾਈਵੇਟ ਥਰਮਲ ਪਲਾਂਟਾਂ ਨਾਲ ਸਮਝੌਤੇ ਸਾਬਕਾ ਅਕਾਲੀ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਵਲੋਂ ਕੀਤੇ ਗਏ ਸਨ, ਉਨ੍ਹਾਂ ਵਿਚ ਭਾਵੇਂ ਵਾਤਾਵਰਣ ਦਾ ਖ਼ਿਆਲ ਤਾਂ ਕੀਤਾ ਗਿਆ ਸੀ ਪਰ ਹੁਣ ਸਿਆਸਤਦਾਨਾਂ ਦੇ ਪ੍ਰਗਟਾਵੇ ਸੰਕੇਤ ਦੇ ਰਹੇ ਹਨ ਕਿ ਉਹ ਸਮਝੌਤੇ, ਹੋਰ ਕਿਸੇ ਗੱਲ ਨਾਲੋਂ ਜ਼ਿਆਦਾ ਪੰਜਾਬ ਦੇ ਖ਼ਜ਼ਾਨੇ ਤੇ ਵੱਧ ਭਾਰ ਪਾਉਣ ਦੀ ਨੀਅਤ ਨਾਲ ਕੀਤੇ ਗਏ ਸਨ।
Sukhjinder Randhawa
ਹਰ ਰੋਜ਼ ਪੰਜਾਬ ਦੇ ਸਿਆਸਤਦਾਨ ਜਨਤਾ ਨਾਲ ਨਵੇਂ ਪ੍ਰਗਟਾਵੇ ਸਾਂਝੇ ਕਰਦੇ ਹਨ ਜੋ ਇਹ ਦਰਸਾਉਂਦੇ ਹਨ ਕਿ ਪੰਜਾਬ ਵਿਚ ਵੱਡਾ ਬਿਜਲੀ ਘਪਲਾ ਹੀ ਨਹੀਂ ਬਲਕਿ ਸਰਕਾਰੀ ਪ੍ਰਬੰਧ ਦੀ ਅਸਫ਼ਲਤਾ ਵੀ ਪੰਜਾਬ ਵਿਚ ਵਿਗੜਦੇ ਹਾਲਾਤ ਲਈ ਜ਼ਿੰਮੇਵਾਰ ਹੈ। ਅਪਣੀ ਸਰਕਾਰ ਦੀ ਕਾਰਗੁਜ਼ਾਰੀ ਤੋਂ ਨਰਾਜ਼ ਸੁਖਜਿੰਦਰ ਸਿੰਘ ਰੰਧਾਵਾ ਵਲੋਂ ਇਕ ਸਵਾਲ ਚੁਕਿਆ ਗਿਆ ਹੈ ਕਿ ਜਦ ‘ਪਾਵਰਕਾਮ’ ਨੂੰ ਪਤਾ ਸੀ ਕਿ ਇਨ੍ਹਾਂ ਹਫ਼ਤਿਆਂ ਵਿਚ ਬਿਜਲੀ ਦੀ ਵਾਧੂ ਲੋੜ ਪੈਣ ਵਾਲੀ ਹੈ ਤੇ ਕਿਸਾਨਾਂ ਨੂੰ 8 ਘੰਟੇ ਨਿਰਵਿਘਨ ਬਿਜਲੀ ਸਪਲਾਈ ਦਾ ਵਾਅਦਾ ਕਾਂਗਰਸ ਵਲੋਂ ਕੀਤਾ ਗਿਆ ਸੀ ਤਾਂ ਫਿਰ ਤਿਆਰੀ ਕਿਉਂ ਨਾ ਕੀਤੀ ਗਈ?
Paddy
ਕਿਸਾਨਾਂ ਵਾਸਤੇ ਛੇ ਘੰਟੇ ਦੀ ਸਪਲਾਈ ਦੀ ਤਿਆਰੀ ਨੇ ਉਦਯੋਗਾਂ ਨੂੰ ਨੁਕਸਾਨ ਪਹੁੰਚਾਇਆ ਕਿਉਂਕਿ ਸਰਕਾਰ ਦਾ ਵਾਅਦਾ ਪੁਗਾਉਣ ਲਈ ਉਦਯੋਗ ਹੀ ਬੰਦ ਕਰ ਦਿਤੇ ਗਏ। ਪਾਵਰਕਾਮ ਵਲੋਂ ਅਪਣੇ ਬਚਾਅ ਵਿਚ ਕਈ ਬਹਾਨੇ ਪੇਸ਼ ਕੀਤੇ ਜਾ ਰਹੇ ਹਨ ਜਿਨ੍ਹਾਂ ਵਿਚ ਚੀਨ ਨੂੰ ਵੀ ਦੋਸ਼ੀ ਗਰਦਾਨਿਆ ਜਾ ਰਿਹਾ ਹੈ। ਜਦ ਵੀ ਸੰਕਟ ਆਉਂਦਾ ਹੈ ਤਾਂ ਆਖ ਦਿਤਾ ਜਾਂਦਾ ਹੈ ਕਿ ਪੰਜਾਬ ਦੇ ਕਿਸਾਨ ਝੋਨਾ ਬੀਜਣਾ ਬੰਦ ਕਰ ਦੇਣ ਕਿਉਂਕਿ ਇਸ ਨਾਲ ਬਿਜਲੀ ਤੇ ਪਾਣੀ ਦੀ ਬਰਬਾਦੀ ਹੁੰਦੀ ਹੈ।
Shiromani akali dal
ਪਰ ਅਸਲ ਵਿਚ ਕੀਤਾ ਕੀ ਜਾ ਰਿਹਾ ਹੈ? ਸਿਆਸੀ ਹਲਕਿਆਂ ਵਿਚ ਇਹ ਵੀ ਸੁਣਨ ਨੂੰ ਆ ਰਿਹਾ ਹੈ ਕਿ ਅਕਾਲੀ ਸਰਕਾਰ 120 ਬਿਜਲੀ ਕੰਪਨੀਆਂ ਨਾਲ ਸਮਝੌਤੇ ਕਰ ਗਈ ਹੈ ਜਿਨ੍ਹਾਂ ਨੂੰ ਜੇ ਰੱਦ ਕੀਤਾ ਗਿਆ ਤਾਂ ਸਰਕਾਰ ਅਦਾਲਤੀ ਕਾਰਵਾਈ ਵਿਚ ਹੀ ਫਸ ਕੇ ਰਹਿ ਜਾਵੇਗੀ। ਅਕਾਲੀ ਦਲ, ਕਾਂਗਰਸ ਤੇ ਆਪ ਵਿਚਕਾਰ ਹੁਣ ਸਿਰਫ਼ ਇਕ ਦੂਜੇ ਉਤੇ ਅਸਫ਼ਲਤਾ ਤੇ ਚੋਰੀ ਦੇ ਇਲਜ਼ਾਮ ਹੀ ਸੁਣਨ ਨੂੰ ਮਿਲ ਰਹੇ ਹਨ। ਕਾਂਗਰਸ ਕੋਲ ਲੱਖ ਬਹਾਨੇ ਹੋਣਗੇ ਪਰ ਅਸਲ ਵਿਚ ਇਹ ਅੱਜ ਇਕ ਸਿਆਣੀ ਆਵਾਜ਼ ਵੀ ਨਹੀਂ ਸੁਣ ਰਹੀ ਜੋ ਇਸ ਮੁਸ਼ਕਲ ਦਾ ਹੱਲ ਸੁਝਾਅ ਸਕੇ।
electricity Crisis In Punjab
ਉਹ ਸਿਆਣੀ ਆਵਾਜ਼ ਜੇ ਸਮਝ ਸਕੀਏ ਤਾਂ ਇਹ ਹੈ ਕਿ ਬਿਜਲੀ ਦੀ ਕਮੀ ਹੀ ਪੰਜਾਬ ਵਾਸੀਆਂ ਨੂੰ ਪ੍ਰੇਸ਼ਾਨ ਨਹੀਂ ਕਰ ਰਹੀ ਸਗੋਂ ਪੰਜਾਬ ਦੀ ਛਵੀ ਵੀ ਇਸ ਨਾਲ ਦਾਗ਼ਦਾਰ ਬਣਦੀ ਜਾ ਰਹੀ ਹੈ ਜਿਸ ਕਾਰਨ ਪੰਜਾਬ ਵਿਚ ਵਿਕਾਸ ਦਾ ਪਹੀਆ ਚਲਣਾ ਮੁਸ਼ਕਲ ਹੁੰਦਾ ਜਾ ਰਿਹਾ ਹੈ। ਅੱਜ ਲੋੜ ਹੈ ਮਾਹਰਾਂ ਦੇ ਇਕ ਸੰਗਠਨ ਦੀ ਜੋ ਪੰਜਾਬ ਵਾਸਤੇ ਇਕ ਅਜਿਹਾ ਨਕਸ਼ਾ ਬਣਾਏ
Captain Amarinder Singh
ਜੋ ਹਰ ਪੱਖ ਨੂੰ ਸਾਹਮਣੇ ਰੱਖ ਕੇ ਪੰਜਾਬ ਮਾਡਲ ਤਿਆਰ ਕਰੇ। ਸਿਰਫ਼ ਕਿਸਾਨ ਵਾਸਤੇ ਹੀ ਨਹੀਂ, ਬਲਕਿ ਉਦਯੋਗਾਂ, ਵਾਤਾਵਰਣ, ਸਮਾਜਕ ਮੁੱਦਿਆਂ ਨੂੰ ਗੂੜ੍ਹੀ ਸੋਚ ਨਾਲ ਬੰਨ੍ਹ ਕੇ ਪੰਜਾਬ ਮਾਡਲ ਬਣਾਇਆ ਜਾਵੇ। ਹੁਣ ਤਾਂ ਲੋੜ ਹੈ ਕਿ ਸਿਆਸਤਦਾਨਾਂ ਦੇ ਹੱਥੋਂ ਪੰਜਾਬ ਦੀਆਂ ਵਿਕਾਸ ਯੋਜਨਾਵਾਂ ਕੱਢ ਲਈਆਂ ਜਾਣ ਕਿਉਂਕਿ ਕੁਰਸੀ ਤੋਂ ਬਿਨਾਂ ਇਹ ਲੋਕ ਕਿਸੇ ਹੋਰ ਮੁੱਦੇ ਬਾਰੇ ਨਹੀਂ ਸੋਚ ਸਕਦੇ। -ਨਿਮਰਤ ਕੌਰ
