'ਉੱਚਾ ਦਰ ਬਾਬੇ ਨਾਨਕ ਦਾ' ਵਿਖੇ ਬਾਬਾ ਨਾਨਕ ਅਤੇ ਭਾਈ ਲਾਲੋਆਂ ਨਾਲ ਰਲ ਕੇ ਅਪ੍ਰੈਲ 'ਚ ਪੁਰਬ ਮਨਾਉਣ ਦੀ ਗੱਲ ਸੰਗਤਾਂ ਨੂੰ ਜ਼ਿਆਦਾ ਚੰਗੀ ਲੱਗੀ
ਚੰਡੀਗੜ੍ਹ (ਕਮਲਜੀਤ ਸਿੰਘ ਬਨਵੈਤ): ਸ਼੍ਰੋਮਣੀ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਅਤੇ ਸਮੇਂ ਦੀਆਂ ਸਰਕਾਰਾਂ ਵਲੋਂ ਇਕ ਤੋਂ 12 ਨਵੰਬਰ ਤਕ ਸੁਲਤਾਨਪੁਰ ਲੋਧੀ ਵਿਖੇ ਕਰਵਾਏ ਸਮਾਗਮ 'ਤੇ ਹਜ਼ਾਰ ਕਰੋੜ ਰੁਪਏ ਤੋਂ ਵੱਧ ਰੋੜ੍ਹ ਦਿਤਾ ਗਿਆ। ਲਾਂਘੇ ਤੋਂ ਦੋਹਾਂ ਦੇਸ਼ਾਂ ਦੀਆਂ ਸਰਕਾਰਾਂ ਨੂੰ ਨਿਤ ਦਿਨ ਹਜ਼ਾਰਾਂ ਸੰਗਤਾਂ ਦੇ ਉਮੜ ਆਉਣ ਦੀ ਉਮੀਦ ਸੀ ਪਰ ਪਿਛਲੇ ਇਕ ਹਫ਼ਤੇ ਵਿਚ ਸਿਰਫ਼ 2542 ਸ਼ਰਧਾਲੂ ਹੀ ਦਰਸ਼ਨਾਂ ਲਈ ਗਏ ਹਨ। ਇਸ ਦਾ ਕਾਰਨ ਭਾਰਤ-ਪਾਕਿ ਵਲੋਂ ਸੰਗਤਾਂ 'ਤੇ ਲਾਈਆਂ ਸਖ਼ਤ ਸ਼ਰਤਾਂ ਹਨ।
ਦੂਜੇ ਬੰਨੇ 'ਉੱਚਾ ਦਰ ਬਾਬੇ ਨਾਨਕ ਦਾ' ਵਿਖੇ 15 ਅਪ੍ਰੈਲ ਨੂੰ ਪ੍ਰਕਾਸ਼ ਪੁਰਬ ਮਨਾਉਣ ਦੀ ਗੱਲ ਸੰਗਤਾਂ ਦੇ ਦਿਲਾਂ ਨੂੰ ਜਚ ਗਈ ਹੈ। ਸ੍ਰੀ ਗੁਰੂ ਨਾਨਕ ਦੇਵ ਜੀ ਦਾ ਜਨਮ 15 ਅਪ੍ਰੈਲ ਨੂੰ ਹੋਣ ਦੀ ਅਕਾਲ ਤਖ਼ਤ ਵਲੋਂ ਜਾਰੀ ਨਾਨਕਸ਼ਾਹੀ ਕੈਲੰਡਰ ਸ਼ਾਹਦੀ ਭਰਦਾ ਹੈ। ਉਂਜ ਬਾਬੇ ਨਾਨਕ ਦੇ ਪ੍ਰਕਾਸ਼ ਪੁਰਬ ਦੀ ਅਸਲ ਤਰੀਕ ਅਪ੍ਰੈਲ ਵਿਚ ਹੀ ਪੈਂਦੀ ਹੈ ਪਰ ਕੱਤਕ ਦੀ ਪੂਰਨਮਾਸ਼ੀ ਦੇ ਦਿਨ ਮਨਾਏ ਜਾਣ ਨੂੰ ਲੈ ਕੇ ਇਤਿਹਾਸਕਾਰ ਲੰਬੇ ਚਿਰ ਤੋਂ ਇਕ ਮਤ ਹਨ।
ਸਪੋਕਸਮੈਨ ਅਖ਼ਬਾਰ ਵਿਚ ਬਾਬਾ ਨਾਨਕ ਦਾ ਪ੍ਰਕਾਸ਼ ਪੁਰਬ 'ਉੱਚਾ ਦਰ ਬਾਬੇ ਨਾਨਕ ਦਾ' ਵਿਖੇ ਮਨਾਉਣ ਦੀ ਗੱਲ ਵਿਦੇਸ਼ਾਂ ਵਿਚ ਉਠ ਚੁਕੀ ਹੈ ਪਰ ਹੰਭਲਾ ਮਾਰਨ ਦਾ ਹੀਆ ਸਪੋਕਸਮੈਨ ਦੀ ਅਗਵਾਈ ਵਿਚ 'ਉੱਚਾ ਦਰ ਬਾਬੇ ਨਾਨਕ ਦਾ' ਟਰੱਸਟ ਨੇ ਹੀ ਕੀਤਾ ਹੈ। ਖ਼ਬਰ ਛਪਦਿਆਂ ਹੀ ਸੰਗਤਾਂ ਦੇ ਫ਼ੋਨ ਸਮਾਗਮ ਦੀ ਰੂਪ ਰੇਖਾ ਬਾਰੇ ਜਾਣਕਾਰੀ ਲਈ ਖੜਕਣ ਲੱਗੇ ਹਨ। ਸਰਕਾਰੀ ਤੌਰ 'ਤੇ ਮਿਲੀ ਜਾਣਕਾਰੀ ਅਨੁਸਾਰ ਗੁਰਦਵਾਰਾ ਕਰਤਾਰਪੁਰ ਸਾਹਿਬ ਵਲ ਨੂੰ ਸੰਗਤਾਂ ਲਈ ਵਾਟ ਏਨੀ ਲੰਬੀ ਹੋ ਗਈ ਹੈ
ਜਿੰਨੀ ਸੰਗਤ ਦਾ ਇਕ ਦਿਨ ਵਿਚ ਆਉਣ ਦਾ ਅੰਦਾਜ਼ਾ ਲਾਇਆ ਜਾ ਰਿਹਾ ਸੀ ਉਸ ਤੋਂ ਅੱਧਾ ਹਿੱਸਾ ਇਕ ਹਫ਼ਤੇ ਵਿਚ ਆਈ ਹੈ। ਲਾਂਘੇ ਦੇ ਉਦਘਾਟਨ ਦੇ ਦਿਨ 9 ਨਵੰਬਰ ਨੂੰ 562 ਅਤੇ ਅਗਲੇ ਦਿਨ 10 ਨੂੰ 229 ਤੇ ਤੀਜੇ ਦਿਨ ਕੇਵਲ 122 ਸ਼ਰਧਾਲੂ ਹੀ ਦਰਬਾਰ ਸਾਹਿਬ ਦੇ ਦਰਸ਼ਨਾਂ ਲਈ ਗਏ ਹਨ। ਪ੍ਰਕਾਸ਼ ਪੁਰਬ ਵਾਲੇ ਦਿਨ 12 ਨਵੰਬਰ ਨੂੰ ਸੱਭ ਤੋਂ ਵੱਧ 546 ਸ਼ਰਧਾਲੂਆਂ ਨੇ ਦਰਸ਼ਨ ਕੀਤੇ ਹਨ। ਉਸ ਤੋਂ ਅਗਲੇ ਦਿਨ 279, 14 ਨੂੰ 241, 15 ਨੂੰ 161, 16 ਨੂੰ 402 ਸੰਗਤਾਂ ਕਰਤਾਰਪੁਰ ਤੋਂ ਲਾਂਘੇ ਰਾਹੀਂ ਦਾਖ਼ਲ ਹੋਇਆ।
ਸੰਗਤਾਂ ਦਾ ਏਨੀ ਘੱਟ ਗਿਣਤੀ ਵਿਚ ਕਰਤਾਰਪੁਰ ਸਾਹਿਬ ਜਾਣ ਬਾਰੇ ਮੰਨਿਆ ਜਾ ਰਿਹਾ ਹੈ ਕਿ ਪਾਸਪੋਰਟ ਦੀ ਸ਼ਰਤ ਸੰਗਤਾਂ ਨੂੰ ਬੇਲੋੜੀ ਲੱਗ ਰਹੀ ਹੈ। ਉਸ ਤੋਂ ਬਿਨਾਂ 'ਵੀਜ਼ਾ ਫ਼ਰੀ ਟਰੈਵਲ' ਲਈ ਆਨਲਾਈਨ ਅਰਜ਼ੀ ਦੇਣ ਵਿਚ ਵੀ ਆਮ ਲੋਕਾਂ ਲਈ ਇਕ ਵੱਡੀ ਦਿੱਕਤ ਹੈ। ਸਰਕਾਰ ਦੇ ਸਭਿਆਚਾਰਕ ਮਾਮਲਿਆਂ ਵਿਭਾਗ ਦੇ ਸਕੱਤਰ ਵਿਕਾਸ ਪ੍ਰਤਾਪ ਦਾ ਕਹਿਣਾ ਹੈ ਕਿ ਲੋਕ ਹਾਲੇ ਕਣਕ ਦੀ ਬਿਜਾਈ ਵਿਚ ਰੁਝੇ ਹੋਏ ਹਨ ਅਤੇ ਵਿਹਲੇ ਹੋਣ ਤੋਂ ਬਾਅਦ ਵੱਡਾ ਹੁੰਗਾਰਾ ਮਿਲੇਗਾ।