ਰੂਸ ਤੋਂ ਭਾਰਤ ਨੂੰ ਕੱਚੇ ਤੇਲ ਦੀ ਸਪਲਾਈ ਦੋ ਮਹੀਨਿਆਂ ਤਕ ਪ੍ਰਭਾਵਹੀਣ ਰਹੇਗੀ : ਸੂਤਰ
ਨਵੀਂ ਦਿੱਲੀ : ਭਾਰਤ ਨੂੰ ਅਗਲੇ ਦੋ ਮਹੀਨਿਆਂ ਤਕ ਰੂਸ ਤੋਂ ਕੱਚੇ ਤੇਲ ਦੀ ਸਪਲਾਈ ’ਚ ਕੋਈ ਰੁਕਾਵਟ ਆਉਣ ਦੀ ਉਮੀਦ ਨਹੀਂ ਹੈ ਪਰ ਉਸ ਦੀਆਂ ਰਿਫਾਇਨਰੀਆਂ ਤੇਲ ਟੈਂਕਰਾਂ ਤੋਂ ਸਪਲਾਈ ਲੈਣ ਤੋਂ ਝਿਜਕ ਸਕਦੀਆਂ ਹਨ। ਇਕ ਸੀਨੀਅਰ ਸਰਕਾਰੀ ਸੂਤਰ ਨੇ ਸੋਮਵਾਰ ਨੂੰ ਇਹ ਜਾਣਕਾਰੀ ਦਿਤੀ।
ਅਮਰੀਕਾ ਨੇ ਸ਼ੁਕਰਵਾਰ ਨੂੰ ਰੂਸ ਦੇ ਤੇਲ ਨਿਰਯਾਤ ’ਤੇ ਪਾਬੰਦੀਆਂ ਦਾ ਐਲਾਨ ਕੀਤਾ। ਪਾਬੰਦੀਆਂ ਨੇ ਰੂਸੀ ਤੇਲ ਉਤਪਾਦਕਾਂ ਗੈਜ਼ਪ੍ਰੋਮ ਨੇਫਟ ਅਤੇ ਸਰਗੁਟਨੇਫਟਗਾਸ ਦੇ ਨਾਲ ਰੂਸੀ ਤੇਲ ਲੈ ਕੇ ਜਾਣ ਵਾਲੇ 183 ਜਹਾਜ਼ਾਂ ਨੂੰ ਨਿਸ਼ਾਨਾ ਬਣਾਇਆ ਹੈ। ਰੂਸ ਨੇ ਇਨ੍ਹਾਂ ਤੇਲ ਟੈਂਕਰਾਂ ਦੀ ਵਰਤੋਂ 2022 ਵਿਚ ਪਾਬੰਦੀਆਂ ਲੱਗਣ ਤੋਂ ਬਾਅਦ ਭਾਰਤ ਅਤੇ ਚੀਨ ਵਰਗੇ ਦੇਸ਼ਾਂ ਨੂੰ ਤੇਲ ਭੇਜਣ ਲਈ ਕੀਤੀ ਸੀ। ਰੂਸ ਦੇ ਹਮਲੇ ਤੋਂ ਬਾਅਦ ਜੀ-7 ਦੇਸ਼ਾਂ ਨੇ ਯੂਕਰੇਨ ’ਤੇ ਪਾਬੰਦੀਆਂ ਲਗਾ ਦਿਤੀਆਂ ਸਨ।
ਇਸ ਤੋਂ ਬਚਣ ਲਈ, ਰੂਸ ਨੇ ਅਪਣੀਆਂ ਕੰਪਨੀਆਂ ਵਲੋਂ ਬੀਮਾ ਕੀਤੇ ਅਖੌਤੀ ਨਕਲੀ-ਟੈਂਕਰ ਬੇੜੇ ਦੀ ਵਰਤੋਂ ਕੀਤੀ। ਹੁਣ ਇਸ ਬੇੜੇ ’ਤੇ ਵੀ ਪਾਬੰਦੀ ਲਗਾ ਦਿਤੀ ਗਈ ਹੈ। ਅਧਿਕਾਰਤ ਸੂਤਰਾਂ ਨੇ ਦਸਿਆ ਕਿ ਇਸ ਪਾਬੰਦੀ ਲਈ 12 ਮਾਰਚ ਤਕ ਦੀ ਛੋਟ ਦੀ ਮਿਆਦ ਹੈ। ਇਸ ਸਮੇਂ ਦੌਰਾਨ, ਮੌਜੂਦਾ ਇਕਰਾਰਨਾਮਿਆਂ ਨੂੰ ਪੂਰਾ ਕਰਨ ਦੀ ਇਜਾਜ਼ਤ ਦਿਤੀ ਜਾਏਗੀ।
ਸੂਤਰਾਂ ਨੇ ਕਿਹਾ, ‘‘ਪਹਿਲੇ ਦੋ ਮਹੀਨਿਆਂ ਤਕ ਸਪਲਾਈ ’ਚ ਕੋਈ ਰੁਕਾਵਟ ਨਹੀਂ ਆਵੇਗੀ। ਦੋ ਮਹੀਨਿਆਂ ਦੇ ਅੰਦਰ, ਅਸੀਂ ਸ਼ਾਇਦ ਤੇਲ ਦੀ ਆਮਦ ਦੇ ਮਾਮਲੇ ’ਚ ਭਾਰਤ ’ਚ ਨਵੇਂ ਪ੍ਰਬੰਧ ਵੇਖਾਂਗੇ।’’ ਸੂਤਰਾਂ ਨੇ ਦਸਿਆ ਕਿ ਪਾਬੰਦੀਸ਼ੁਦਾ ਰੂਸੀ ਟੈਂਕਰਾਂ ਨੂੰ ਭਾਰਤੀ ਬੰਦਰਗਾਹਾਂ ’ਤੇ ਖੜ੍ਹੇ ਹੋਣ ਦੀ ਇਜਾਜ਼ਤ ਨਹੀਂ ਦਿਤੀ ਜਾਵੇਗੀ। ਇਸ ਦਾ ਇਕੋ-ਇਕ ਅਪਵਾਦ 10 ਜਨਵਰੀ ਤੋਂ ਪਹਿਲਾਂ ਬੁੱਕ ਕੀਤੇ ਗਏ ਰੂਸੀ ਤੇਲ ਜਹਾਜ਼ਾਂ ਲਈ ਹੋਵੇਗਾ, ਬਸ਼ਰਤੇ ਖੇਪ ਨੂੰ 12 ਮਾਰਚ ਤਕ ਉਤਾਰ ਦਿਤਾ ਜਾਵੇ।
ਉਨ੍ਹਾਂ ਕਿਹਾ, ‘‘ਬਾਜ਼ਾਰ ਇਨ੍ਹਾਂ ਪਾਬੰਦੀਆਂ ’ਤੇ ਰੂਸ ਦੇ ਜਵਾਬ ਦੀ ਉਡੀਕ ਕਰ ਰਿਹਾ ਹੈ। ਰੂਸ ਸਾਡੇ ਤਕ ਪਹੁੰਚਣ ਦੇ ਤਰੀਕੇ ਲੱਭੇਗਾ।’’ ਫ਼ਰਵਰੀ 2022 ’ਚ ਯੂਕਰੇਨ ’ਤੇ ਰੂਸੀ ਹਮਲੇ ਤੋਂ ਬਾਅਦ ਭਾਰਤ ਰੂਸੀ ਕੱਚੇ ਤੇਲ ਦਾ ਦੂਜਾ ਸੱਭ ਤੋਂ ਵੱਡਾ ਖਰੀਦਦਾਰ ਬਣ ਕੇ ਉਭਰਿਆ ਹੈ। ਇਸ ਦੀ ਖਰੀਦ ਕੁਲ ਆਯਾਤ ਕੀਤੇ ਤੇਲ ਦੇ ਇਕ ਫ਼ੀ ਸਦੀ ਤੋਂ ਵਧ ਕੇ ਦੇਸ਼ ਦੀ ਕੁਲ ਤੇਲ ਖਰੀਦ ਦਾ ਲਗਭਗ 40 ਫ਼ੀ ਸਦੀ ਹੋ ਗਈ ਹੈ।
