ਸਪੋਕਸਮੈਨ ਨੇ ਪੜਤਾਲ ਵਿਚ ਪਾਇਆ ਕਿ ਇਸ ਤਸਵੀਰ ਵਿਚ ਰਿੰਕੂ ਅਤੇ ਉਸਦੀ ਮਾਂ ਨਹੀਂ ਹਨ। ਵਾਇਰਲ ਤਸਵੀਰ ਬਿਹਾਰ ਦੇ ਮੂੰਗੇਰ ਵਿਚ ਵਾਪਰੀ ਇੱਕ ਪੁਰਾਣੀ ਘਟਨਾ ਦੀ ਹੈ।
ਰੋਜ਼ਾਨਾ ਸਪੋਕਸਮੈਨ( ਮੋਹਾਲੀ ਟੀਮ) - ਦਿੱਲੀ ਦੇ ਮੰਗੋਲਪੁਰੀ ਵਿਚ ਹੋਏ ਰਿੰਕੂ ਸ਼ਰਮਾ ਦੇ ਕਤਲ ਤੋਂ ਬਾਅਦ ਘਟਨਾ ਨੂੰ ਲੈ ਕੇ ਕਈ ਤਸਵੀਰਾਂ ਅਤੇ ਵੀਡੀਓ ਵਾਇਰਲ ਹੋਏ। ਹੁਣ ਇਸੇ ਕ੍ਰਮ ਵਿਚ ਇੱਕ ਤਸਵੀਰ ਵਾਇਰਲ ਹੋ ਰਹੀ ਹੈ ਜਿਸ ਦੇ ਵਿਚ ਇੱਕ ਔਰਤ ਦੀ ਗੋਦ ਵਿਚ ਇੱਕ ਮ੍ਰਿਤਕ ਨੌਜਵਾਨ ਨੂੰ ਵੇਖਿਆ ਜਾ ਸਕਦਾ ਹੈ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਇਹ ਤਸਵੀਰ ਰਿੰਕੂ ਦੀ ਮਾਂ ਦੀ ਹੈ ਜਿਸ ਦੀ ਗੋਦ ਵਿਚ ਰਿੰਕੂ ਦੀ ਲਾਸ਼ ਪਈ ਹੋਈ ਹੈ।
ਸਪੋਕਸਮੈਨ ਨੇ ਵਾਇਰਲ ਦਾਅਵੇ ਦੀ ਪੜਤਾਲ ਕੀਤੀ ਅਤੇ ਪਾਇਆ ਕਿ ਇਸ ਤਸਵੀਰ ਵਿਚ ਰਿੰਕੂ ਅਤੇ ਉਸਦੀ ਮਾਂ ਨਹੀਂ ਹਨ। ਵਾਇਰਲ ਤਸਵੀਰ ਬਿਹਾਰ ਦੇ ਮੂੰਗੇਰ ਵਿਚ ਵਾਪਰੀ ਇੱਕ ਪੁਰਾਣੀ ਘਟਨਾ ਦੀ ਹੈ।
ਵਾਇਰਲ ਪੋਸਟ
ਟਵਿੱਟਰ ਯੂਜ਼ਰ SAURABH Dhaakad RAJPUT ਨੇ 12 ਫਰਵਰੀ ਨੂੰ ਵਾਇਰਲ ਤਸਵੀਰ ਸ਼ੇਅਰ ਕਰਦੇ ਹੋਏ ਕੈਪਸ਼ਨ ਲਿਖਿਆ, Tears of a Mother...The Debt on the Soul of #Nation.????????????????
#RinkuSharma #JusticeForRinkuSharma #RinkuSharmaLyingching #NarendraModi #AmitShah
ਵਾਇਰਲ ਪੋਸਟ ਦਾ ਅਰਕਾਇਵਡ ਲਿੰਕ
ਪੜਤਾਲ
ਪੜਤਾਲ ਦੀ ਸ਼ੁਰੂਆਤ ਕਰਦੇ ਹੋਏ ਅਸੀਂ ਸਭ ਤੋਂ ਪਹਿਲਾਂ ਵਾਇਰਲ ਤਸਵੀਰ ਨੂੰ ਗੂਗਲ ਰਿਵਰਸ ਇਮੇਜ ਟੂਲ ਵਿਚ ਅਪਲੋਡ ਕਰ ਸਰਚ ਕੀਤਾ। ਸਰਚ ਦੇ ਨਤੀਜਿਆਂ ਵਿਚ ਸਾਨੂੰ ਇਹ ਤਸਵੀਰ ਅਕਤੂਬਰ 2020 ਵਿਚ ਸ਼ੇਅਰ ਕੀਤੀ ਮਿਲੀ। ਤਸਵੀਰ ਨੂੰ ਸ਼ੇਅਰ ਕਰਦੇ ਹੋਏ ਦਾਅਵਾ ਕੀਤਾ ਗਿਆ ਕਿ ਇਹ ਤਸਵੀਰ ਬਿਹਾਰ ਦੇ ਮੂੰਗੇਰ ਵਿਚ ਵਾਪਰੀ ਇੱਕ ਘਟਨਾ ਤੋਂ ਬਾਅਦ ਦੀ ਹੈ।
ਵਾਇਰਲ ਤਸਵੀਰ ਨੂੰ ਲੈ ਕੇ ਅਸੀਂ ਹੋਰ ਖਬਰਾਂ ਸਰਚ ਕੀਤੀਆਂ। ਸਰਚ ਦੌਰਾਨ ਸਾਨੂੰ ਇਹ ਤਸਵੀਰ The Kreatly ਵੈੱਬਸਾਈਟ 'ਤੇ ਅਪਲੋਡ ਰਿਪੋਰਟ ਵਿਚ ਮਿਲੀ। ਇਕ ਖ਼ਬਰ 29 ਅਕਤੂਬਰ 2020 ਨੂੰ ਅਪਲੋਡ ਕੀਤੀ ਗਈ ਸੀ। ਇਸ ਖ਼ਬਰ ਨੂੰ ਅਪਲੋਡ ਕਰਦਿਆਂ ਸਿਰਲੇਖ ਲਿਖਿਆ ਗਿਆ, "Letter To Bharatiya Janta Party"
ਅੱਗੇ ਵੱਧਦੇ ਹੋਏ ਅਸੀਂ ਮਾਮਲੇ ਨੂੰ ਲੈ ਕੇ ਹੋਰ ਖ਼ਬਰਾਂ ਲੱਭਣੀਆਂ ਸ਼ੁਰੂ ਕੀਤੀਆਂ। ਸਾਨੂੰ ਇਹ ਤਸਵੀਰ thehawk ਦੀ ਇੱਕ ਖ਼ਬਰ ਵਿਚ ਵੀ ਪ੍ਰਕਾਸ਼ਿਤ ਮਿਲੀ। ਇਹ ਖ਼ਬਰ 25 ਦਿਸੰਬਰ 2020 ਨੂੰ ਪ੍ਰਕਾਸ਼ਿਤ ਕੀਤੀ ਗਈ ਸੀ ਅਤੇ ਇਸ ਨੂੰ ਅਪਲੋਡ ਕਰਦਿਆਂ ਸਿਰਲੇਖ ਦਿੱਤਾ ਗਿਆ, "Munger Police Firing: PIL filed in patna high court
ਕੀ ਸੀ ਮੂੰਗੇਰ ਮਾਮਲਾ
27 ਅਕਤੂਬਰ 2020 ਨੂੰ ਪ੍ਰਕਾਸ਼ਿਤ ਦੈਨਿਕ ਜਾਗਰਣ ਦੀ ਖ਼ਬਰ ਵਿਚ ਸਾਨੂੰ ਮਾਮਲੇ ਨੂੰ ਲੈ ਕੇ ਪੂਰੀ ਜਾਣਕਾਰੀ ਮਿਲੀ। ਸਾਨੂੰ ਇਸ ਖ਼ਬਰ ਵਿਚ ਘਟਨਾ ਨਾਲ ਸਬੰਧਿਤ ਕਈ ਤਸਵੀਰਾਂ ਅਪਲੋਡ ਕੀਤੀਆਂ ਮਿਲੀਆਂ। ਖ਼ਬਰ ਨੂੰ ਪ੍ਰਕਾਸ਼ਿਤ ਕਰਦਿਆਂ ਸਿਰਲੇਖ ਲਿਖਿਆ ਗਿਆ, "Munger News: दुर्गा प्रतिमा विसर्जन के दौरान हिंसक झड़प और फायरिंग, एक की मौत, पुलिसकर्मी सहित कई जख्मी"
ਖ਼ਬਰ ਅਨੁਸਾਰ, ''ਦੱਸਿਆ ਜਾ ਰਿਹਾ ਹੈ ਕਿ ਮੂੰਗੇਰ ਵਿਚ ਵੱਡੀ ਦੁਰਗਾ ਦੇ ਵਿਸਰਜਨ ਤੋਂ ਬਾਅਦ ਹੀ ਹੋਰ ਦੁਰਗਾ ਮੂਰਤੀ ਦਾ ਵਿਸਰਜ ਹੁੰਦਾ ਹੈ। ਦੁਰਗਾ ਮਾਂ ਦੀ ਵੱਡੀ ਮੂਰਤੀ ਦਾ ਵਿਸਰਜਨ ਹੋ ਰਿਹਾ ਸੀ ਜਿਸ ਨੂੰ 32 ਕਹਾਰਾਂ ਨੇ ਚੁੱਕਿਆ ਹੋਇਆ ਸੀ। ਇਸੇ ਕਾਰਨ ਮੂਰਤੀ ਹੌਲੀ-ਹੌਲੀ ਅੱਗੇ ਵਧ ਰਹੀ ਸੀ ਪਰ ਉੱਥੇ ਮੌਜੂਦ ਪੁਲਿਸ ਮੂਰਤੀ ਨੂੰ ਜਲਦ ਤੋਂ ਜਲਦ ਵਿਸਰਜਨ ਕਰਵਾਉਣਾ ਚਾਹੁੰਦੀ ਸੀ। ਇਸੇ ਨੂੰ ਲੈ ਕੇ ਪੁਲਿਸ ਅਤੇ ਵਿਸਰਜਨ ਮੌਕੇ ਮੌਜੂਦ ਲੋਕਾਂ ਵਿਚਕਾਰ ਝੜਪ ਹੋ ਗਈ ਅਤੇ ਪੁਲਿਸ ਨੇ ਲਾਠੀਚਾਰਜ ਕਰਨਾ ਸ਼ੁਰੂ ਕਰ ਦਿੱਤਾ ਜਿਸ ਦੇ ਜਵਾਬ ਵਿਚ ਲੋਕਾਂ ਨੇ ਵੀ ਪੁਲਿਸ 'ਤੇ ਪਥਰਾਅ ਕੀਤਾ। ਇਸ ਤੋਂ ਬਾਅਦ ਫਾਇਰਿੰਗ ਹੋਈ ਅਤੇ ਗੋਲੀ ਲੱਗਣ ਨਾਲ ਕੋਤਵਾਲੀ ਥਾਣਾ ਖੇਤਰ ਦੇ ਲੋਹਾਪੱਟੀ ਨਿਵਾਸੀ ਅਨੁਰਾਗ ਕੁਮਾਰ ਦੀ ਘਟਨਾ ਵਾਲੀ ਜਗ੍ਹਾ 'ਤੇ ਹੀ ਮੌਤ ਹੋ ਗਈ। ਵਾਇਰਲ ਤਸਵੀਰ ਵੀ ਇਸੇ ਘਟਨਾ ਦੈਰਾਨ ਦੀ ਹੈ।''
ਘਟਨਾ ਨਾਲ ਜੁੜੀਆਂ ਕੁੱਝ ਤਸਵੀਰਾਂ
ਨਤੀਜਾ - ਸਪੋਕਸਮੈਨ ਨੇ ਵਾਇਰਲ ਦਾਅਵੇ ਦੀ ਪੜਤਾਲ ਕੀਤੀ ਅਤੇ ਪਾਇਆ ਕਿ ਇਸ ਤਸਵੀਰ ਵਿਚ ਰਿੰਕੂ ਅਤੇ ਉਸ ਦੀ ਮਾਂ ਨਹੀਂ ਹਨ। ਵਾਇਰਲ ਤਸਵੀਰ ਬਿਹਾਰ ਦੇ ਮੂੰਗੇਰ ਵਿਚ ਵਾਪਰੀ ਇੱਕ ਪੁਰਾਣੀ ਘਟਨਾ ਦੀ ਹੈ।
Claim:ਇਹ ਤਸਵੀਰ ਰਿੰਕੂ ਦੀ ਮਾਂ ਦੀ ਹੈ ਜਿਸ ਦੀ ਗੋਦ ਵਿਚ ਰਿੰਕੂ ਦੀ ਲਾਸ਼ ਪਈ ਹੋਈ ਹੈ।
Claimed By:ਟਵਿੱਟਰ ਯੂਜ਼ਰ SAURABH Dhaakad RAJPUT
Fact Check:ਫਰਜ਼ੀ
