ਸਕੂਲ ਦੀ ਮਾਨਤਾ ਰੱਦ ਕਰਾਉਣ ਲਈ ਸ਼੍ਰੋਮਣੀ ਕਮੇਟੀ ਤੇ ਤਖ਼ਤ ਦੇ ਜਥੇਦਾਰ ਚੁੱਪ ਕਿਉਂ?
ਕੋਟਕਪੂਰਾ (ਗੁਰਿੰਦਰ ਸਿੰਘ) : ਅਹਿਮਦਾਬਾਦ ਦੇ ਇਕ ਸਕੂਲ, ਜੋ ਆਸਾ ਰਾਮ ਦਾ ਦਸਿਆ ਜਾ ਰਿਹਾ ਹੈ, ਵਿਖੇ ਖੇਡੇ ਗਏ ਨਾਟਕ ਦੌਰਾਨ ਛੋਟੇ ਸਾਹਿਬਜ਼ਾਦਿਆਂ ਦਾ ਕਿਰਦਾਰ ਸਕੂਲੀ ਬੱਚਿਆਂ ਵਲੋਂ ਟੋਪੀਆਂ ਪਾ ਕੇ ਨਿਭਾਉਣ ਦੀ ਸਖ਼ਤ ਸ਼ਬਦਾਂ ’ਚ ਨਿਖੇਧੀ ਕਰਦਿਆਂ ਉੱਘੇ ਪ੍ਰਚਾਰਕ ਭਾਈ ਹਰਜਿੰਦਰ ਸਿੰਘ ਮਾਝੀ ਮੁੱਖ ਸੇਵਾਦਾਰ ਦਰਬਾਰ-ਏ-ਖ਼ਾਲਸਾ ਨੇ ਕਿਹਾ ਕਿ ਸਕੂਲ ਪ੍ਰਬੰਧਕਾਂ ਵਲੋਂ ਇਕ ਨਾਟਕ ਖੇਡਿਆ ਗਿਆ ਜਿਸ ’ਚ ਸਾਹਿਬਜ਼ਾਦੇ ਬਾਬਾ ਜ਼ੋਰਾਵਰ ਸਿੰਘ ਅਤੇ ਬਾਬਾ ਫ਼ਤਿਹ ਸਿੰਘ ਦਾ ਕਿਰਦਾਰ ਸਕੂਲੀ ਬੱਚਿਆਂ ਵਲੋਂ ਕਰਵਾ ਕੇ ਬੱਜਰ ਗੁਨਾਹ ਕੀਤਾ ਗਿਆ, ਜੋ ਮਾਫ਼ੀਯੋਗ ਨਹੀਂ ਹੈ।
Asaram
ਉਨ੍ਹਾਂ ਕਿਹਾ ਕਿ ਸਾਹਿਬਜ਼ਾਦਿਆਂ ਦੇ ਕਿਰਦਾਰ ਨਿਭਾਉਣ ਵਾਲੇ ਬੱਚਿਆਂ ਦੇ ਦਸਤਾਰਾਂ ਦੀ ਥਾਂ ਟੋਪੀਆਂ ਪਵਾਈਆਂ ਹੋਈਆਂ ਸਨ। ਇਹ ਸਕੂਲ ਵੀ ਉਸ ਸਾਧ ਆਸਾ ਰਾਮ ਦਾ ਹੈ, ਜੋ ਅਪਣੀਆਂ ਘਟੀਆ ਕਰਤੂਤਾਂ ਕਰ ਕੇ ਜੇਲ ’ਚ ਸਜ਼ਾ ਭੁਗਤ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਪਿਛਲੇ ਸਮੇਂ ਸਾਹਿਬਾਜ਼ਾਦਿਆਂ ’ਤੇ ਜੋ ਐਨੀਮੇਸ਼ਨ ਫ਼ਿਲਮ ਬਣੀ, ਉਸ ’ਤੇ ਵੀ ਸਾਨੂੰ ਇਤਰਾਜ਼ ਸੀ ਕਿ ਇਸ ਨਾਲ ਸਿਧਾਂਤਕ ਤੌਰ ’ਤੇ ਬਹੁਤ ਵੱਡਾ ਨੁਕਸਾਨ ਹੁੰਦਾ ਹੈ। ਅਜਿਹੀਆਂ ਫ਼ਿਲਮਾਂ ਦੇ ਵਕਤੀ ਫ਼ਾਇਦੇ ਤਾਂ ਹੁੰਦੇ ਹਨ ਪਰ ਸਿਧਾਂਤਕ ਤੌਰ ’ਤੇ ਨੁਕਸਾਨ ਹੁੰਦਾ ਹੈ ਤੇ ਹੁਣ ਇਹ ਗੱਲ ਹੋਰ ਅੱਗੇ ਵੱਧ ਗਈ ਕਿ ਅਜਿਹੇ ਨਾਟਕ ਖੇਡੇ ਜਾਣ ਲੱਗ ਪਏ ਤੇ ਕਲ ਨੂੰ ਕੋਈ ਗੁਰੂ ਗੋਬਿੰਦ ਸਿੰਘ ਬਣਨ ਦਾ ਯਤਨ ਕਰੇਗਾ ਤੇ ਕੋਈ ਗੁਰੂ ਨਾਨਕ ਸਾਹਿਬ ਦਾ ਰੋਲ ਵੀ ਕਰੂਗਾ।
SGPC
ਉਨ੍ਹਾਂ ਕਿਹਾ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਤੇ ਤਖ਼ਤਾਂ ਦੇ ਜਥੇਦਾਰ ਜੋ ਗੱਲ-ਗੱਲ ’ਤੇ ਸਾਡੇ ਵਰਗਿਆਂ ’ਤੇ ਐਕਸ਼ਨ ਕਰਨ ਲਈ ਕੋਈ ਨਾ ਕੋਈ ਬਹਾਨਾ ਭਾਲਦੇ ਹੁੰਦੇ ਹਨ ਤੇ ਹੁਣ ਚੁੱਪ ਕਿਉਂ ਬੈਠੇ ਹਨ? ਕਿਉਂਕਿ ਉਸ ਸਕੂਲ ਦੀ ਮਾਨਤਾ ਰੱਦ ਕਰਵਾਉਣ ਲਈ ਇਨ੍ਹਾਂ ਨੂੰ ਅੱਗੇ ਆਉਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਪਿਛਲੇ ਦਿਨੀਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਐਲਾਨ ਕੀਤਾ ਕਿ ਸਾਹਿਬਾਜ਼ਾਦਿਆਂ ਦਾ ਸ਼ਹੀਦੀ ਦਿਨ ‘ਵੀਰ ਬਾਲ ਦਿਵਸ’ ਵਜੋਂ ਮਨਾਵਾਂਗੇ ਤੇ ਸਾਡੇ ਬਹੁਤ ਸਾਰੇ ਸਿੱਖਾਂ ਨੇ ਬਿਨਾਂ ਸੋਚੇ ਸਮਝੇ ਇਸ ਦਾ ਸਵਾਗਤ ਕੀਤਾ ਹੈ
Sikhs
ਜਦਕਿ ਸਾਨੂੰ ਸਿੱਖ ਸਭਿਆਚਾਰ ਤੇ ਸਿੱਖ ਇਤਿਹਾਸ ਮੁਤਾਬਕ ਦੇਖਣਾ ਚਾਹੀਦਾ ਹੈ ਕਿ ਇਹ ਸਹੀ ਹੈ ਜਾਂ ਗ਼ਲਤ? ਉਨ੍ਹਾਂ ਕਿਹਾ ਕਿ ਸਾਹਿਬਜ਼ਾਦਿਆਂ ਦੀ ਅਦੁੱਤੀ ਮਹਾਨ ਸ਼ਹਾਦਤ ਨੂੰ ਦੇਸ਼ ਭਗਤੀ ਦੇ ਫਰੇਮ ’ਚ ਫਿੱਟ ਕਰਨ ਦੀ ਇਹ ਬਹੁਤ ਘਟੀਆ ਕੋਸ਼ਿਸ਼ ਕੀਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਸਾਨੂੰ ਸਿੱਖ ਕੌਮ ਨੂੰ ਪੂਰਾ ਠੋਕ ਕੇ ਤੇ ਇਕ ਆਵਾਜ਼ ਹੋ ਕੇ ਕਹਿਣਾ ਚਾਹੀਦਾ ਹੈ ਕਿ ਸਾਡਾ ਗੁਰੂ ਦੇਸ਼ ਭਗਤ ਨਹੀਂ ਬਲਕਿ ਅਸੀਂ ਦੇਸ਼ ਦੇ ਹੁਕਮਰਾਨਾਂ ਨੂੰ ਇਹ ਕਹਿਣਾ ਚਾਹੁੰਦੇ ਹਾਂ ਕਿ ਤੁਸੀਂ ਦੇਸ਼ ਨੂੰ ਮੰਨੂ ਦੀ ਚੁੰਗਲ ’ਚੋਂ ਕੱਢ ਕੇ ਗੁਰੂ ਦੇ ਚਰਨਾ ’ਚ ਰੱਖ ਦੇਵੋ, ਦੇਸ਼ ਦਾ ਭਲਾ ਹੋ ਸਕਦਾ।
