ਨਵੀਂ ਦਿੱਲੀ: 31 ਅਕਤੂਬਰ (ਅਮਨਦੀਪ ਸਿੰਘ): '21 ਵੀਂ ਸਦੀ 'ਚ ਸਿੱਖ' ਵਿਸ਼ੇ 'ਤੇ ਹੋਈ ਚਰਚਾ ਵਿਚ ਸ਼ਾਮਲ ਹੁੰਦਿਆਂ ਸਾਬਕਾ ਕੇਂਦਰੀ ਮੰਤਰੀ ਡਾ. ਮਨੋਹਰ ਸਿੰਘ ਗਿੱਲ ਨੇ ਵੱਡੇ ਸਿੱਖ ਅਦਾਰਿਆਂ ਵਲੋਂ ਲਏ ਜਾਂਦੇ ਫ਼ੈਸਲਿਆਂ 'ਚ ਇਕਮੁੱਠਤਾ ਦੀ ਲੋੜ 'ਤੇ ਜ਼ੋਰ ਦਿਤਾ ਹੈ।ਉਨਾਂ੍ਹ ਕਿਹਾ ਕਿ ਵੱਡੇ ਸਿੱਖ ਅਦਾਰਿਆਂ ਵਲੋਂ ਲਏ ਜਾਣ ਵਾਲੇ ਫ਼ੈਸਲਿਆਂ ਵਿਚ ਇਕਮੁੱਠਤਾ ਹੋਣੀ ਚਾਹੀਦੀ ਹੈ ਤਾਕਿ ਉਹ ਅਪਣਾ ਅਸਰ ਕਾਇਮ ਰੱਖਣ ਸਕਣਗੇ। ਡਾ.ਗਿੱਲ ਦਾ ਕਹਿਣਾ ਸੀ ਕਿ ਭਾਵੇਂ ਅੱਜ ਵੱਖ-ਵੱਖ ਮੁਲਕਾਂ ਦੀ ਸਿਆਸਤ ਵਿਚ ਸਿੱਖਾਂ ਨੇ ਥਾਂ ਹਾਸਲ ਕੀਤੀ ਹੈ, ਪਰ ਭਵਿੱਖ ਦੇ ਨਵੇਂ ਰਾਹ ਤਲਾਸ਼ਣ ਲਈ ਸਿੱਖਾਂ ਨੂੰ ਆਪਸੀ ਵਿਤਕਰਿਆਂ ਤੋਂ ਉੱਪਰ ਉੱਠ ਕੇ ਫ਼ੈਸਲੇ ਲੈਣ ਦੀ ਲੋੜ ਹੈ। ਇਥੋਂ ਦੇ ਭਾਈ ਵੀਰ ਸਿੰਘ ਸਾਹਿਤ ਸਦਨ, ਨੇੜੇ ਗੋਲ ਮਾਰਕਿਟ ਵਿਖੇ ਕਰਵਾਏ ਗਏ ਭਾਈ ਚਾਨਣ ਸਿੰਘ ਸਾਲਾਨਾ ਯਾਦਗਾਰੀ ਭਾਸ਼ਣ ਵਿਚ ਭਾਈ ਵੀਰ ਸਿੰਘ ਸਾਹਿਤ ਸਦਨ ਦੇ ਡਾਇਰੈਕਟਰ ਡਾ. ਮਹਿੰਦਰ ਸਿੰਘ ਨੇ ਕਿਹਾ ਕਿ ਆਲਮੀ ਪੱਧਰ 'ਤੇ ਸਿੱਖ ਪੰਥ ਨੂੰ 21 ਵੀਂ ਸਦੀ ਦੀਆਂ ਵੰਗਾਰਾਂ ਨੂੰ ਨਜਿੱਠਣ ਲਈ ਸੁਚੇਤ ਹੋ ਕੇ,
ਗੁਰਮਤਿ ਰਵਾਇਤਾਂ ਤੋਂ ਸੇਧ ਲੈਣੀ ਚਾਹੀਦੀ ਹੈ, ਕਿਉਂਕਿ ਸਿੱਖ ਸਿਆਸਤ ਤੇ ਸਿੱਖ ਸਭਿਆਚਾਰ ਪਹਿਲੋਂ ਹੀ ਗੁਰਮਤਿ ਤੋਂ ਉਲਟ ਰਾਹ ਅਖਤਿਆਰ ਕਰ ਚੁਕੀ ਹੈ। ਜਵਾਹਰ ਲਾਲ ਨਹਿਰੂ ਯੂਨੀਵਰਸਟੀ ਦੇ ਦਰਸ਼ਨ ਮਹਿਕਮੇ ਦੇ ਸਾਬਕਾ ਪ੍ਰੋਫ਼ੈਸਰ ਸਤਯਪਾਲ ਗੌਤਮ ਨੇ 19 ਵੀਂ ਤੇ 20 ਵੀਂ ਸਦੀ ਦੀਆਂ ਸਿੱਖ ਵੰਗਾਰਾਂ ਦੀ ਪੜਚੋਲ ਕਰਦਿਆਂ ਕਿਹਾ ਕਿ ਜੇ 21 ਵੀਂ ਸਦੀ ਦੀਆਂ ਵੰਗਾਰਾਂ ਨਾਲ ਸਿਝਣਾ ਹੈ ਤਾਂ ਸਿੱਖਾਂ ਨੂੰ ਅਪਣੀਆਂ ਗਿਆਨ ਪ੍ਰੰਪਰਾਵਾਂ ਤੇ ਸਮਾਜ ਵਿਗਿਆਨਾਂ ਨੂੰ ਸਮਝ ਕੇ ਰਣਨੀਤੀ ਉਲੀਕਣੀ ਪਵੇਗੀ। ਭਾਈ ਚਾਨਣ ਸਿੰਘ ਦੇ ਪਰਵਾਰ ਵਲੋਂ ਸ਼ਾਮਲ ਹੋਏ ਡਾ. ਅਮਰਜੀਤ ਸਿੰਘ ਨੇ ਸਦਨ ਦੇ ਇਸ ਉਪਰਾਲੇ ਦੀ ਤਾਰੀਫ ਕੀਤੀ। ਇਸ ਮੌਕੇ ਡਾ. ਰਘਬੀਰ ਸਿੰਘ, ਪੁਡੂਚੇਰੀ ਦੇ ਸਾਬਕਾ ਰਾਜਪਾਲ ਇਕਬਾਲ ਸਿੰਘ, ਸਾਬਕਾ ਰਾਜ ਸਭਾ ਮੈਂਬਰ ਤਰਲੋਚਨ ਸਿੰਘ, ਪ੍ਰੋ. ਭਗਵਾਨ ਜੋਸ਼, ਡਾ.ਵਨੀਤਾ, ਡਾ. ਅਮਨਪ੍ਰੀਤ ਸਿੰਘ ਗਿੱਲ, ਡਾ. ਗੁਰਦੀਪ ਕੌਰ ਸਣੇ ਖੋਜ ਵਿਦਿਆਰਥੀ ਵੀ ਸ਼ਾਮਲ ਹੋਏ।
