ਕਰੀਮ ਅਤੇ ਚੀਨੀ ਨਾਲ ਬਣੀ ਕੈਰੇਮਲ ਕੈਂਡੀ ਜਿੰਨੀ ਸੋਹਣੀ ਦਿਸਦੀ ਹੈ, ਓਨੀ ਹੀ ਸਵਾਦ ਵੀ ਲਗਦੀ ਹੈ।
ਕਰੀਮ ਅਤੇ ਚੀਨੀ ਨਾਲ ਬਣੀ ਕੈਰੇਮਲ ਕੈਂਡੀ ਜਿੰਨੀ ਸੋਹਣੀ ਦਿਸਦੀ ਹੈ, ਓਨੀ ਹੀ ਸਵਾਦ ਵੀ ਲਗਦੀ ਹੈ। ਇਸ ਨੂੰ ਅਸੀ ਕਿਸੇ ਤਿਉਹਾਰ, ਜਨਮਦਿਨ ਜਾਂ ਵੇਲੇਂਟਾਇਨ ਡੇ ਦੇ ਗਿਫ਼ਟ ਲਈ ਵੀ ਬਣਾ ਸਕਦੇ ਹਾਂ।
ਜ਼ਰੂਰੀ ਸਮੱਗਰੀ: ਕਰੀਮ - 1 ਕੱਪ, ਬਰਾਊਨ ਸ਼ੂਗਰ - ਅੱਧਾ ਕੱਪ (100 ਗਰਾਮ), ਚੀਨੀ ਪਾਊਡਰ - ਅੱਧਾ ਕੱਪ (100 ਗਰਾਮ), ਮਿਲਕ ਪਾਊਡਰ - 1/4 ਕੱਪ (30 ਗਰਾਮ), ਸ਼ਹਿਦ - 1/4 ਕੱਪ (70 ਗਰਾਮ), ਮੱਖਣ - 2 ਵੱਡੇ ਚਮਚ, ਵਨੀਲਾ ਏਸੇਂਸ - 1 ਛੋਟੀ ਚਮਚ।
ਢੰਗ - ਕਿਸੇ ਮੋਟੇ ਤਲੇ ਦੇ ਬਰਤਨ ਵਿਚ ਕਰੀਮ ਪਾ ਲਉ, ਬਰਾਊਨ ਸ਼ੂਗਰ ਅਤੇ ਚੀਨੀ ਪਾਊਡਰ ਵੀ ਪਾ ਦਿਉ, ਮਿਲਕ ਪਾਊਡਰ ਪਾ ਕੇ ਚੰਗੀ ਤਰ੍ਹਾਂ ਮਿਲਾ ਦਿਉ ਅਤੇ ਮੱਠੇ ਸੇਕ ਉੱਤੇ ਲਗਾਤਾਰ ਚਲਾਉਂਦੇ ਹੋਏ ਪਕਾਉ। ਸ਼ਹਿਦ ਵੀ ਪਾ ਕੇ ਮਿਲਾ ਦਿਉ, ਮਿਸ਼ਰਣ ਨੂੰ ਜੰਮਣ ਵਾਲੀ ਕਨਸਿਸਟੇਂਸੀ ਤਕ ਪਕਾ ਲਵੋ। ਮਿਸ਼ਰਣ ਵਿਚ ਝੱਗ ਆਉਣ ਲਗਦੀ ਹੈ ਅਤੇ ਮਿਸ਼ਰਣ ਗਾੜ੍ਹਾ ਦਿਸਣ ਲਗਦਾ ਹੈ। ਪਲੇਟ ਉੱਤੇ ਇਕ ਬੂੰਦ ਸੁੱਟ ਕੇ ਵੇਖਿਆ ਜਾ ਸਕਦਾ ਹੈ ਕਿ ਮਿਸ਼ਰਣ ਜੰਮ ਜਾਵੇਗਾ ਜਾਂ ਨਹੀਂ। ਗੈਸ ਬੰਦ ਕਰ ਦਿਉ, ਮਿਸ਼ਰਣ ਵਿਚ ਮੱਖਣ ਪਾ ਕੇ ਮਿਲਾ ਦਿਉ, ਵਨੀਲਾ ਏਸੇਂਸ ਵੀ ਪਾ ਕੇ ਮਿਲਾ ਦਿਉ।
ਕੈਂਡੀ ਨੂੰ ਜਮਾਉਣ ਲਈ ਟ੍ਰੇ ਤਿਆਰ ਕਰ ਲਵੋ। 8*8 ਇੰਚ ਦੀ ਟ੍ਰੇ ਵਿਚ ਰੋਟੀ ਲਪੇਟਣ ਵਾਲੀ ਐਲੂਮੀਨੀਅਮ ਫ਼ੋਇਲ ਵਿਛਾ ਲਵੋ ਅਤੇ ਉਸ ਵਿਚ ਤੇਲ, ਮੱਖਣ ਜਾਂ ਘਿਉ ਪਾ ਕੇ ਫ਼ੋਇਲ ਨੂੰ ਚੀਕਣਾ ਕਰ ਲਉ। ਮਿਸ਼ਰਣ ਨੂੰ ਚੀਕਣੀ ਕੀਤੀ ਗਈ ਫ਼ੋਇਲ ਉੱਤੇ ਪਾਉ ਅਤੇ ਇਕ ਵਰਗਾ ਫੈਲਾ ਦਿਉ ਅਤੇ ਕੈਂਡੀ ਨੂੰ ਜੰਮਣ ਲਈ ਰੱਖ ਦਿਉ। 2 - 3 ਘੰਟੇ ਵਿਚ ਕੈਂਡੀ ਜੰਮ ਕੇ ਤਿਆਰ ਹੋ ਗਈ ਹੈ। ਫ਼ੋਇਲ ਨੂੰ ਜੰਮੇ ਹੋਏ ਮਿਸ਼ਰਣ ਸਹਿਤ ਟ੍ਰੇ ਤੋਂ ਕੱਢ ਕੇ ਬੋਰਡ ਉੱਤੇ ਰੱਖ ਲਵੋ, ਸਕੇਲ ਅਤੇ ਪੀਜ਼ਾ ਕਟਰ ਜਾਂ ਚਾਕੂ ਦੀ ਮਦਦ ਨਾਲ ਇਕ ਇੰਚ ਦੇ ਟੁਕੜੇ ਕੱਟ ਕੇ ਤਿਆਰ ਕਰ ਲਵੋ।
ਹੁਣ ਦੂਜੇ ਪਾਸੇ ਤੋਂ 1/2 ਇੰਚ ਚੋੜਾਈ ਵਿਚ ਕੱਟ ਕੇ ਕੈਂਡੀ ਨੂੰ ਵੱਖ ਕਰ ਕੇ ਪਲੇਟ ਵਿਚ ਰੱਖ ਲਵੋ। ਇਕ ਇੰਚ ਲੰਮੀ ਅਤੇ 1/2 ਇੰਚ ਚੌੜੀ ਕੈਂਡੀ ਬਣ ਕੇ ਤਿਆਰ ਹੈ। ਇਸ ਨੂੰ ਅਸੀ ਅਪਣੇ ਮਨਚਾਹੇ ਆਕਾਰ ਵਿਚ ਵੀ ਕੱਟ ਸਕਦੇ ਹਾਂ। ਰੈਪਿੰਗ ਸ਼ੀਟ ਤੋਂ ਓਨੇ ਵੱਡੇ ਟੁਕੜੇ ਕੱਟ ਕੇ ਤਿਆਰ ਕਰ ਲਵੋ ਜਿਸ ਵਿਚ ਕੈਂਡੀ ਆਸਾਨੀ ਨਾਲ ਲਪੇਟੀ ਜਾ ਸਕੇ।
ਕੈਂਡੀ ਨੂੰ ਸ਼ੀਟ ਦੇ ਟੁਕੜੇ ਦੇ ਉੱਤੇ ਰੱਖ ਕੇ ਉਸ ਨੂੰ ਪੈਕ ਕਰ ਦਿਉ। ਸਾਰੀ ਪੈਕ ਕਰ ਕੇ ਤਿਆਰ ਕਰ ਲਵੋ। ਬਹੁਤ ਚੰਗੀ ਕੈਰੇਮਲ ਕੈਂਡੀ ਬਣ ਕੇ ਤਿਆਰ ਹਨ। ਕੈਂਡੀ ਨੂੰ ਕਿਸੇ ਡੱਬੇ ਵਿਚ ਭਰ ਕੇ ਫ਼ਰਿੱਜ ਵਿਚ ਰੱਖ ਲਵੋ,ਅਤੇ ਜਦੋਂ ਵੀ ਤੁਹਾਡਾ ਮਨ ਹੋਵੇ ਕੈਂਡੀ ਖਾਉ ਅਤੇ ਖਵਾਉ।