ਤ੍ਰਿਪੁਰਾ ਦੇ ਮੁੱਖ ਮੰਤਰੀ ਬਿਪਲਬ ਕੁਮਾਰ ਦੇਬ ਆਪਣੇ ਬਿਆਨਾਂ ਨੂੰ ਲੈ ਕੇ ਅਕਸਰ ਹੀ ਵਿਵਾਦਾਂ 'ਚ ਘਿਰੇ ਰਹਿੰਦੇ ਹਨ...
ਤ੍ਰਿਪੁਰਾ ਦੇ ਮੁੱਖ ਮੰਤਰੀ ਬਿਪਲਬ ਕੁਮਾਰ ਦੇਬ ਆਪਣੇ ਬਿਆਨਾਂ ਨੂੰ ਲੈ ਕੇ ਅਕਸਰ ਹੀ ਵਿਵਾਦਾਂ 'ਚ ਘਿਰੇ ਰਹਿੰਦੇ ਹਨ। ਇਸੇ ਦੇ ਚਲਦਿਆਂ ਉਹ ਇਕ ਵਾਰ ਫ਼ਿਰ ਤੋਂ ਵਿਵਾਦਾਂ 'ਚ ਆ ਗਏ ਹਨ । ਦਸਦੀਏ ਕਿ ਬਿਪਲਬ ਨੇ ਭਾਰਤ ਦੀ ਸਾਬਕਾ ਮਿਸ ਵਰਲਡ ਡਾਇਨਾ ਹੇਡਨ ਦੇ ਰੰਗ ਤੇ ਟਿੱਪਣੀ ਕਰਦਿਆਂ 21 ਸਾਲ ਪਹਿਲਾਂ ਡਾਇਨਾ ਹੇਡਨ ਨੂੰ ਮਿਸ ਵਰਲਡ ਦਾ ਖਿਤਾਬ ਦਿਤੇ ਜਾਣ 'ਤੇ ਸਵਾਲ ਉਠਾ ਦਿਤਾ। ਬਿਪਲਬ ਮੁਤਾਬਕ ਡਾਇਨਾ ਦੀ ਬਜਾਏ ਅਮਿਤਾਭ ਬੱਚਨ ਦੀ ਨੂੰਹ ਐਸ਼ਵਰਿਆ ਰਾਏ ਬੱਚਨ ਭਾਰੀ ਸੁੰਦਰਤਾ ਦੀ ਅਸਲ ਨੁਮਾਇੰਦਗੀ ਕਰਦੀ ਹੈ।
ਕਿਉਂਕੀ ਉਹ ਡਾਇਨਾ ਤੋਂ ਕਿਤੇ ਜ਼ਿਆਦਾ ਖ਼ੂਬਸੂਰਤ ਹੈ। ਤ੍ਰਿਪੁਰਾ ਦੇ ਮੁੱਖ ਮੰਤਰੀ ਦਾ ਕਹਿਣਾ ਹੈ ਕਿ, ਭਾਰਤੀ ਸੁੰਦਰਤਾ ਪ੍ਰਮਾਤਮਾ ਵਾਂਗ ਲੱਗਦੀ ਹੈ, ਜਿਵੇ ਲਕਸ਼ਮੀ ਤੇ ਸਰਸਵਤੀ। ਡਾਇਨਾ ਹੇਡਨ ਅਜਿਹੀ ਨਹੀਂ ਲੱਗਦੀ ਤੇ ਮਿਸਲ ਵਰਲਡ ਦਾ ਤਾਜ ਉਸ ਦੇ ਸਿਰ 'ਤੇ ਨਹੀਂ ਹੋਣਾ ਚਾਹੀਦਾ। ਉਨ੍ਹਾਂ ਨੇ ਕਿਹਾ, ਇਹ ਸਭ ਫਿਕਸ ਪਲਾਨ ਵਾਂਗ ਹੁੰਦਾ ਹੈ।'
ਉਧਰ ਬਿਪਲਬ ਦੇ ਇਸ ਬਿਆਨ ਤੋਂ ਬਾਅਦ ਸਾਬਕਾ ਮਿਸ ਵਰਲਡ ਡਾਇਨਾ ਬੇਹੱਦ ਦੁੱਖੀ ਹੈ। ਡਾਇਨਾ ਨੇ ਇਸ 'ਤੇ ਟਵੀਟ ਕੀਤਾ ਹੈ ਅਤੇ ਕਿਹਾ ਕਿ , ''ਮੈਂ ਬਚਪਨ ਤੋਂ ਰੰਗਭੇਦ ਦੀ ਆਲੋਚਨਾਵਾਂ ਨਾਲ ਜੂਝ ਰਹੀ ਹਾਂ ਤੇ ਮੈਂ ਸਫਲ ਹਾਂ। ਲੋਕਾਂ ਨੂੰ ਮੇਰੀਆਂ ਉਪਲਬਧੀਆਂ ਦਾ ਮਹੱਤਵ ਘੱਟ ਕਰਨ ਦੀ ਬਜਾਏ ਮੇਰੇ 'ਤੇ ਮਾਣ ਕਰਨਾ ਚਾਹੀਦਾ। ਮੰਤਰੀ ਦਾ ਇਕ ਖਾਸ ਕਦ ਹੈ ਤੇ ਉਹ ਜੋ ਆਖਦੇ ਹਨ ਉਸ ਦੀ ਉਨ੍ਹਾਂ ਨੂੰ ਪਰਵਾਹ ਕਰਨੀ ਚਾਹੀਦੀ।''
ਤ੍ਰਿਪੁਰਾ ਦੇ ਮੰਤਰੀ ਦੇ ਇਸ ਬਿਆਨ ਤੋਂ ਜਿਥੇ ਡਾਇਨਾ ਦੁਖੀ ਹੈ ਉਥੇ ਹੀ ਟਵਿਟਰ 'ਤੇ ਕਾਫੀ ਲੋਕ ਵੀ ਬਿਪਲਬ ਦੇ ਇਸ ਬਿਆਨ ਦੀ ਨਿੰਦਿਆ ਕਰ ਰਹੇ ਹਨ।ਜ਼ਿਕਰਯੋਗ ਹੈ ਕਿ ਡਾਇਨਾ ਹੇਡਨ ਲੰਬੇ ਸਮੇਂ ਤੋਂ ਲਾਈਮਲਾਈਟ ਤੋਂ ਦੂਰ ਹੈ। ਸਾਲ 1997 'ਚ ਫੇਮਿਨਾ ਮਿਸ ਵਰਲਡ ਦਾ ਖਿਤਾਬ ਜਿੱਤਣ ਤੋਂ ਬਾਅਦ ਉਸੇ ਸਾਲ ਮਿਸ ਵਰਲਡ ਦਾ ਟਾਈਟਲ ਜਿੱਤਿਆ ਸੀ।
ਦਸ ਦਈਏ ਕਿ ਇਹ ਕੋਈ ਪਹਿਲਾ ਅਜਿਹਾ ਮਾਮਲਾ ਨਹੀਂ ਜਿਥੇ ਅਦਾਕਾਰਾ ਰੰਗ ਭੇਦ ਦੀ ਸ਼ਿਕਾਰ ਹੋਏ ਹੋਵੇ ਇਸ ਤੋਂ ਪਹਿਲਾਂ ਪ੍ਰਿਯੰਕਾ ਚੋਪੜਾ ਨੂੰ ਵੀ ਲੋਕ ਇੰਝ ਹੀ ਰੰਗ ਨੂੰ ਲੈ ਕੇ ਟਿੱਪਣੀਆਂ ਕਰਦੇ ਸਨ ਪਰ ਪ੍ਰਿਯੰਕਾ ਨੇ ਕਿਸੇ ਦੀ ਪਰਵਾਹ ਨਾ ਕੀਤੀ ਅਤੇ ਅਤੇ ਮਿਹਨਤ ਸਦਕਾ ਅੱਜ ਦੇਸ਼ ਹੀ ਨਹੀਂ ਵਿਦੇਸ਼ ਵਿਚ ਵੀ ਸਫਲ ਅਦਾਕਾਰਾ ਹੈ।