ਸਪੋਕਸਮੈਨ ਨੇ ਪੜਤਾਲ 'ਚ ਪਾਇਆ ਕਿ ਵਾਇਰਲ ਵੀਡੀਓ ਵਿਚ ਦਿਖ ਰਿਹਾ ਵਿਅਕਤੀ ਹਿਮਾਲਿਆ ਕੰਪਨੀ ਦਾ ਮਾਲਿਕ ਨਹੀਂ ਬਲਕਿ ਸਿਆਸੀ ਪਾਰਟੀ ਸਪਾ ਦਾ ਸਾਬਕਾ ਵਿਧਾਇਕ ਮਾਵਿਆ ਅਲੀ ਹੈ।
ਰੋਜ਼ਾਨਾ ਸਪੋਕਸਮੈਨ (ਮੋਹਾਲੀ ਟੀਮ) - ਸੋਸ਼ਲ ਮੀਡੀਆ 'ਤੇ ਇੱਕ ਵੀਡੀਓ ਵਾਇਰਲ ਹੋ ਰਿਹਾ ਹੈ ਜਿਸ ਦੇ ਵਿਚ ਇੱਕ ਵਿਅਕਤੀ ਨੂੰ "ਅਸੀਂ ਮੁਸਲਮਾਨ ਪਹਿਲਾਂ ਹਾਂ, ਭਾਰਤੀ ਬਾਅਦ 'ਚ" ਬੋਲਦੇ ਸੁਣਿਆ ਜਾ ਸਕਦਾ ਹੈ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਇਹ ਵਿਅਕਤੀ ਹੋਰ ਕੋਈ ਨਹੀਂ ਬਲਕਿ ਮਸ਼ਹੂਰ ਦਵਾ ਕੰਪਨੀ ਹਿਮਾਲਿਆ ਦਾ ਮਾਲਿਕ ਹੈ। ਇਸ ਪੋਸਟ ਵਿਚ ਹਿਮਾਲਿਆ ਦੇ ਉਤਪਾਦਾਂ ਦਾ ਬਾਈਕਾਟ ਕਰਨ ਦੀ ਵੀ ਅਪੀਲ ਕੀਤੀ ਜਾ ਰਹੀ ਹੈ।
ਸਪੋਕਸਮੈਨ ਨੇ ਵੀਡੀਓ ਦੀ ਪੜਤਾਲ ਕੀਤੀ ਅਤੇ ਪਾਇਆ ਕਿ ਵਾਇਰਲ ਵੀਡੀਓ ਵਿਚ ਦਿਖ ਰਿਹਾ ਵਿਅਕਤੀ ਹਿਮਾਲਿਆ ਕੰਪਨੀ ਦਾ ਮਾਲਿਕ ਨਹੀਂ ਬਲਕਿ ਸਿਆਸੀ ਪਾਰਟੀ ਸਪਾ ਦਾ ਸਾਬਕਾ ਵਿਧਾਇਕ ਮਾਵਿਆ ਅਲੀ ਹੈ। ਇਹ ਵੀਡੀਓ ਫਰਜੀ ਦਾਅਵੇ ਨਾਲ ਵਾਇਰਲ ਕੀਤਾ ਜਾ ਰਿਹਾ ਹੈ।
ਵਾਇਰਲ ਪੋਸਟ
ਟਵਿੱਟਰ ਯੂਜ਼ਰ Kiran Babarao Jodh???? (प्रदेश-अध्यक्ष-AHR) ਨੇ ਵਾਇਰਲ ਵੀਡੀਓ 21 ਮਈ 2021 ਨੂੰ ਸ਼ੇਅਰ ਕਰਦਿਆਂ ਲਿਖਿਆ, "☝️ हिमालया कंपनी के मालिक का बयान‼️हम पहले मुसलमान है, हम भारत के प्रति वफादार नहीं है, हम भारत के मालिक हैं. सोचिए ऐसा कोई बयान अगर बाबा रामदेव ने दे दिया होता तो पूरे देश में बवाल मच जाता.. हिमालय कम्पनी की दवाइयों का सभी बहिष्कार करें. ????"
ਵਾਇਰਲ ਪੋਸਟ ਦਾ ਟਵਿੱਟਰ ਲਿੰਕ।
ਪੜਤਾਲ
ਪੜਤਾਲ ਦੀ ਸ਼ੁਰੂਆਤ ਕਰਦੇ ਹੋਏ ਅਸੀਂ ਸਭ ਤੋਂ ਪਹਿਲਾਂ ਵੀਡੀਓ ਨੂੰ ਧਿਆਨ ਨਾਲ ਵੇਖਿਆ। ਜਿਸ ਤੋਂ ਪਤਾ ਲੱਗਾ ਕਿ ਵੀਡੀਓ ਆਜਤਕ ਨਿਊਜ਼ ਚੈਨਲ ਦਾ ਬੁਲੇਟਿਨ ਹੈ ਅਤੇ ਇਸ ਵੀਡੀਓ ਵਿਚ ਬਿਆਨ ਦੇ ਰਹੇ ਵਿਅਕਤੀ ਦਾ ਨਾਂਅ ਮਾਵਿਆ ਅਲੀ, ਸਾਬਕਾ ਸਪਾ ਨੇਤਾ ਦੱਸਿਆ ਜਾ ਰਿਹਾ ਹੈ।
ਅੱਗੇ ਵੱਧਦੇ ਹੋਏ ਅਸੀਂ ਮਾਮਲੇ ਨੂੰ ਲੈ ਕੇ ਖਬਰਾਂ ਲੱਭਣੀਆਂ ਸ਼ੁਰੂ ਕੀਤੀਆਂ। ਇਹ ਮਾਮਲਾ ਅਸਲ ਵਿਚ 2017 ਦਾ ਹੈ। ਸਾਨੂੰ ਟਵਿੱਟਰ 'ਤੇ ਰਿਪਬਲਿਕ ਨਿਊਜ਼ ਵੱਲੋਂ ਕੀਤੇ ਟਵੀਟ ਵਿਚ ਮਾਮਲੇ ਨੂੰ ਲੈ ਕੇ ਵੀਡੀਓ ਮਿਲਿਆ। ਇਹ ਟਵੀਟ 14 ਅਗਸਤ 2017 ਨੂੰ ਕੀਤਾ ਗਿਆ ਸੀ ਅਤੇ ਇਸ ਨੂੰ ਅਪਲੋਡ ਕਰਦੇ ਹੋਏ ਲਿਖਿਆ ਗਿਆ, "We are Muslims first, Indians after that: Mavia Ali, SP #PoliticsOverPatriotism"
ਇਹ ਟਵੀਟ ਹੇਠਾਂ ਕਲਿਕ ਕਰ ਵੇਖਿਆ ਜਾ ਸਕਦਾ ਹੈ।
We are Muslims first, Indians after that: Mavia Ali, SP #PoliticsOverPatriotism pic.twitter.com/olZHzxKEhD
— Republic (@republic) August 14, 2017
ਇਸ ਮਾਮਲੇ ਨੂੰ ਲੈ ਕੇ India Today ਦੀ ਖਬਰ ਇਥੇ ਕਲਿਕ ਕਰ ਪੜ੍ਹੀ ਜਾ ਸਕਦੀ ਹੈ।
ਮਤਲਬ ਸਾਫ਼ ਸੀ ਕਿ ਵੀਡੀਓ ਸਪਾ ਨੇਤਾ ਮਾਵਿਆ ਅਲੀ ਦਾ ਹੈ। ਅੱਗੇ ਵੱਧਦੇ ਹੋਏ ਅਸੀਂ ਹਿਮਾਲਿਆ ਕੰਪਨੀ ਬਾਰੇ ਸਰਚ ਕਰਨਾ ਸ਼ੁਰੂ ਕੀਤਾ।
ਦੱਸ ਦੀਏ ਕਿ ਹਿਮਾਲਿਆ ਕੰਪਨੀ ਦੇ ਮਾਲਕ ਮੁਹੰਮਦ ਮਨਲ ਸਨ, ਜਿਨ੍ਹਾਂ ਨੇ 1930 ਵਿਚ ਕੰਪਨੀ ਦੀ ਸਥਾਪਨਾ ਉੱਤਰਖੰਡ ਵਿਚ ਕੀਤੀ ਸੀ ਅਤੇ 1986 ਵਿਚ ਉਹਨਾਂ ਦਾ ਦੇਹਾਂਤ ਹੋ ਚੁੱਕਾ ਹੈ। ਮੁੰਹਮਦ ਮਨਲ ਇਕ ਸ਼ਾਂਤ ਸੁਭਾਅ ਦੇ ਵਿਅਕਤੀ ਸਨ ਅਤੇ ਉਹਨਾਂ ਦੇ ਨਜ਼ਦੀਕੀ ਉਹਨਾਂ ਨੂੰ ਇਸ ਪ੍ਰਰਣਾਦਾਇਕ ਵਿਅਕਤੀ ਵਜੋਂ ਯਾਦ ਕਰਦੇ ਸਨ। ਉਹ ਫੁਰਤੀਲੇ ਦਿਮਾਗ ਦੇ ਅਤੇ ਦੂਰਦਰਸ਼ੀ ਵਿਅਕਤੀ ਸਨ ਅਤੇ ਉਹਨਾਂ ਦੀ ਵਿਰਾਸਤ ਹਿਮਾਲਿਆ ਵਿਚ ਹਮੇਸ਼ਾਂ ਮੌਜੂਦ ਰਹੇਗੀ।
ਇਹ ਪਹਿਲੀ ਵਾਰ ਨਹੀਂ ਜਦੋਂ ਹਿਮਾਲਿਆ ਕੰਪਨੀ ਦੇ ਮਾਲਿਕ ਨੂੰ ਲੈ ਕੇ ਫਰਜੀ ਖਬਰਾਂ ਫੈਲਾਈਆਂ ਗਈਆਂ ਹੋਣ। ਬੀਤੇ ਦਿਨੀਂ ਇੱਕ ਪੋਸਟ ਵਾਇਰਲ ਕਰਦੇ ਹੋਏ ਦਾਅਵਾ ਕੀਤਾ ਜਾ ਰਿਹਾ ਸੀ ਕਿ ਹਿਮਾਲਿਆ ਕੰਪਨੀ ਅਤਿਵਾਦੀਆਂ ਨੂੰ ਫੰਡਿੰਗ ਕਰਦੀ ਹੈ ਅਤੇ ਹਿਮਾਲਿਆ ਦੇ CEO ਦੀ ਤਸਵੀਰ ਲਾ ਕੇ ਕੰਪਨੀ ਦਾ ਮਾਲਿਕ ਦੱਸਿਆ ਜਾ ਰਿਹਾ ਸੀ। ਸਪੋਕਸਮੈਨ ਨੇ ਮਾਮਲੇ ਨੂੰ ਲੈ ਕੇ Fact Check ਕੀਤਾ ਸੀ ਜਿਸਨੂੰ ਇੱਥੇ ਕਲਿਕ ਕਰ ਪੜ੍ਹਿਆ ਜਾ ਸਕਦਾ ਹੈ।
ਨਤੀਜਾ - ਸਪੋਕਸਮੈਨ ਨੇ ਵੀਡੀਓ ਦੀ ਪੜਤਾਲ ਕੀਤੀ ਅਤੇ ਪਾਇਆ ਕਿ ਵਾਇਰਲ ਵੀਡੀਓ ਵਿਚ ਦਿਖ ਰਿਹਾ ਵਿਅਕਤੀ ਹਿਮਾਲਿਆ ਕੰਪਨੀ ਦਾ ਮਾਲਿਕ ਨਹੀਂ ਬਲਕਿ ਸਿਆਸੀ ਪਾਰਟੀ ਸਪਾ ਦਾ ਸਾਬਕਾ ਵਿਧਾਇਕ ਮਾਵਿਆ ਅਲੀ ਹੈ। ਇਹ ਵੀਡੀਓ ਫਰਜੀ ਦਾਅਵੇ ਨਾਲ ਵਾਇਰਲ ਕੀਤਾ ਜਾ ਰਿਹਾ ਹੈ।
Claim: ਵੀਡੀਓ ਵਿਚ ਮਸ਼ਹੂਰ ਦਵਾ ਕੰਪਨੀ ਹਿਮਾਲਿਆ ਦਾ ਮਾਲਿਕ
Claimed By: ਟਵਿੱਟਰ ਯੂਜ਼ਰ Kiran Babarao Jodh???? (प्रदेश-अध्यक्ष-AHR)
fact Check: ਫਰਜੀ
