ਇਸਲਾਮਾਬਾਦ, 13 ਦਸੰਬਰ : ਪਾਕਿਸਤਾਨ ਦੇ ਸਾਬਕਾ ਵਿਦੇਸ਼ ਮੰਤਰੀ ਖ਼ੁਰਸ਼ੀਦ ਕਸੂਰੀ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਇਸ ਦਾਅਵੇ ਨੂੰ 'ਬੇਬੁਨਿਆਦ ਅਜੀਬ ਕਹਾਣੀ' ਦੱਸ ਕੇ ਰੱਦ ਕਰ ਦਿਤਾ ਕਿ ਉਨ੍ਹਾਂ ਦਾ ਦੇਸ਼ ਗੁਜਰਾਤ ਵਿਧਾਨ ਸਭਾ ਚੋਣਾਂ ਵਿਚ ਦਖ਼ਲ ਦੇ ਰਿਹਾ ਹੈ। ਨਵੰਬਰ 2002 ਤੋਂ ਨਵੰਬਰ 2007 ਤਕ ਪਾਕਿਸਤਾਨ ਦੇ ਵਿਦੇਸ਼ ਮੰਤਰੀ ਰਹੇ ਕਸੂਰੀ ਨੇ ਇੰਟਰਵਿਊ ਵਿਚ ਕਿਹਾ, 'ਮੈਂ ਹੈਰਾਨ ਹਾਂ। ਮੈਂ ਰਾਤ ਦੇ ਖਾਣੇ ਲਈ ਗਿਆ ਸੀ ਅਤੇ ਉਥੇ ਇਹ ਸੁਣਿਆ ਕਿ ਪਾਕਿਸਤਾਨ ਸਾਜ਼ਸ਼ ਰਚ ਰਿਹਾ ਹੈ।' ਉਨ੍ਹਾਂ ਕਿਹਾ ਕਿ ਰਾਤ ਦੇ ਖਾਣੇ ਸਮੇਂ ਸਾਬਕਾ ਪ੍ਰਧਾਨ ਮੰਤਰੀ ਡਾ. ਮਨਮੋਹਨ ਸਿੰਘ, ਸਾਬਕਾ ਰਾਸ਼ਟਰਪਤੀ ਹਾਮਿਦ ਅੰਸਾਰੀ, ਸਾਬਕਾ ਫ਼ੌਜ ਮੁਖੀ ਵਿਪਨ ਰਾਵਤ, ਚਾਰ ਸਾਬਕਾ ਵਿਦੇਸ਼ ਸਕੱਤਰ ਅਤੇ ਪਾਕਿਸਤਾਨ ਵਿਚ ਤੈਨਾਤ ਰਹੇ ਤਿੰਨ ਸਾਬਕਾ ਰਾਜਦੂਤ ਮੌਜੂਦ ਸਨ।
ਕਸੂਰੀ ਨੇ ਸਵਾਲ ਕੀਤਾ, 'ਕੀ ਉਹ ਵੀ ਪਾਕਿਸਤਾਨ ਦੀ ਸਾਜ਼ਸ਼ ਵਿਚ ਸ਼ਾਮਲ ਸਨ? ਇਹ ਬੇਬੁਨਿਆਦ ਅਜੀਬ ਕਹਾਣੀ ਹੈ। ਮੈਂ ਇਸ ਤੋਂ ਇਲਾਵਾ ਹੋਰ ਕੀ ਕਹਿ ਸਕਦਾ ਹਾਂ? ਗੁਜਰਾਤ ਦੇ ਪਾਲਨਪੁਰ ਵਿਚ ਇਸ ਹਫ਼ਤੇ ਚੋਣ ਪ੍ਰਚਾਰ ਦੌਰਾਨ ਮੋਦੀ ਨੇ ਕਿਹਾ ਸੀ ਕਿ ਪਾਕਿਸਤਾਨ ਗੁਜਰਾਤ ਚੋਣਾਂ ਵਿਚ ਦਖ਼ਲ ਦੇ ਰਿਹਾ ਹੈ। ਕਸੂਰੀ ਨੇ ਕਿਹਾ, 'ਨਿਜੀ ਸਮਾਗਮ ਵਿਚ ਸ਼ਾਮਲ ਲੋਕਾਂ ਨੇ ਭਾਰਤ ਅਤੇ ਪਾਕਿਸਤਾਨ ਦੇ ਸਬੰਧਾਂ ਬਾਰੇ ਗੱਲ ਕੀਤੀ ਸੀ। ਮੈਂ ਪਿਛਲੇ ਸਮਾਗਮਾਂ ਵਿਚ ਸਾਬਕਾ ਰਾਅ ਮੁਖੀ ਨੂੰ ਵੀ ਮਿਲ ਚੁਕਾ ਹਾਂ। ਕੀ ਇਸ ਦਾ ਮਤਲਬ ਇਹ ਹੈ ਕਿ ਮੈਂ ਜਿਹੜੇ ਲੋਕਾਂ ਨੂੰ ਮਿਲ ਚੁਕਾ ਹਾਂ, ਉਹ ਸਾਜ਼ਸ਼ੀ ਹਨ? (ਏਜੰਸੀ)
