ਨਵੀਂ ਦਿੱਲੀ, 30 ਨਵੰਬਰ: ਆਧਾਰ ਐਕਟ ਦੇ ਕਥਿਤ ਉਲੰਘਣ ਲਈ ਭਾਰਤੀ ਵਿਸ਼ੇਸ਼ ਪਛਾਣ ਅਥਾਰਟੀ ਜਾਨੀ ਕਿ ਯੂ.ਆਈ.ਡੀ.ਏ.ਆਈ. ਨੇ ਭਾਰਤੀ ਏਅਰਟੈੱਲ ਵਿਰੁਧ ਜਾਂਚ ਦੇ ਆਦੇਸ਼ ਦਿਤੇ ਹਨ। ਕੰਪਨੀ 'ਤੇ ਦੋਸ਼ ਹੈ ਕਿ ਗਾਹਕਾਂ ਦੇ ਮੋਬਾਇਲ ਨੰਬਰ ਦਾ ਆਧਾਰ ਵੈਰੀਫ਼ੀਕੇਸ਼ਨ ਕਰਨ ਵੇਲੇ ਬਿਨਾ ਉਨ੍ਹਾਂ ਨੂੰ ਦੱਸੇ ਹੀ ਕੰਪਨੀ ਨੇ ਚੋਰੀ ਏਟਰਟੈੱਲ ਪੇਮੈਂਟ ਬੈਂਕ 'ਚ ਖ਼ਾਤੇ ਖੋਲ੍ਹ ਦਿਤੇ।ਯੂ.ਆਈ.ਡੀ.ਏ.ਆਈ. ਨੇ ਇਹ ਵੀ ਧਮਕੀ ਦਿਤੀ ਹੈ ਕਿ ਉਹ ਇਸ ਕਥਿਤ ਉਲੰਘਣ ਲਈ ਭਾਰਤੀ ਏਅਰਟੈੱਲ 'ਤੇ ਜੁਰਮਾਨਾ ਲਗਾਵੇਗਾ। ਇਕ ਅਧਿਕਾਰੀ ਅਨੁਸਾਰ ਇਹ ਬਹੁਤ ਗੰਭੀਰ ਗ਼ਲਤੀ ਹੈ, ਇਸ ਲਈ ਏਅਰਟੈੱਲ ਵਿਰੁਧ ਜਾਂਚ ਦੇ ਆਦੇਸ਼ ਦਿਤੇ ਗਏ ਹਨ। ਅਧਿਕਾਰੀ ਅਨੁਸਾਰ ਇਹ ਵਿਸ਼ਵਾਸ ਅਤੇ
ਇਕਰਾਰਨਾਮੇ ਦਾ ਅਪਰਾਧਿਕ ਉਲੰਘਣ ਤਾਂ ਹੈ ਹੀ, ਨਾਲ ਹੀ ਆਧਾਰ ਐਕਟ ਦੇ ਕਾਨੂੰਨ ਦੀ ਵੀ ਉਲੰਘਣਾ ਹੈ। ਇਸ ਦਾ ਪਤਾ ਉਦੋਂ ਚਲਿਆ ਜਦੋਂ ਏਅਰਟੈੱਲ ਦੇ ਕੁਝ ਗਾਹਕਾਂ ਦੀ ਐਲ.ਪੀ.ਜੀ. ਸਬਸਿਡੀ ਉਨ੍ਹਾਂ ਦੇ ਬੈਂਕ ਖ਼ਾਤਿਆਂ ਦੀ ਥਾਂ ਪੇਮੈਂਟ ਬੈਂਕ 'ਚ ਜਾਣ ਲੱਗੀ। ਕਈ ਗਾਹਕਾਂ ਨੇ ਇਸ ਤੋਂ ਬਾਅਦ ਸ਼ਿਕਾਇਤ ਵੀ ਕੀਤੀ ਅਤੇ ਕਿਹਾ ਕਿ ਉਨ੍ਹਾਂ ਨੂੰ ਖ਼ੁਦ ਨਹੀਂ ਪਤਾ ਕਿ ਏਅਰਟੈੱਲ ਪੇਮੈਂਟ ਬੈਂਕ 'ਚ ਖ਼ਾਤਾ ਕਿਵੇਂ ਖੁੱਲ੍ਹ ਗਿਆ। (ਏਜੰਸੀ)
