ਕੈਲੀਫੋਰਨੀਆ : ਅਮਰੀਕਾ ਦੇ ਕੈਲੀਫੋਰਨੀਆ ਸਥਿਤ ਇਕ ਘਰ 'ਚ ਆਪਣੇ ਹੀ 13 ਬੱਚਿਆਂ ਨੂੰ ਬੰਧਕ ਬਣਾ ਕੇ ਰੱਖਣ ਵਾਲੇ ਜੋਡ਼ੇ ਨੂੰ ਪੁਲਸ ਨੇ ਗ੍ਰਿਫਤਾਰ ਕੀਤਾ ਗਿਆ ਹੈ। 57 ਸਾਲਾ ਡੇਵਿਡ ਐਲੇਨ ਤੁਰਪਿਨ ਅਤੇ 49 ਸਾਲਾ ਲੁਈਸ ਅੰਨਾ ਤੁਰਪਿਨ ਦੇ 13 ਬੱਚੇ ਕੁਪੋਸ਼ਣ ਦਾ ਸ਼ਿਕਾਰ ਹਨ, ਜਿਨ੍ਹਾਂ ਦੀ ਉਮਰ 2 ਤੋਂ ਲੈ ਕੇ 29 ਸਾਲ ਹੈ। ਜਦੋਂ ਬੱਚਿਆਂ ਨੂੰ ਆਜ਼ਾਦ ਕਰਵਾਇਆ ਗਿਆ, ਉਸ ਸਮੇਂ ਬੱਚੇ ਹਨ੍ਹੇਰੇ ਵਿਚ ਬੈੱਡ ਨਾਲ ਬੱਝੇ ਹੋਏ ਸਨ। ਪੁਲਸ ਅਧਿਕਾਰੀਆਂ ਨੇ ਮਾਤਾ-ਪਿਤਾ ਵਲੋਂ ਬੱਚਿਆਂ ਨੂੰ ਤੰਗ-ਪ੍ਰਸ਼ਾਨ ਅਤੇ ਤਸੀਹੇ ਦੇਣ ਦੇ ਮਾਮਲੇ ਵਿਚ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਜੋਡ਼ੇ ਦੀ ਜ਼ਮਾਨਤ ਰਾਸ਼ੀ 90 ਲੱਖ ਡਾਲਰ ਤੈਅ ਕੀਤੀ ਗਈ ਹੈ।
ਇੰਝ ਆਈ ਜੋਡ਼ੇ ਦੀ ਸੱਚਾਈ ਸਾਹਮਣੇ
ਦਰਅਸਲ ਜੋਡ਼ੇ ਦੀ ਇਕ 17 ਸਾਲਾਂ ਲਡ਼ਕੀ ਕਿਸੇ ਤਰ੍ਹਾਂ ਘਰ 'ਚੋਂ ਦੌਡ਼ਣ ਵਿਚ ਸਫਲ ਹੋਈ ਅਤੇ ਉਸ ਨੇ 911 'ਤੇ ਫੋਨ ਕਰ ਕੇ ਮਾਮਲੇ ਦੀ ਸੂਚਨਾ ਦਿੱਤੀ ਅਤੇ ਹੱਡ ਬੀਤੀ ਸੁਣਾਈ। ਲਡ਼ਕੀ ਨੇ ਦੱਸਿਆ ਕਿ ਉਸ ਦੇ 12 ਭੈਣ-ਭਰਾਵਾਂ ਨੂੰ ਘਰ ਵਿਚ ਮਾਤਾ-ਪਿਤਾ ਨੇ ਬੰਧਕ ਬਣਾ ਕੇ ਰੱਖਿਆ ਹੋਇਆ ਹੈ।
ਅਧਿਕਾਰੀਆਂ ਨੇ ਦੱਸਿਆ ਕਿ ਲਡ਼ਕੀ ਦੀ ਸਿਹਤ ਇੰਨੀ ਕੁ ਮਾਡ਼ੀ ਸੀ ਕਿ ਉਨ੍ਹਾਂ ਨੂੰ ਲੱਗਾ ਕਿ ਉਸ ਦੀ ਉਮਰ 10 ਸਾਲ ਹੈ। ਪੁਲਸ ਮੌਕੇ 'ਤੇ ਪੁੱਜੀ ਤਾਂ ਜਾਂਚ 'ਚ ਸਾਹਮਣੇ ਆਇਆ ਕਿ ਕਈ ਬੱਚਿਆਂ ਨੂੰ ਹਨ੍ਹੇਰੇ 'ਚ ਬੈੱਡ ਨਾਲ ਜੰਜ਼ੀਰਾਂ ਅਤੇ ਤਾਲੇ ਨਾਲ ਬੰਨ੍ਹ ਕੇ ਰੱਖਿਆ ਗਿਆ ਸੀ ਅਤੇ ਉਨ੍ਹਾਂ ਦੇ ਆਲੇ-ਦੁਆਲੇ ਬਦਬੂ ਆ ਰਹੀ ਸੀ।
ਜੋਡ਼ੇ ਨੇ ਆਪਣੇ ਹੀ ਬੱਚਿਆਂ ਨੂੰ ਇਸ ਤਰ੍ਹਾਂ ਤਰਸਯੋਗ ਹਾਲਤ ਵਿਚ ਰੱਖਣ ਦਾ ਕੋਈ ਕਾਰਨ ਨਹੀਂ ਦੱਸਿਆ ਪਰ ਉਹ ਉਦੋਂ ਹੈਰਾਨ ਰਹਿ ਗਏ, ਜਦੋਂ ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਇਨ੍ਹਾਂ 'ਚੋਂ 7 ਬਾਲਗ ਸਨ, ਜਿਨ੍ਹਾਂ ਦੀ ਉਮਰ 18 ਤੋਂ 29 ਸਾਲ ਦਰਮਿਆਨ ਹੈ। ਪੀਡ਼ਤ ਬੱਚੇ ਕੁਪੋਸ਼ਣ ਦਾ ਸ਼ਿਕਾਰ ਹਨ, ਫਿਲਹਾਲ ਉਨ੍ਹਾਂ ਦਾ ਹਸਪਤਾਲ ਵਿਚ ਇਲਾਜ ਕੀਤਾ ਜਾ ਰਿਹਾ ਹੈ।
