ਖ਼ੁਦ ਦਾ ਮਿਊਜ਼ੀਅਮ ਬਣਾਉਣਾ ਚਾਹੁੰਦਾ ਹੈ ਗੁਰਮੇਲ ਸਿੰਘ
ਫਰੀਦਕੋਟ: ਉਂਝ ਤਾਂ ਫਰੀਦਕੋਟ ਜ਼ਿਲ੍ਹਾ ਖਿਡਾਰੀਆਂ, ਗਾਇਕਾਂ, ਸਾਹਿਤਕਾਰਾਂ ਅਤੇ ਵੱਡੀਆਂ ਰਾਜਨੀਤਿਕ ਸ਼ਖ਼ਸੀਅਤਾਂ ਲਈ ਮਸ਼ਹੂਰ ਹੈ ਪਰ ਇਸ ਜਿਲ੍ਹੇ ਦੇ ਕੋਟਕਪੂਰਾ ਵਿਚ ਇਕ ਅਜਿਹਾ ਸ਼ਖ਼ਸ ਮੌਜੂਦ ਹੈ ਜੋ ਇਕ ਚੰਗਾ ਅਦਾਕਾਰ, ਚੰਗਾ ਗੀਤਕਾਰ, ਵਧੀਆ ਚਿੱਤਰਕਾਰ ਅਤੇ ਬਹੁਤ ਹੀ ਵਧੀਆ ਮੂਰਤੀਕਾਰ ਵੀ ਹੈ । ਇਸ ਸ਼ਖ਼ਸ ਦਾ ਨਾਂ ਹੈ ਗੁਰਮੇਲ ਸਿੰਘ ਜੋ ਕਿ ਇਕ ਮੂਰਤੀਕਾਰ ਹੋਣ ਦੇ ਨਾਲ-ਨਾਲ ਚੰਗਾ ਅਦਾਕਾਰ, ਗੀਤਕਾਰ ਅਤੇ ਚਿੱਤਰਕਾਰ ਵੀ ਹੈ। ਇੰਨੀਆਂ ਕਲਾਵਾਂ ਦਾ ਮਾਲਕ ਹੋਣ ਦੇ ਬਾਵਜੂਦ ਗੁਰਮੇਲ ਸਿੰਘ ਨੂੰ ਮਾੜੀ ਆਰਥਿਕ ਸਥਿਤੀ ਨਾਲ ਦੋ ਚਾਰ ਹੋਣਾ ਪੈ ਰਿਹਾ ਹੈ। ਗੁਰਮੇਲ ਸਿੰਘ ਹੁਣ ਤਕ ਅਣਗਿਣਤ ਮੂਰਤੀਆਂ ਬਣਾ ਚੁੱਕੇ ਹਨ ਅਤੇ ਉਨ੍ਹਾਂ ਦੀਆਂ ਬਣਾਈਆਂ ਮੂਰਤੀਆਂ ਪੰਜਾਬ ਹੀ ਨਹੀਂ ਬਲਕਿ ਹੋਰਨਾਂ ਸੂਬਿਆਂ ਵਿਚ ਵੀ ਲੱਗੀਆਂ ਹੋਈਆਂ ਹਨ।
ਦੱਸਣਯੋਗ ਹੈ ਕਿ ਗੁਰਮੇਲ ਸਿੰਘ ਇਨ੍ਹੀਂ ਦਿਨੀਂ ਕੋਟਕਪੂਰਾ ਦੇ ਸ੍ਰੀ ਮੁਕਤਸਰ ਸਾਹਿਬ ਰੋਡ ’ਤੇ ਅਪਣੇ ਛੋਟੇ ਜਿਹੇ ਪੁਰਾਣੇ ਮਕਾਨ ਵਿਚ ਅਪਣੀ ਪਤਨੀ ਅਤੇ ਅਪੰਗ ਬੇਟੀ ਨਾਲ ਰਹਿ ਰਿਹਾ ਹੈ। ਗੁਰਮੇਲ ਕਈ ਪੰਜਾਬੀ ਫਿਲਮਾਂ ਅਤੇ ਨਾਟਕਾ ਵਿਚ ਕੰਮ ਕਰ ਚੁੱਕਿਆ ਹੈ ਪਰ ਜਿੰਦਗੀ ਦੇ ਆਖਰੀ ਸਮੇਂ ਵਿਚ ਇਸ ਸ਼ਖ਼ਸ ਦਾ ਸੁਪਨਾ ਟੁਟਦਾ ਵਿਖਾਈ ਦੇ ਰਿਹਾ ਹੈ।
ਇਸ ਮੌਕੇ ਗੱਲਬਾਤ ਕਰਦਿਆਂ ਗੁਰਮੇਲ ਸਿੰਘ ਨੇ ਦੱਸਿਆ ਕਿ ਉਹ ਛੇਵੀਂ ਜਮਾਤ ਵਿਚ ਪੜ੍ਹਦਾ ਸੀ ਜਦੋਂ ਉਸ ਨੇ ਚਿੱਤਰਕਾਰੀ ਸ਼ੁਰੂ ਕੀਤੀ ਅਤੇ ਚਿੱਤਰਕਾਰੀ ਕਰਦੇ ਉਹ ਕਦੋਂ ਮੂਰਤੀਕਾਰ ਬਣ ਗਿਆ ਉਸ ਨੂੰ ਪਤਾ ਹੀ ਨਹੀਂ ਲੱਗਾ । ਗੁਰਮੇਲ ਸਿੰਘ ਨੇ ਦੱਸਿਆ ਕਿ ਉਸ ਦੀਆ ਬਣਾਈਆਂ ਹੋਈਆਂ ਮੂਰਤੀਆਂ ਪੰਜਾਬ ਸਮੇਤ ਭਾਰਤ ਦੇ ਕਰੀਬ 6 ਸੂਬਿਆ ਵਿਚ ਵੱਖ-ਵੱਖ ਥਾਵਾਂ ’ਤੇ ਲੱਗੀਆਂ ਹੋਈਆ ਹਨ ਅਤੇ ਹੁਣ ਤੱਕ ਉਹ ਅਣਗਿਣਤ ਮੂਰਤੀਆਂ ਬਣਾ ਚੁੱਕਿਆ ਹੈ ।
gurmail singh
ਉਹਨਾਂ ਦੱਸਿਆ ਕਿ ਇਕ ਮੂਰਤੀ ਬਣਾਉਣ ਵਿਚ ਕਾਫੀ ਪੈਸਾ ਅਤੇ ਸਮਾਂ ਲੱਗ ਜਾਂਦਾ। ਉਸ ਨੇ ਕਿਹਾ ਕਿ ਉਸ ਨੇ ਕੰਮ ਬਹੁਤ ਕੀਤਾ ਪਰ ਉਸ ਦਾ ਜੋ ਸਤਿਕਾਰ ਬਣਦਾ ਸੀ ਉਹ ਨਹੀਂ ਮਿਲਿਆ। ਉਹਨਾਂ ਕਿਹਾ ਅੱਜ ਤੱਕ ਉਹਨਾਂ ਨੂੰ ਸਰਕਾਰ ਜਾਂ ਕਿਸੇ ਸਮਾਜਸੇਵੀ ਵੱਲੋਂ ਕੋਈ ਵੀ ਆਰਥਿਕ ਮਦਦ ਨਹੀਂ ਮਿਲੀ ਜਿਸ ਦੇ ਸਹਾਰੇ ਉਹ ਆਪਣਾ ਕੰਮ ਵਧਾ ਸਕਦਾ ਅਤੇ ਅਪਣਾ 2 ਵਕਤ ਦਾ ਗੁਜਾਰਾ ਚਲਾ ਸਕੇ । ਉਹਨਾਂ ਕਿਹਾ ਕਿ ਸ਼ੁਰੂ ਵਿਚ ਤਾਂ ਕੰਮ ਬਹੁਤ ਸੀ ਪਰ ਹੁਣ ਆਧੁਨਿਕਤਾ ਦੀ ਹੋੜ ਵਿਚ ਲੋਕ ਮੂਰਤੀਆਂ ਬਣਾਉਣ ਤੋਂ ਕੰਨੀ ਕਤਰਾਉਂਦੇ ਹਨ।
ਉਸ ਦਾ ਸੁਪਨਾ ਸੀ ਕਿ ਉਹ ਇਕ ਮਿਊਜ਼ੀਅਮ ਬਣਾਉਂਦਾ ਜਿਥੇ ਉਹ ਅਪਣੀਆਂ ਕਲਾ ਕ੍ਰਿਤਾਂ ਨੂੰ ਸੰਭਾਲ ਕੇ ਰੱਖਦਾ ਅਤੇ ਉਹ ਅਪਣੇ ਅਮੀਰ ਪੰਜਾਬੀ ਸੱਭਿਆਚਾਰ ਤੇ ਵਿਰਸੇ ਦੀ ਸੇਵਾ ਕਰ ਸਕਦਾ ਪਰ ਹੁਣ ਉਸਦਾ ਇਹ ਸੁਪਨਾ ਟੁਟਦਾ ਨਜ਼ਰ ਆ ਰਿਹਾ ਹੈ।
