ਕਿਹਾ, ਮੁੱਖ ਮੰਤਰੀ ਦਾ ਇਰਾਦਾ ਜੋ ਵੀ ਹੋਵੇ, ਮੈਨੂੰ ਦੁੱਖ ਪਹੁੰਚਿਆ

ਪਟਨਾ : ਬਿਹਾਰ ਦੇ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਨੇ ਭਰੇ ਸਮਾਗਮ ’ਚ ਇਕ ਹੋਣਹਾਰ ਡਾਕਟਰ ਦਾ ਦਿਲ ਇੰਨਾ ਤੋੜ ਦਿਤਾ ਹੈ ਕਿ ਉਹ ਹੁਣ ਸੂਬਾ ਛੱਡ ਕੇ ਚਲੀ ਗਈ ਹੈ। ਨੁਸਰਤ ਪਰਵੀਨ, ਜਿਨ੍ਹਾਂ ਦਾ ਹਿਜਾਬ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਨੇ ਮੰਚ ਉਤੇ ਉਤਾਰ ਦਿਤਾ ਸੀ, ਹੁਣ ਦੁਬਾਰਾ ਨੌਕਰੀ ਉਤੇ ਆਉਣ ਦੀ ਹਿੰਮਤ ਨਹੀਂ ਕਰ ਪਾ ਰਹੀ ਹੈ। ਉਹ ਪਟਨਾ ਛੱਡ ਕੇ ਅਪਣੇ ਪਰਵਾਰ ਨਾਲ ਰਹਿਣ ਲਈ ਕੋਲਕਾਤਾ ਚਲੀ ਗਈ ਹੈ। ਉਸ ਦਾ ਕਹਿਣਾ ਹੈ ਕਿ ਉਸ ਸਮੇਂ ਉੱਥੇ ਮੌਜੂਦ ਲੋਕ ਹੱਸ ਰਹੇ ਸਨ, ਜਿਸ ਨਾਲ ਉਸ ਨੂੰ ਡੂੰਘਾ ਸਦਮਾ ਲੱਗਾ ਹੈ ਅਤੇ ਉਹ ਲੜਕੀ ਦੇ ਤੌਰ ਉਤੇ ਬਹੁਤ ਅਪਮਾਨਿਤ ਮਹਿਸੂਸ ਕਰਦੀ ਹੈ। 

ਇਹ ਘਟਨਾ 15 ਦਸੰਬਰ ਨੂੰ ਵਾਪਰੀ, ਅਗਲੇ ਦਿਨ ਨੁਸਰਤ ਨੇ ਅਪਣੇ ਭਰਾ ਨੂੰ ਫੋਨ ਕੀਤਾ ਅਤੇ ਰੋਂਦੇ ਹੋਏ ਉਸ ਨੂੰ ਸਾਰੀ ਗੱਲ ਦੱਸੀ ਅਤੇ ਕੋਲਕਾਤਾ ਵਾਪਸ ਆ ਗਈ। ਉਨ੍ਹਾਂ ਨੇ 20 ਦਸੰਬਰ ਨੂੰ ਬਿਹਾਰ ਸਰਕਾਰ ਦੀ ਨੌਕਰੀ ’ਚ ਭਰਤੀ ਹੋਣਾ ਸੀ ਪਰ ਹੁਣ ਉਨ੍ਹਾਂ ਨੇ ਇਨਕਾਰ ਕਰ ਦਿਤਾ ਹੈ। ਹਾਲਾਂਕਿ, ਉਨ੍ਹਾਂ ਦਾ ਪਰਵਾਰ ਉਨ੍ਹਾਂ ਨੂੰ ਲਗਾਤਾਰ ਸਮਝਾ ਰਿਹਾ ਹੈ ਕਿ ਗਲਤੀ ਕਿਸੇ ਹੋਰ ਦੀ ਸੀ, ਤਾਂ ਉਹ ਅਪਣੀ ਮਿਹਨਤ ਦੀ ਨੌਕਰੀ ਕਿਉਂ ਛੱਡੇ। ਪਰਵਾਰ ਚਾਹੁੰਦਾ ਹੈ ਕਿ ਉਹ ਇਸ ਸਦਮੇ ਤੋਂ ਬਾਹਰ ਆ ਕੇ ਪਟਨਾ ਵਾਪਸ ਚਲੀ ਜਾਵੇ, ਪਰ ਨੁਸਰਤ ਅਜੇ ਮਾਨਸਿਕ ਤੌਰ ਉਤੇ ਇਸ ਲਈ ਤਿਆਰ ਨਹੀਂ ਹੈ ਅਤੇ ਡੂੰਘੇ ਸਦਮੇ ਵਿਚ ਹੈ। 

ਨੁਸਰਤ ਦਾ ਕਹਿਣਾ ਹੈ ਕਿ ਉਸ ਨੇ ਹਮੇਸ਼ਾ ਸਕੂਲ ਤੋਂ ਕਾਲਜ ਤਕ ਹਿਜਾਬ ਪਹਿਨ ਕੇ ਪੜ੍ਹਾਈ ਕੀਤੀ। ਘਰ ਹੋਵੇ ਜਾਂ ਮੌਲ, ਉਹ ਹਿਜਾਬ ਵਿਚ ਹਰ ਜਗ੍ਹਾ ਗਈ ਅਤੇ ਕਦੇ ਵੀ ਅਜਿਹੀ ਸਥਿਤੀ ਦਾ ਸਾਹਮਣਾ ਨਹੀਂ ਕੀਤਾ। 

ਨਿਤੀਸ਼ ਕੁਮਾਰ ਦੇ ਪ੍ਰੋਗਰਾਮਾਂ ’ਚ ਮੀਡੀਆ ਕਵਰੇਜ ਉਤੇ ਸਖ਼ਤੀ ਵਧੀ

ਦੂਜੇ ਪਾਸੇ ਵਿਵਾਦ ਦੇ ਸ਼ੁਰੂ ਹੋਣ ਤੋਂ ਬਾਅਦ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਦੇ ਪ੍ਰੋਗਰਾਮਾਂ ’ਚ ਮੀਡੀਆ ਕਵਰੇਜ ਉਤੇ ਸਖ਼ਤੀ ਵਧਾ ਦਿਤੀ ਗਈ ਹੈ। ਬੁਧਵਾਰ ਨੂੰ ਮੁੱਖ ਮੰਤਰੀ ਨੇ ਗਯਾ ਵਿਚ ਬਿਹਾਰ ਇੰਸਟੀਚਿਊਟ ਆਫ ਪਬਲਿਕ ਐਡਮਿਨਿਸਟ੍ਰੇਸ਼ਨ ਐਂਡ ਰੂਰਲ ਡਿਵੈਲਪਮੈਂਟ (ਬੀ.ਆਈ.ਪੀ.ਏ.ਆਰ.ਡੀ.) ਦੀ ਵਰਕਸ਼ਾਪ ਵਿਚ ਸ਼ਿਰਕਤ ਕੀਤੀ, ਜਿੱਥੇ ਮੀਡੀਆ ਦੇ ਦਾਖਲੇ ਉਤੇ ਪੂਰੀ ਤਰ੍ਹਾਂ ਪਾਬੰਦੀ ਲਗਾਈ ਗਈ ਸੀ। ਇਥੋਂ ਤਕ ਕਿ ਜੇ.ਡੀ.ਯੂ. ਪੇਜ ਨੇ ਵੀ ਇਸ ਪ੍ਰੋਗਰਾਮ ਦਾ ਸਿੱਧਾ ਪ੍ਰਸਾਰਣ ਨਹੀਂ ਕੀਤਾ। ਮੁੱਖ ਮੰਤਰੀ ਨੇ ਇੱਥੇ ਸੰਵਾਦ ਵਾਟਿਕਾ, ਨਕਸ਼ਤਰ ਵਨ ਅਤੇ ਸਪੇਸ ਗੈਲਰੀ ਵਰਗੇ ਕਈ ਪ੍ਰਾਜੈਕਟਾਂ ਦਾ ਨੀਂਹ ਪੱਥਰ ਰੱਖਿਆ, ਪਰ ਹਿਜਾਬ ਵਿਵਾਦ ਤੋਂ ਬਾਅਦ ਪ੍ਰਸ਼ਾਸਨ ਹੁਣ ਧਮਾਕੇ ਨਾਲ ਕਦਮ ਚੁੱਕ ਰਿਹਾ ਹੈ।
 

ਨਿਤੀਸ਼ ਕੁਮਾਰ ਸ਼ਾਇਦ ਅਪਣੇ ਅਸਲੀ ਰੰਗ ਵਿਖਾ ਰਹੇ ਹਨ: ਜੰਮੂ-ਕਸ਼ਮੀਰ ਦੇ ਮੁੱਖ ਮੰਤਰੀ 

ਸ੍ਰੀਨਗਰ : ਜੰਮੂ-ਕਸ਼ਮੀਰ ਦੇ ਮੁੱਖ ਮੰਤਰੀ ਉਮਰ ਅਬਦੁੱਲਾ ਨੇ ਬੁਧਵਾਰ ਨੂੰ ਨਕਾਬ ਘਟਨਾ ਉਤੇ ਅਪਣੇ ਬਿਹਾਰ ਦੇ ਹਮਰੁਤਬਾ ਦੀ ਆਲੋਚਨਾ ਕੀਤੀ ਅਤੇ ਕਿਹਾ ਕਿ ਨਿਤੀਸ਼ ਕੁਮਾਰ ਹੌਲੀ-ਹੌਲੀ ਅਪਣੇ ਅਸਲ ਸੁਭਾਅ ਦਾ ਪ੍ਰਗਟਾਵਾ ਕਰ ਰਹੇ ਹਨ। ਅਬਦੁੱਲਾ ਨੇ ਇਕ ਸਮਾਗਮ ਦੌਰਾਨ ਪੱਤਰਕਾਰਾਂ ਨੂੰ ਕਿਹਾ, ‘‘ਨਿਤੀਸ਼ ਕੁਮਾਰ, ਜਿਨ੍ਹਾਂ ਨੂੰ ਕਦੇ ਧਰਮ ਨਿਰਪੱਖ ਨੇਤਾ ਮੰਨਿਆ ਜਾਂਦਾ ਸੀ, ਹੌਲੀ-ਹੌਲੀ ਅਪਣਾ ਅਸਲੀ ਰੰਗ ਵਿਖਾ ਰਹੇ ਹਨ।’’ ਅਬਦੁੱਲਾ ਨੇ ਕਿਹਾ ਕਿ ਨਿਤੀਸ਼ ਕੁਮਾਰ ਨੇ ਇਕ ਮੁਸਲਿਮ ਮਹਿਲਾ ਡਾਕਟਰ ਦੇ ਚਿਹਰੇ ਦਾ ਪਰਦਾ ਹਟਾਉਣਾ ਗਲਤ ਸੀ ਅਤੇ ਇਸ ਨੂੰ ਕਿਸੇ ਵੀ ਤਰੀਕੇ ਨਾਲ ਜਾਇਜ਼ ਨਹੀਂ ਠਹਿਰਾਇਆ ਜਾ ਸਕਦਾ। ਉਨ੍ਹਾਂ ਕਿਹਾ, ‘‘ਅਸੀਂ ਇੱਥੇ ਕਈ ਸਾਲ ਪਹਿਲਾਂ ਇਸ ਤਰ੍ਹਾਂ ਦੀ ਘਟਨਾ ਦੇਖੀ ਹੈ। ਕੀ ਤੁਸੀਂ ਭੁੱਲ ਗਏ ਹੋ ਕਿ ਮਹਿਬੂਬਾ ਮੁਫਤੀ ਨੇ ਪੋਲਿੰਗ ਸਟੇਸ਼ਨ ਦੇ ਅੰਦਰ ਜਾਇਜ਼ ਵੋਟਰ ਦਾ ਬੁਰਕਾ ਕਿਵੇਂ ਹਟਾ ਦਿਤਾ? ਇਹ ਕੰਮ ਗਲਤ ਸੀ ਅਤੇ ਕੁਮਾਰ ਦਾ ਇਹ ਕੰਮ ਵੀ ਗਲਤ ਹੈ।’’ ਜ਼ਿਕਰਯੋਗ ਹੈ ਕਿ ਨਿਤੀਸ਼ ਕੁਮਾਰ ਨੇ ਇਸ ਹਫਤੇ ਦੇ ਸ਼ੁਰੂ ਵਿਚ ਇਕ ਸਮਾਗਮ ਵਿਚ ਇਕ ਮੁਸਲਿਮ ਔਰਤ ਦੇ ਚਿਹਰੇ ਦਾ ਪਰਦਾ ਹਟਾਉਣ ਤੋਂ ਬਾਅਦ ਇਕ ਵੱਡਾ ਵਿਵਾਦ ਖੜਾ ਕਰ ਦਿਤਾ ਸੀ।