ਕੈਲੇਫ਼ੋਰਨੀਆ, 16 ਜਨਵਰੀ : ਅਮਰੀਕਾ ਦੇ ਕੈਲੇਫ਼ੋਰਨੀਆ ਸਥਿਤ ਇਕ ਘਰ 'ਚ ਅਪਣੇ ਹੀ 13 ਬੱਚਿਆਂ ਨੂੰ ਬੰਧਕ ਬਣਾ ਕੇ ਰੱਖਣ ਵਾਲੇ ਜੋੜੇ ਨੂੰ ਪੁਲਿਸ ਵਲੋਂ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਪੀੜ੍ਹਤ ਬੱਚੇ ਕੁਪੋਸ਼ਣ ਦਾ ਸ਼ਿਕਾਰ ਹਨ। ਫਿਲਹਾਲ ਉਨ੍ਹਾਂ ਦਾ ਹਸਪਤਾਲ ਵਿਚ ਇਲਾਜ ਕੀਤਾ ਜਾ ਰਿਹਾ ਹੈ।57 ਸਾਲਾ ਡੇਵਿਡ ਐਲੇਨ ਤੁਰਪਿਨ ਅਤੇ 49 ਸਾਲਾ ਲੁਈਸ ਅੰਨਾ ਤੁਰਪਿਨ ਦੇ 13 ਬੱਚੇ ਕੁਪੋਸ਼ਣ ਦਾ ਸ਼ਿਕਾਰ ਹਨ, ਜਿਨ੍ਹਾਂ ਦੀ ਉਮਰ 2 ਤੋਂ ਲੈ ਕੇ 29 ਸਾਲ ਹੈ। ਜਦੋਂ ਬੱਚਿਆਂ ਨੂੰ ਆਜ਼ਾਦ ਕਰਵਾਇਆ ਗਿਆ, ਉਸ ਸਮੇਂ ਬੱਚੇ ਹਨ੍ਹੇਰੇ ਵਿਚ ਬੈੱਡ ਨਾਲ ਬੱਝੇ ਹੋਏ ਸਨ। ਪੁਲਿਸ ਅਧਿਕਾਰੀਆਂ ਨੇ ਮਾਤਾ-ਪਿਤਾ ਵਲੋਂ ਬੱਚਿਆਂ ਨੂੰ ਤੰਗ-ਪ੍ਰਸ਼ਾਨ ਅਤੇ ਤਸੀਹੇ ਦੇਣ ਦੇ ਮਾਮਲੇ ਵਿਚ ਜਾਂਚ ਸ਼ੁਰੂ ਕਰ ਦਿਤੀ ਹੈ। ਜੋੜੇ ਦੀ ਜ਼ਮਾਨਤ ਰਾਸ਼ੀ 90 ਲੱਖ ਡਾਲਰ ਤੈਅ ਕੀਤੀ ਗਈ ਹੈ।ਦਰਅਸਲ ਜੋੜੇ ਦੀ ਇਕ 17 ਸਾਲਾ ਲੜਕੀ ਕਿਸੇ ਤਰ੍ਹਾਂ ਘਰ 'ਚੋਂ ਦੌੜਣ ਵਿਚ ਸਫਲ ਹੋਈ ਅਤੇ ਉਸ ਨੇ 911 'ਤੇ ਫ਼ੋਨ ਕਰ ਕੇ ਮਾਮਲੇ ਦੀ ਸੂਚਨਾ ਦਿਤੀ ਅਤੇ ਹੱਡਬੀਤੀ ਸੁਣਾਈ। ਲੜਕੀ ਨੇ ਦਸਿਆ ਕਿ ਉਸ ਦੇ 12 ਭੈਣ-ਭਰਾਵਾਂ ਨੂੰ ਘਰ ਵਿਚ ਮਾਤਾ-ਪਿਤਾ ਨੇ ਬੰਧਕ ਬਣਾ ਕੇ ਰਖਿਆ ਹੋਇਆ ਹੈ।
ਅਧਿਕਾਰੀਆਂ ਨੇ ਦਸਿਆ ਕਿ ਲੜਕੀ ਦੀ ਸਿਹਤ ਇੰਨੀ ਕੁ ਮਾੜੀ ਸੀ ਕਿ ਉਨ੍ਹਾਂ ਨੂੰ ਲੱਗਾ ਕਿ ਉਸ ਦੀ ਉਮਰ 10 ਸਾਲ ਹੈ। ਪੁਲਿਸ ਮੌਕੇ 'ਤੇ ਪੁੱਜੀ ਤਾਂ ਜਾਂਚ 'ਚ ਸਾਹਮਣੇ ਆਇਆ ਕਿ ਕਈ ਬੱਚਿਆਂ ਨੂੰ ਹਨ੍ਹੇਰੇ 'ਚ ਬੈੱਡ ਨਾਲ ਜ਼ੰਜੀਰਾਂ ਅਤੇ ਤਾਲੇ ਨਾਲ ਬੰਨ੍ਹ ਕੇ ਰਖਿਆ ਗਿਆ ਸੀ ਅਤੇ ਉਨ੍ਹਾਂ ਦੇ ਆਲੇ-ਦੁਆਲੇ ਬਦਬੂ ਆ ਰਹੀ ਸੀ। ਜੋੜੇ ਨੇ ਅਪਣੇ ਹੀ ਬੱਚਿਆਂ ਨੂੰ ਇਸ ਤਰ੍ਹਾਂ ਤਰਸਯੋਗ ਹਾਲਤ ਵਿਚ ਰੱਖਣ ਦਾ ਕੋਈ ਕਾਰਨ ਨਹੀਂ ਦਸਿਆ ਪਰ ਉਹ ਉਦੋਂ ਹੈਰਾਨ ਰਹਿ ਗਏ, ਜਦੋਂ ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਇਨ੍ਹਾਂ 'ਚੋਂ 7 ਬਾਲਗ ਸਨ, ਜਿਨ੍ਹਾਂ ਦੀ ਉਮਰ 18 ਤੋਂ 29 ਸਾਲ ਦਰਮਿਆਨ ਹੈ। (ਪੀਟੀਆਈ)
