![Paddy Stubble Burning Paddy Stubble Burning](/cover/prev/7m928oehb04ti8c2ecakae4uq1-20231030151805.Medi.jpeg)
ਪੰਜਾਬ ਵਿਚ ਇਸ ਸਾਲ 29 ਅਕਤੂਬਰ ਤੱਕ 5,254 ਮਾਮਲੇ ਸਾਹਮਣੇ ਆਏ, ਜਦਕਿ ਹਰਿਆਣਾ ਵਿਚ 1,094 ਮਾਮਲੇ ਸਨ।
ਚੰਡੀਗੜ੍ਹ - ਇੰਡੀਅਨ ਕੌਂਸਲ ਆਫ਼ ਐਗਰੀਕਲਚਰਲ ਰਿਸਰਚ (ICAR) ਦੁਆਰਾ ਜਾਰੀ ਕੀਤੇ ਗਏ ਅੰਕੜਿਆਂ ਨੇ ਇੱਕ ਹੈਰਾਨੀਜਨਕ ਰੁਝਾਨ ਦਾ ਖੁਲਾਸਾ ਕੀਤਾ ਹੈ ਜਿਸ ਵਿਚ ਤਿੰਨ ਰਾਜਾਂ - ਉੱਤਰ ਪ੍ਰਦੇਸ਼, ਰਾਜਸਥਾਨ ਅਤੇ ਮੱਧ ਪ੍ਰਦੇਸ਼ - ਵਿੱਚ ਝੋਨੇ ਦੀ ਵਾਢੀ ਦੇ ਇਸ ਸੀਜ਼ਨ ਵਿਚ ਘੱਟ ਖੇਤਾਂ ਵਿਚ ਅੱਗ ਲੱਗਣ ਦੇ ਮਾਮਲੇ ਦਰਜ ਕੀਤੇ ਗਏ ਹਨ।
ਇਸ ਦੇ ਉਲਟ, ਜਿਹੜੇ ਰਾਜਾਂ ਨੇ ਰਵਾਇਤੀ ਤੌਰ 'ਤੇ ਪਰਾਲੀ ਸਾੜਨ ਦੇ ਵਧੇਰੇ ਮਾਮਲੇ ਦਰਜ ਕੀਤੇ ਹਨ - ਪੰਜਾਬ, ਹਰਿਆਣਾ ਅਤੇ ਦਿੱਲੀ - ਇਸ ਸਾਲ ਲਗਭਗ 50% ਘੱਟ ਕੇਸ ਦਰਜ ਕੀਤੇ ਗਏ ਹਨ। ਇਸ ਸੀਜ਼ਨ ਵਿਚ ਸੈਟੇਲਾਈਟ ਰਿਮੋਟ ਸੈਂਸਿੰਗ ਰਾਹੀਂ ਇਨ੍ਹਾਂ ਛੇ ਰਾਜਾਂ ਵਿਚ 15 ਸਤੰਬਰ ਤੋਂ 29 ਅਕਤੂਬਰ ਤੱਕ ਝੋਨੇ ਦੀ ਪਰਾਲੀ ਸਾੜਨ ਦੇ ਕੁੱਲ 10,422 ਮਾਮਲੇ ਸਾਹਮਣੇ ਆਏ ਹਨ।
ਪੰਜਾਬ ਵਿਚ ਇਸ ਸਾਲ 29 ਅਕਤੂਬਰ ਤੱਕ 5,254 ਮਾਮਲੇ ਸਾਹਮਣੇ ਆਏ, ਜਦਕਿ ਹਰਿਆਣਾ ਵਿਚ 1,094 ਮਾਮਲੇ ਸਨ। ਉੱਤਰ ਪ੍ਰਦੇਸ਼, ਰਾਜਸਥਾਨ, ਮੱਧ ਪ੍ਰਦੇਸ਼ ਅਤੇ ਦਿੱਲੀ ਵਿਚ ਕ੍ਰਮਵਾਰ 887, 774, 2411 ਅਤੇ 2 ਮਾਮਲੇ ਦਰਜ ਕੀਤੇ ਗਏ ਹਨ। ਪੰਜਾਬ ਵਿਚ 2023 ਵਿਚ 5,254 ਅੱਗ ਲੱਗਣ ਦੀਆਂ ਘਟਨਾਵਾਂ ਦਰਜ ਕੀਤੀਆਂ ਗਈਆਂ, ਜੋ ਚਾਰ ਸਾਲਾਂ ਵਿਚ ਸਭ ਤੋਂ ਘੱਟ ਹਨ
ਜਦੋਂ ਕਿ ਪਿਛਲੇ ਸਾਲ 12,112 ਕੇਸ, 2021 ਵਿਚ 9,001 ਅਤੇ 2020 ਵਿਚ 25,766 ਅੱਗ ਲਗਾਉਣ ਦੀਆਂ ਘਟਨਾਵਾਂ ਵਾਪਰੀਆਂ ਸਨ। ਹਰਿਆਣਾ ਵਿਚ 1,094 ਮਾਮਲੇ ਦਰਜ ਕੀਤੇ ਗਏ, ਜੋ ਕਿ ਚਾਰ ਸਾਲਾਂ ਵਿਚ ਸਭ ਤੋਂ ਘੱਟ ਹਨ, ਪਿਛਲੇ ਸਾਲ 1,813 ਕੇਸਾਂ ਦੇ ਮੁਕਾਬਲੇ, 2021 ਵਿਚ 2,413 ਮਾਮਲੇ ਅਤੇ 2020 ਵਿਚ ਇਸੇ ਸਮੇਂ ਦੌਰਾਨ ਅੱਗ ਲੱਗਣ ਦੇ 2,136 ਮਾਮਲੇ ਦਰਜ ਕੀਤੇ ਗਏ।
ਐਤਵਾਰ ਨੂੰ ਪੰਜਾਬ 'ਚ 1068, ਹਰਿਆਣਾ 'ਚ 75, ਉੱਤਰ ਪ੍ਰਦੇਸ਼ 'ਚ 48, ਮੱਧ ਪ੍ਰਦੇਸ਼ 'ਚ 372, ਰਾਜਸਥਾਨ 'ਚ 73 ਅਤੇ ਦਿੱਲੀ 'ਚ 0 ਅੱਗ ਲੱਗਣ ਦੇ ਮਾਮਲੇ ਸਾਹਮਣੇ ਆਏ ਹਨ। ਐਤਵਾਰ ਨੂੰ ਪਰਾਲੀ ਸਾੜਨ ਦੇ ਮਾਮਲੇ ਵੀ ਇਸ ਸੀਜ਼ਨ ਵਿਚ ਇੱਕ ਦਿਨ ਵਿਚ ਸਭ ਤੋਂ ਵੱਧ ਰਿਕਾਰਡ ਕੀਤੇ ਗਏ ਹਨ। ਪੰਜਾਬ 'ਚ ਇਸ ਸਾਲ ਸਭ ਤੋਂ ਵੱਧ 1,060 ਮਾਮਲੇ ਅੰਮ੍ਰਿਤਸਰ ਤੋਂ ਸਾਹਮਣੇ ਆਏ ਹਨ
ਇਸ ਤੋਂ ਬਾਅਦ ਤਰਨਤਾਰਨ 'ਚ 646, ਪਟਿਆਲਾ 'ਚ 614, ਸੰਗਰੂਰ 'ਚ 564, ਫਿਰੋਜ਼ਪੁਰ 'ਚ 517, ਮਾਨਸਾ 'ਚ 271, ਫਤਿਹਗੜ੍ਹ ਸਾਹਿਬ 'ਚ 224 ਮਾਮਲੇ ਸਾਹਮਣੇ ਆਏ ਹਨ। ਕਪੂਰਥਲਾ ਅਤੇ ਲੁਧਿਆਣਾ ਜ਼ਿਲੇ 'ਚ 170, ਮੋਗਾ 'ਚ 170, ਜਲੰਧਰ 'ਚ 141, ਗੁਰਦਾਸਪੁਰ 'ਚ 109, ਫਰੀਦਕੋਟ 'ਚ 104 ਮਾਮਲੇ ਅਤੇ ਬਾਕੀ 9 ਜ਼ਿਲਿਆਂ 'ਚ ਇਕ ਤੋਂ 83 ਮਾਮਲੇ ਸਾਹਮਣੇ ਆਏ ਹਨ।