ਮੋਹਨ ਜਨਵਰੀ 2019 ਵਿੱਚ ਹਾਟਸਟਾਰ ਤੋਂ ਮੇਟਾ ਵਿੱਚ ਸ਼ਾਮਲ ਹੋਏ ਸੀ, ਜੋ ਪਹਿਲਾਂ ਫ਼ੇਸਬੁੱਕ ਵਜੋਂ ਜਾਣਿਆ ਜਾਂਦਾ ਸੀ।
ਨਵੀਂ ਦਿੱਲੀ - ਸੋਸ਼ਲ ਮੀਡੀਆ ਕੰਪਨੀ ਮੇਟਾ ਨੇ ਵੀਰਵਾਰ ਨੂੰ ਕਿਹਾ ਕਿ ਉਸ ਦੇ ਭਾਰਤ ਮੁਖੀ ਅਜੀਤ ਮੋਹਨ ਨੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ। ਇੱਕ ਬਿਆਨ ਵਿੱਚ ਕਿਹਾ ਗਿਆ ਹੈ, "ਅਜੀਤ ਨੇ ਕੰਪਨੀ ਤੋਂ ਬਾਹਰ ਇੱਕ ਹੋਰ ਮੌਕੇ ਲਈ ਮੇਟਾ ਵਿੱਚ ਆਪਣੀ ਭੂਮਿਕਾ ਛੱਡਣ ਦਾ ਫੈਸਲਾ ਕੀਤਾ ਹੈ।"
ਗਲੋਬਲ ਬਿਜ਼ਨਸ ਗਰੁੱਪ ਦੀ ਵਾਈਸ ਪ੍ਰੈਜ਼ੀਡੈਂਟ ਨਿਕੋਲਾ ਮੈਂਡੇਲਸਨ ਨੇ ਬਿਆਨ ਵਿੱਚ ਕਿਹਾ, "ਉਹਨਾਂ ਨੇ ਪਿਛਲੇ ਚਾਰ ਸਾਲਾਂ ਵਿੱਚ ਭਾਰਤ 'ਚ ਸਾਡੇ ਸੰਚਾਰ ਨੂੰ ਆਕਾਰ ਦੇਣ, ਅਤੇ ਵਧਾਉਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ, ਤਾਂ ਜੋ ਕਰੋੜਾਂ ਭਾਰਤੀ ਵਪਾਰਕ ਅਦਾਰਿਆਂ, ਭਾਈਵਾਲਾਂ ਅਤੇ ਲੋਕਾਂ ਦੀ ਸੇਵਾ ਕੀਤੀ ਜਾ ਸਕੇ।
ਸੂਤਰਾਂ ਨੇ ਦੱਸਿਆ ਕਿ ਮੋਹਨ ਨੇ ਤੁਰੰਤ ਪ੍ਰਭਾਵ ਨਾਲ ਅਸਤੀਫ਼ਾ ਦੇ ਦਿੱਤਾ ਹੈ। ਮੋਹਨ ਜਨਵਰੀ 2019 ਵਿੱਚ ਹਾਟਸਟਾਰ ਤੋਂ ਮੇਟਾ ਵਿੱਚ ਸ਼ਾਮਲ ਹੋਏ ਸੀ, ਜੋ ਪਹਿਲਾਂ ਫ਼ੇਸਬੁੱਕ ਵਜੋਂ ਜਾਣਿਆ ਜਾਂਦਾ ਸੀ।
ਮੈਂਡੇਲਸਨ ਨੇ ਕਿਹਾ, “ਅਸੀਂ ਭਾਰਤ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹਾਂ, ਅਤੇ ਸਾਰੇ ਕੰਮ ਅਤੇ ਸਾਂਝੇਦਾਰੀ ਨੂੰ ਅੱਗੇ ਵਧਾਉਣ ਲਈ ਸਾਡੇ ਕੋਲ ਇੱਕ ਮਜ਼ਬੂਤ ਟੀਮ ਹੈ। ਅਸੀਂ ਅਜੀਤ ਦੀ ਅਗਵਾਈ ਅਤੇ ਯੋਗਦਾਨ ਲਈ ਸ਼ੁਕਰਗੁਜ਼ਾਰ ਹਾਂ ਅਤੇ ਉਸਦੇ ਭਵਿੱਖ ਲਈ ਸ਼ੁਭਕਾਮਨਾਵਾਂ ਦਿੰਦੇ ਹਾਂ।"