ਚੰਡੀਗੜ੍ਹ, 22 ਅਕਤੂਬਰ (ਤਰੁਣ ਭਜਨੀ): ਚੰਡੀਗੜ੍ਹ ਵਿਚ ਆਏ ਦਿਨ ਲੜਕੀਆਂ ਦਾ ਪਿਛਾ ਕਰਨਾ ਅਤੇ ਉਨ੍ਹਾਂ ਨਾਲ ਛੇੜਛਾੜ ਦੀਆਂ ਘਟਨਾਵਾਂ ਲਗਾਤਾਰ ਵਧ ਰਹੀਆਂ ਹਨ। ਹਾਲਾਂਕਿ ਚੰਡੀਗੜ੍ਹ ਪੁਲਿਸ ਇਨ੍ਹਾਂ ਛੇੜਛਾੜ ਕਰਨ ਵਾਲਿਆਂ ਵਿਰੁਧ ਸਖ਼ਤੀ ਨਾਲ ਪੇਸ਼ ਆ ਰਹੀ ਹੈ। ਇਸ ਦੇ ਬਾਵਜੂਦ ਨੌਜਵਾਨ ਲੜਕੀਆਂ ਨਾਲ ਛੇੜਛਾੜ ਅਤੇ ਹੋਰ ਗ਼ਲਤ ਹਰਕਤਾਂ ਕਰਨ ਤੋਂ ਬਾਜ਼ ਨਹੀਂ ਆ ਰਹੇ। 4-5 ਅਗੱਸਤ ਦੀ ਰਾਤ ਨੂੰ ਆਈ.ਏ.ਐਸ. ਅਧਿਕਾਰੀ ਦੀ ਧੀ ਵਰਣਿਕਾ ਕੁੰਡੂ ਦਾ ਗੱਡੀ 'ਤੇ ਪਿੱਛਾ ਕਰ ਕੇ ਉਸ ਨਾਲ ਛੇੜਛਾੜ ਅਤੇ ਫਿਰ ਅਗ਼ਵਾ ਕਰਨ ਦੀ ਕੋਸ਼ਿਸ਼ ਦੇ ਮਾਮਲੇ ਵਿਚ ਹਰਿਆਣਾ ਭਾਜਪਾ ਪ੍ਰਧਾਨ ਸੁਭਾਸ਼ ਬਰਾਲਾ ਦੇ ਬੇਟੇ ਦੀ ਗ੍ਰਿਫ਼ਤਾਰੀ ਨੇ ਪੂਰੇ ਦੇਸ਼ ਵਿਚ ਚੰਡੀਗੜ੍ਹ ਵਰਗੇ ਸੁਰੱਖਿਅਤ ਮੰਨੇ ਜਾਣ ਵਾਲੇ ਸ਼ਹਿਰ ਦਾ ਅਕਸ ਖ਼ਰਾਬ ਕੀਤਾ ਸੀ ਪਰ ਇਸ ਘਟਨਾ ਤੋਂ ਬਾਅਦ ਵੀ ਨੌਜਵਾਨਾਂ ਦੇ ਹੋਸ਼ ਠਿਕਾਣੇ ਨਹੀਂ ਆਏ ਅਤੇ ਬਾਅਦ ਵਿਚ ਵੀ ਕਈ ਮਾਮਲੇ ਸਾਹਮਣੇ ਆਏ ਜਿਸ ਵਿਚ ਲੜਕੀਆਂ ਨਾਲ ਰਾਤ ਦੇ ਸਮੇਂ ਸ਼ਰੇਆਮ ਛੇੜਛਾੜ ਕੀਤੀ ਗਈ।ਨਵਾਂ ਮਾਮਲਾ ਬੀਤੇ ਸਨਿਚਰਵਾਰ ਦਾ ਹੈ ਜਿਸ ਵਿਚ ਸੈਕਟਰ-44 ਵਿਚ ਟਿਊਸ਼ਨ ਪੜ੍ਹ ਕੇ ਵਾਪਸ ਘਰ ਜਾ ਰਹੀ ਇਕ ਨਾਬਾਲਗ਼ ਲੜਕੀ ਦਾ ਨੌਜਵਾਨ ਵਲੋਂ ਪਿਛਾ ਕੀਤਾ ਗਿਆ। ਲੜਕੀ ਨੇ ਘਰ ਜਾ ਕੇ ਜਦ ਇਸ ਬਾਰੇ ਅਪਣੇ ਪਿਤਾ ਨੂੰ ਦਿਤੀ ਤਾਂ ਉਨ੍ਹਾਂ ਇਸ ਦੀ ਸ਼ਿਕਾਇਤ ਸੈਕਟਰ-34 ਥਾਣਾ ਪੁਲਿਸ ਨੂੰ ਦਿਤੀ। ਪੁਲਿਸ ਨੇ ਕੁੱਝ ਸਮੇਂ ਬਾਅਦ ਹੀ ਮੁਨਿਸ਼ ਨਾਂ  ਦੇ ਨੌਜਵਾਨ ਵਿਰੁਧ ਮਾਮਲਾ ਦਰਜ ਕਰ ਕੇ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਇਸੇ ਤਰ੍ਹਾਂ ਸਤੰਬਰ ਮਹੀਨੇ ਵਿਚ ਇਕ ਲੜਕੀ ਨੇ ਕੰਟਰੋਲ ਰੂਮ 'ਤੇ ਫ਼ੋਨ ਕਰ ਕੇ ਦਸਿਆ ਕਿ ਇਕ ਲੜਕਾ ਕਾਰ ਵਿਚ ਉਸ ਦਾ ਪਿਛਾ ਕਰ ਰਿਹਾ ਹੈ ਅਤੇ ਉਸ ਨੂੰ ਜਬਰਦਸਤੀ ਗੱਡੀ ਵਿਚ ਬਿਠਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਪੁਲਿਸ ਨੇ ਪਹੁੰਚ ਕੇ ਨੌਜਵਾਨ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਲੜਕੀ ਕਾਲ ਸੈਂਟਰ ਤੋਂ ਕੰਮ ਖ਼ਤਮ ਕਰਕੇ ਅਪਣੇ ਘਰ ਰਾਤ ਨੂੰ ਵਾਪਸ ਜਾ ਰਹੀ ਸੀ। 

ਆਈਏਐਸ ਦੀ ਧੀ ਨਾਲ ਛੇੜਛਾੜ ਹੋਈ। 4 ਅਗੱਸਤ ਦੀ ਰਾਤ ਨੂੰ ਹਰਿਆਣਾ ਭਾਜਪਾ ਪ੍ਰਧਾਨ ਦੇ ਬੇਟਾ ਅਤੇ ਉਸ ਦੇ ਦੋਸਤ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਦੋਹਾਂ ਨੇ ਰਾਤ ਦੇ ਸਮੇਂ ਇਕੱਲੀ ਲੜਕੀ ਵੇਖ ਕੇ ਉਸ ਨਾਲ ਛੇੜਛਾੜ ਅਤੇ ਜਬਰਦਸਤੀ ਕਾਰ ਵਿਚ ਬਿਠਾਉਣ ਦੀ ਕੋਸ਼ਿਸ਼ ਕੀਤੀ ਸੀ  ਕੁੱਝ ਦਿਨ ਪਹਿਲਾਂ ਅਦਾਲਤ ਵਿਚ ਦੋਹਾਂ ਮੁਲਜ਼ਮਾਂ ਵਿਰੁਧ ਦੋਸ਼ ਆਇਦ ਹੋ ਚੁਕੇ ਹਨ।ਜ਼ਿਆਦਾਤਰ ਲੜਕੀਆਂ ਰਾਤ ਸਮੇਂ ਜਾਂਦੀਆਂ ਹਨ ਕੰਮ 'ਤੇ : ਛੇੜਛਾੜ ਅਤੇ ਪਿਛਾ ਕਰਨ ਦੇ ਮਾਮਲੇ ਉਨ੍ਹਾਂ ਲੜਕੀਆਂ ਨਾਲ ਵੀ ਵਾਪਰੇ ਜੋ ਰਾਤ ਦੇ ਸਮੇਂ ਕੰਮ 'ਤੇ ਜਾਂਦੀਆਂ ਹਨ। ਅਕਸਰ ਲੋਕ ਰਾਤ ਸਮੇਂ ਲੜਕੀ ਨੂੰ ਇਕੱਲਾ ਵੇਖ ਕੇ ਉਸ ਨਾਲ ਛੇੜਛਾੜ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ। ਸ਼ਹਿਰ 'ਚ ਰਾਤ ਸਮੇਂ ਕਈ ਲੜਕੀਆਂ ਕਾਲ ਸੈਂਟਰ, ਰੇਡੀਉ, ਅਖ਼ਬਾਰ, ਆਈ.ਟੀ. ਸੈਕਟਰ ਅਤੇ ਹੋਰ ਥਾਵਾਂ 'ਤੇ ਵੀ ਜਾਂਦੀਆਂ ਹਨ। ਰਾਤ ਦੀ ਸਿਫ਼ਟ ਹੋਣ ਕਾਰਨ ਕੰਮ ਖ਼ਤਮ ਕਰਨ ਤੋਂ ਬਾਅਦ ਇਨ੍ਹਾਂ ਲੜਕੀਆਂ ਨੂੰ ਰਾਤ ਨੂੰ ਹੀ ਘਰ ਜਾਣਾ ਹੁੰਦਾ ਹੈ ਜਿਸ ਕਾਰਨ ਕਈ ਵਾਰੀ ਇਹ ਲੜਕੀਆਂ ਛੇੜਛਾੜ ਦਾ ਸ਼ਿਕਾਰ ਹੁੰਦੀਆਂ ਹਨ।ਔਰਤਾਂ ਵਿਰੁਧ ਅਪਰਾਧ ਦੇ ਮਾਮਲਿਆਂ ਚ ਯੂਨੀਅਨ ਟੈਰੀਟਰੀਜ਼ ਵਿਚ ਚੰਡੀਗੜ੍ਹ ਦੂਜੇ ਨੰਬਰ 'ਤੇ : ਦੇਸ਼ ਦੀ ਸੱਤ ਯੂਨੀਅਨ ਟੈਰਟਰੀਜ਼ ਵਿਚ ਔਰਤਾਂ ਵਿਰੁਧ ਹੁੰਦੇ ਅਪਰਾਧ ਦੇ ਮਾਮਲਿਆਂ ਵਿਚ ਚੰਡੀਗੜ੍ਹ ਦਾ ਨੰਬਰ ਦੂਜਾ ਹੈ। ਦਿੱਲੀ ਦਾ ਨੰਬਰ ਪਹਿਲਾ ਹੈ। ਜਿਥੇ ਸੱਭ ਤੋਂ ਵੱਧ ਔਰਤਾਂ ਵਿਰੁਧ ਅਪਰਾਧ ਹੁੰਦਾ ਹੈ। ਐਨ.ਚੀ.ਆਰ.ਬੀ. ਰੀਪੋਰਟ ਵਿਚ ਇਸ ਦਾ ਪ੍ਰਗਟਾਵਾ ਹੋਇਆ ਹੈ। ਚੰਡੀਗੜ੍ਹ ਵਿਚ ਸਾਲ 2015 ਤੋਂ ਲੈ ਕੇ 2017 ਤਕ ਲਗਭਗ 1500 ਮਾਮਲੇ ਦਰਜ ਕੀਤੇ ਗਏ ਹਨ ਜਿਨ੍ਹਾਂ ਵਿਚ ਬਲਾਤਕਾਰ, ਛੇੜਛਾੜ, ਅਗ਼ਵਾ ਆਦਿ ਸ਼ਾਮਲ ਹਨ।