ਕੀ ਮੋਬਾਈਲ ਚਲਾਉਣਾ ਬੱਚੇ ਦੇ ਹੁਸ਼ਿਆਰ ਹੋਣ ਦੀ ਨਿਸ਼ਾਨੀ ਹੈ ਜਾਂ ਫਿਰ ਸਿਰਫ਼ ਅਸੀਂ ਮੋਬਾਈਲ ਚਲਾਉਣ ਵਾਲੇ ਬੱਚੇ ਨੂੰ ਹੀ ਹੁਸ਼ਿਆਰ ਕਹਿ ਕੇ ਉਸ ਦਾ ਭਵਿੱਖ ਖ਼ਰਾਬ ਕਰ ਰਹੇ ਹਾਂ।
ਅੱਜ ਦੇ ਸਮੇਂ ਵਿਚ ਮੋਬਾਈਲ ਹਰ ਇਕ ਮਨੁੱਖ ਦੀ ਜ਼ਰੂਰਤ ਬਣ ਗਿਆ ਹੈ। ਇਕ ਆਮ ਦਿਹਾੜੀਦਾਰ ਬੰਦੇ ਤੋਂ ਲੈ ਕੇ ਅਰਬਪਤੀ ਬੰਦੇ ਕੋਲ ਅਪਣੀ ਜ਼ਰੂਰਤ ਦੇ ਹਿਸਾਬ ਨਾਲ ਛੋਟਾ ਜਾਂ ਵੱਡਾ ਮੋਬਾਈਲ ਰਖਿਆ ਹੋਇਆ ਹੈ ਪਰ ਪ੍ਰੇਸ਼ਾਨੀ ਦੀ ਗੱਲ ਇਹ ਹੈ ਜਦੋਂ ਮੋਬਾਈਲ ਛੋਟੇ-ਛੋਟੇ ਬੱਚਿਆਂ ਦੇ ਹੱਥ ਵਿਚ ਹੁੰਦੇ ਹਨ। ਹੁਣ ਵਿਚਾਰਨ ਵਾਲੀ ਗੱਲ ਇਹ ਹੈ ਕਿ ਇੰਨੀ ਛੋਟੀ ਉਮਰ ਦਾ ਬੱਚਾ ਜੋ ਹਾਲੇ ਪੜ੍ਹ ਰਿਹਾ ਹੈ, ਉਸ ਨੂੰ ਮੋਬਾਈਲ ਚਲਾਉਣ ਦੀ ਜਾਂਚ ਕਿਸ ਤਰ੍ਹਾਂ ਆ ਗਈ।
ਕੀ ਮੋਬਾਈਲ ਚਲਾਉਣਾ ਬੱਚੇ ਦੇ ਹੁਸ਼ਿਆਰ ਹੋਣ ਦੀ ਨਿਸ਼ਾਨੀ ਹੈ ਜਾਂ ਫਿਰ ਸਿਰਫ਼ ਅਸੀਂ ਮੋਬਾਈਲ ਚਲਾਉਣ ਵਾਲੇ ਬੱਚੇ ਨੂੰ ਹੀ ਹੁਸ਼ਿਆਰ ਕਹਿ ਕੇ ਉਸ ਦਾ ਭਵਿੱਖ ਖ਼ਰਾਬ ਕਰ ਰਹੇ ਹਾਂ। ਜੇਕਰ ਬੱਚਾ ਜ਼ਿੱਦ ਕਰਦਾ ਹੈ ਤਾਂ ਉਸ ਨੂੰ ਮਾਂ-ਪਿਉ ਮੋਬਾਈਲ ਦੇ ਕੇ ਕਹਿੰਦੇ ਹਨ ਕਿ ਬਾਹਰ ਨਹੀਂ ਜਾਣਾ ਨਹੀਂ ਤਾਂ ਕਪੜੇ ਗੰਦੇ ਹੋ ਜਾਣਗੇ, ਮੋਬਾਈਲ ਚਲਾ ਲਉ ਗੇਮ ਖੇਡ ਲਉ। ਬੱਚੇ ਕੋਲ ਬੈਠ ਕੇ ਹੀ ਕਈ ਮਾਵਾਂ ਖ਼ੁਦ ਹੀ ਗੇਮ ਖੇਡਦੀਆਂ ਹਨ, ਫ਼ੇਸਬੁੱਕ, ਵਟਸਐਪ ਚਲਾਉਂਦੀਆਂ ਹਨ, ਕਈ ਕਈ ਘੰਟੇ ਮੋਬਾਈਲ ਤੇ ਲੱਗੀਆਂ ਰਹਿੰਦੀਆਂ ਹਨ।
ਇਸ ਉਮਰ ਵਿਚ ਬੱਚਾ ਜੋ ਕੁੱਝ ਅਪਣੇ ਆਲੇ-ਦੁਆਲੇ ਵਾਪਰਦਾ ਦੇਖਦਾ ਹੈ, ਉਸ ਦੀ ਨਕਲ ਕਰ ਕੇ ਸਿੱਖਣ ਦੀ ਕੋਸ਼ਿਸ ਕਰਦਾ ਹੈ। ਇਸ ਤਰ੍ਹਾਂ ਉਹ ਮੋਬਾਈਲ ਦੀ ਵਰਤੋਂ ਕਰਦਾ ਹੋਇਆ ਮੋਬਾਈਲ ਚਲਾਉਣ ਦੀ ਜਾਂਚ ਸਿੱਖ ਲੈਂਦਾ ਹੈ। ਇਸ ਤਰ੍ਹਾਂ ਅਸੀਂ ਦੇਖਦੇ ਹਾਂ ਕਿ ਅਚਨਚੇਤ ਹੀ ਮੋਬਾਈਲ ਬਾਰੇ ਜਾਣਕਾਰੀ ਦੇਣ ਵਾਲੇ ਬੱਚੇ ਨੂੰ ਉਸ ਦੇ ਮਾਂ-ਪਿਉ ਹੀ ਹੁੰਦੇ ਹਨ। ਅੱਜਕਲ ਅਸੀਂ ਆਮ ਹੀ ਦੇਖਦੇ ਹਾਂ ਕਿ ਨਿੱਕੇ-ਨਿੱਕੇ ਬੱਚਿਆਂ ਦੇ ਵੱਡੇ-ਵੱਡੇ ਚਸ਼ਮੇ ਲੱਗੇ ਹੁੰਦੇ ਹਨ। ਇਸ ਪਿੱਛੇ ਮੋਬਾਈਲ ਵੀ ਇਕ ਕਾਰਨ ਹੈ।
ਇਸ ਤੋਂ ਇਲਾਵਾ ਕਈ ਬੱਚੇ ਮੋਬਾਈਲ ਤੇ ਇੰਟਰਨੈੱਟ ਵੀ ਚਲਾਉਂਦੇ ਹਨ ਜਿਸ ਕਾਰਨ ਜਵਾਨੀ ਤੋਂ ਪਹਿਲਾਂ ਹੀ ਉਨ੍ਹਾਂ ਚੀਜ਼ਾਂ ਵਲ ਆਕਰਸ਼ਿਤ ਹੋ ਜਾਂਦੇ ਹਨ, ਜੋ ਕਿ ਬਚਪਨ ਵਿਚ ਨਹੀਂ ਹੋਣੀਆਂ ਚਾਹੀਦੀਆਂ। ਇਸ ਤਰ੍ਹਾਂ ਬੱਚਿਆਂ ਦੇ ਮਾਨਸਕ ਤੇ ਸਰੀਰਕ ਤੌਰ ਤੇ ਬਹੁਤ ਬੁਰਾ ਪ੍ਰਭਾਵ ਪੈਂਦਾ ਹੈ ਜਿਸ ਦਾ ਕਾਰਨ ਮੋਬਾਈਲ ਹੀ ਹੈ। ਇਸ ਤਰ੍ਹਾਂ ਅਸੀਂ ਦੇਖਦੇ ਹਾਂ ਕਿ ਬੱਚੇ ਛੋਟੀ ਉਮਰ ਵਿਚ ਹੀ ਗ਼ਲਤ ਰਾਹ ਤੇ ਪੈ ਕੇ ਅਪਣੀ ਜ਼ਿੰਦਗੀ ਖ਼ਰਾਬ ਕਰ ਲੈਂਦੇ ਹਨ।
