ਐਸ.ਏ.ਐਸ.ਨਗਰ,
6 ਸਤੰਬਰ (ਸੁਖਦੀਪ ਸਿੰਘ ਸੋਈ/ਗੁਰਨਾਮ ਸਾਗਰ) : ਜ਼ਿਲ੍ਹੇ ਦੇ ਕਿਸਾਨਾਂ ਦੀ ਆਰਥਿਕਤਾ ਦੀ
ਮਜ਼ਬੂਤੀ ਲਈ ਕਿਸਾਨਾਂ ਨੂੰ ਰਵਾਇਤੀ ਫ਼ਸਲਾਂ ਕਣਕ, ਝੋਨੇ ਦੇ ਚੱਕਰ ਵਿਚੋਂ ਕੱਢ ਕੇ ਫਲਾਂ,
ਫੁੱਲਾਂ ਅਤੇ ਸਬਜ਼ੀਆਂ ਦੀ ਕਾਸ਼ਤ ਕਰਨ ਲਈ ਪ੍ਰੇਰਿਤ ਕੀਤਾ ਜਾਵੇਗਾ ਤਾਂ ਜੋ ਕਿਸਾਨ
ਲਾਹੇਵੰਦ ਫ਼ਸਲਾਂ ਦੀ ਕਾਸ਼ਤ ਕਰ ਕੇ ਵੱਧ ਮੁਨਾਫ਼ਾ ਕਮਾ ਸਕਣ। ਇਸ ਸਬੰਧੀ ਬਾਗਬਾਨੀ ਵਿਭਾਗ
ਨੂੰ ਇਕ ਯੋਜਨਾ ਤਿਆਰ ਕਰਨ ਦੀ ਹਦਾਇਤ ਵੀ ਕੀਤੀ ਹੈ। ਇਸ ਗੱਲ ਦੀ ਜਾਣਕਾਰੀ ਡਿਪਟੀ
ਕਮਿਸ਼ਨਰ ਸ੍ਰੀਮਤੀ ਗੁਰਪ੍ਰੀਤ ਕੌਰ ਸਪਰਾ ਨੇ ਬਾਗਬਾਨੀ ਵਿਭਾਗ ਵਲੋਂ ਘਰੇਲੂ ਬਗੀਚੀ ਲਈ
ਸਰਦ ਰੁੱਤ ਦੇ ਸਬਜ਼ੀ ਬੀਜ਼ਾਂ ਦੀ ਕਿੱਟ ਜਾਰੀ ਕਰਨ ਮੌਕੇ ਦਿਤੀ।
ਇਸ ਮੌਕੇ ਬਾਗਬਾਨੀ
ਵਿਭਾਗ ਦੇ ਡਿਪਟੀ ਡਾਇਰੈਕਟਰ ਕਰਨੈਲ ਸਿੰਘ ਤੇ ਬਾਗਬਾਨੀ ਅਫ਼ਸਰ ਤਿਰਲੋਚਨ ਸਿੰਘ ਵੀ ਮੌਜੂਦ
ਸਨ। ਇਸ ਮੌਕੇ ਡਿਪਟੀ ਡਾਇਰੈਕਟਰ ਬਾਗਬਾਨੀ ਵਿਭਾਗ ਕਰਨੈਲ ਸਿੰਘ ਨੇ ਦਸਿਆ ਕਿ ਇਸ ਕਿੱਟ
ਵਿਚ ਮੂਲੀ, ਗਾਜਰ, ਸਲਗਮ, ਮਟਰ, ਪਾਲਕ, ਮੇਥੀ, ਧਨੀਆ, ਬਰਕੌਲੀ, ਚੀਨੀ ਸਰੋਂ, ਲੈਟਸ ਅਤੇ
ਚਕੰਦਰ ਦੇ ਬੀਜ ਹਨ, ਜੋ ਕਿ 6 ਮਰਲੇ ਲਈ ਕਾਫੀ ਹਨ ਅਤੇ ਘਰੇਲੂ ਬਗੀਚੀ ਵਿਚ ਇਸ ਕਿੱਟ
ਵਿਚੋਂ ਵਿਊਂਤਬੰਦੀ ਨਾਲ ਬੀਜ ਲਾ ਸੱਤ ਜੀਆਂ ਦੇ ਪਰਵਾਰ ਲਈ 400 ਕਿਲੋ ਤਾਜ਼ੀ ਸਬਜ਼ੀ ਪੈਦਾ
ਕੀਤੀ ਜਾ ਸਕਦੀ ਹੈ ਜੋ ਕਿ ਪਰਵਾਰ ਦੇ ਛੇ ਮਹੀਨਿਆਂ ਦੀਆਂ ਲੋੜਾਂ ਨੂੰ
ਪੂਰਾ ਕਰੇਗੀ ਅਤੇ ਸਾਲਾਨਾ ਪੰਜ ਹਜ਼ਾਰ ਰੁਪਏ ਪ੍ਰਤੀ ਜੀਅ ਖਰਚਾ ਵੀ ਬਚੇਗਾ।
ਉਨ੍ਹਾਂ
ਦਸਿਆ ਕਿ ਘਰੇਲੂ ਬਗੀਚੀ ਸਰਦ ਰੁੱਤ ਦੇ ਬੀਜਾਂ ਦੀ ਕਿੱਟ ਸਸਤੇ ਭਾਅ 'ਤੇ ਡੇਰਾਬਸੀ,
ਕੁਰਾਲੀ, ਖਰੜ ਅਤੇ ਮੁਹਾਲੀ ਦੇ ਬਾਗਬਾਨੀ ਅਫ਼ਸਰਾਂ ਦੇ ਦਫ਼ਤਰਾਂ ਤੋਂ ਖਰੀਦੀ ਜਾ ਸਕਦੀ ਹੈ।
