AI ਦੇਵੇਗੀ ਪੂਰੀ ਗੱਲਬਾਤ ਦਾ ਵਿਸਥਾਰਤ ਵੇਰਵਾ ਅਤੇ ਸਰਾਂਸ਼
ਨਵੀਂ ਦਿੱਲੀ: ਕਾਲ ਕਰਨ ਵਾਲੇ ਦੀ ਪਛਾਣ ਨਾਲ ਸਬੰਧਤ ਮੋਬਾਈਲ ਐਪ True Caller ਨੇ ਸੋਮਵਾਰ ਨੂੰ ਭਾਰਤ ’ਚ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਨਾਲ ਚੱਲਣ ਵਾਲੇ ਕਾਲ ਰੀਕਾਰਡਿੰਗ ਫੀਚਰ ਨੂੰ ਲਾਂਚ ਕਰਨ ਦਾ ਐਲਾਨ ਕੀਤਾ ਹੈ। ਇਸ ਸਹੂਲਤ ’ਚ ਕਾਲਾਂ ਦਾ ਸਾਰਾਂਸ਼ ਅਤੇ ਵੇਰਵੇ ਵਰਗੀਆਂ ਸਹੂਲਤਾਂ ਮਿਲਣਗੀਆਂ।
ਹਾਲਾਂਕਿ ਕੰਪਨੀ ਨੇ ਕਿਹਾ ਕਿ AI ਅਧਾਰਤ ਕਾਲ ਰੀਕਾਰਡਿੰਗ ਸਹੂਲਤ ਮੁਫ਼ਤ ਨਹੀਂ ਹੋਵੇਗੀ ਅਤੇ ਪ੍ਰੀਮੀਅਮ ਸਬਸਕ੍ਰਿਪਸ਼ਨ ਦੇ ਨਾਲ ਹੀ ਉਪਲਬਧ ਹੋਵੇਗੀ। ਇਹ ਐਂਡਰਾਇਡ ਅਤੇ ਐਪਲ ਦੇ iOS ਆਪਰੇਟਿੰਗ ਸਿਸਟਮ ਦੋਹਾਂ ਵਾਲੇ ਮੋਬਾਈਲ ਫੋਨਾਂ ’ਤੇ ਕੰਮ ਕਰੇਗਾ। ਇਸ ਫੀਚਰ ਦੇ ਤਹਿਤ ਯੂਜ਼ਰਸ True Caller ਐਪ ਦੇ ਅੰਦਰ ਸਿੱਧੇ ਇਨਕਮਿੰਗ ਅਤੇ ਆਊਟਗੋਇੰਗ ਕਾਲ ਰੀਕਾਰਡ ਕਰ ਸਕਣਗੇ। ਇਹ ਮਹੱਤਵਪੂਰਨ ਗੱਲਬਾਤ ਨੂੰ ਰੀਕਾਰਡ ਕਰਨ ਅਤੇ ਪ੍ਰਬੰਧਨ ਕਰਨ ਦਾ ਇਕ ਆਸਾਨ ਅਤੇ ਕੁਸ਼ਲ ਤਰੀਕਾ ਪ੍ਰਦਾਨ ਕਰਦਾ ਹੈ।
ਟਰੂਕਾਲਰ ਨੇ ਲਾਂਚ ਦਾ ਐਲਾਨ ਕਰਦੇ ਹੋਏ ਇਕ ਬਿਆਨ ਵਿਚ ਕਿਹਾ ਕਿ ਆਰਟੀਫਿਸ਼ੀਅਲ ਇੰਟੈਲੀਜੈਂਸ ਤਕਨਾਲੋਜੀ ਦੇ ਆਉਣ ਨਾਲ ਲੋਕਾਂ ਨੂੰ ਲੋੜੀਂਦੇ ਵੇਰਵੇ ਦਾਖਲ ਕਰਨ ਬਾਰੇ ਚਿੰਤਾ ਕਰਨ ਦੀ ਜ਼ਰੂਰਤ ਨਹੀਂ ਹੋਵੇਗੀ ਅਤੇ ਕਾਲਾਂ ਦੌਰਾਨ ਉਤਪਾਦਕਤਾ ਵਿਚ ਸੁਧਾਰ ਹੋਵੇਗਾ।
ਕੰਪਨੀ ਨੇ ਕਿਹਾ ਕਿ ਇਸ ਫੀਚਰ ਦੀ ਵਰਤੋਂ ਨਾਲ ਪੂਰੀ ਗੱਲਬਾਤ ਦਾ ਵਿਸਥਾਰਤ ਵੇਰਵਾ ਅਤੇ ਸਰਾਂਸ਼ ਵੀ ਮਿਲੇਗਾ। ਇਸ ਤੋਂ ਇਲਾਵਾ ਕਿਸੇ ਵੀ ਕਾਲਰ ਦੀ ਗੱਲਬਾਤ ਨੂੰ ਅੰਗਰੇਜ਼ੀ ਅਤੇ ਹਿੰਦੀ ’ਚ ਲਿਖਤੀ ਰੂਪ ’ਚ ਬਦਲਿਆ ਜਾ ਸਕਦਾ ਹੈ। ਇਹ ਵਿਸ਼ੇਸ਼ ਸਹੂਲਤ ਪ੍ਰੀਮੀਅਮ ਪਲਾਨ ਦੇ ਤਹਿਤ ਹੀ ਦਿਤੀ ਜਾ ਰਹੀ ਹੈ ਜੋ 75 ਰੁਪਏ ਮਹੀਨਾਵਾਰ ਜਾਂ 529 ਰੁਪਏ ਸਾਲਾਨਾ ਤੋਂ ਸ਼ੁਰੂ ਹੁੰਦੀ ਹੈ। ਟਰੂਕਾਲਰ ਦੇ ਮੈਨੇਜਿੰਗ ਡਾਇਰੈਕਟਰ ਅਤੇ ਚੀਫ ਪ੍ਰੋਡਕਟ ਅਫਸਰ ਰਿਸ਼ੀਤ ਝੁਨਝੁਨਵਾਲਾ ਨੇ ਕਿਹਾ ਕਿ ਤਾਜ਼ਾ ਪਹਿਲ ਗਾਹਕਾਂ ਨੂੰ ਉਨ੍ਹਾਂ ਦੀ ਗੱਲਬਾਤ ਦੇ ਪ੍ਰਬੰਧਨ ਵਿਚ ਵਧੇਰੇ ਕੰਟਰੋਲ ਅਤੇ ਲਚਕੀਲਾਪਨ ਪ੍ਰਦਾਨ ਕਰਦੀ ਹੈ।
