ਅਹਿਮਦ 1993 ਬੰਬ ਧਮਾਕਿਆਂ ਦੇ ਦੋਸ਼ੀ ਦਾਊਦ ਇਬਰਾਹੀਮ ਦਾ ਬੇਹੱਦ ਕਰੀਬੀ
ਗੁਜਰਾਤ ਏਟੀਐਸ ਨੇ 1993 ਮੁੰਬਈ ਧਮਾਕਿਆਂ ਦੇ ਮੋਸਟ ਵਾਂਟੇਡ ਅਤਿਵਾਦੀ ਅਹਿਮਦ ਲੰਬੂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਅਹਿਮਦ ਨੂੰ ਫੜਨ ਲਈ ਸੀਬੀਆਈ ਨੇ ਪਹਿਲਾਂ ਲੁੱਟ ਆਊਟ ਨੋਟਿਸ ਜਾਰੀ ਕੀਤਾ ਸੀ। ਮੰਨਿਆ ਜਾਂਦਾ ਹੈ ਕਿ ਅਹਿਮਦ 1993 ਬੰਬ ਧਮਾਕਿਆਂ ਦੇ ਦੋਸ਼ੀ ਦਾਊਦ ਇਬਰਾਹੀਮ ਦਾ ਬੇਹੱਦ ਕਰੀਬੀ ਹੈ।
ਇਸ ਮਾਮਲੇ ਵਿਚ ਇਸ ਤੋਂ ਪਹਿਲਾਂ ਇਕ ਹੋਰ ਦੋਸ਼ੀ ਫ਼ਾਰੂਕ ਟਕਲਾ ਵੀ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਿਆ ਹੈ। ਖ਼ਬਰਾਂ ਦੀ ਮੰਨੀਏ ਤਾਂ ਕੁੱਝ ਦਿਨ ਪਹਿਲਾਂ ਤੋਂ ਹੀ ਗੁਜਰਾਤ ਏਟੀਐਸ ਅਹਿਮਦ ਦੀ ਭਾਲ ਵਿਚ ਸੀ। ਇਸ ਦੇ ਲਈ ਵਲਸਾਡ ਵਾਪੀ ਦੇ ਵਿਚਕਾਰ ਸਮੁਦਰ ਵਿਚ ਸਰਚ ਅਪਰੇਸ਼ਨ ਵੀ ਚਲਾਇਆ ਜਾ ਰਿਹਾ ਸੀ।ਮੀਡੀਆ ਰਿਪੋਰਟਾਂ ਦੀ ਮੰਨੀਏ ਤਾਂ ਸੀਬੀਆਈ ਦਾ ਮੰਨਣਾ ਹੈ ਕਿ ਫ਼ਾਰੂਕ ਹੀ ਉਹ ਵਿਅਕਤੀ ਹੈ, ਜਿਸ ਨੇ ਮੁੰਬਈ ਵਿਚ ਬੰਬ ਧਮਾਕਿਆਂ ਦੀ ਪੂਰੀ ਯੋਜਨਾ ਬਣਾਈ ਸੀ। ਫ਼ਾਰੂਕ ਦੀ ਯੋਜਨਾ ਮੁਤਾਬਕ ਹੀ ਮੁੰਬਈ ਵਰਗੇ ਸ਼ਹਿਰ ਵਿਚ ਇਕੋ ਵਾਰ 12 ਥਾਵਾਂ 'ਤੇ ਧਮਾਕੇ ਕੀਤੇ ਗਏ ਸਨ। 1993 ਵਿਚ ਬੰਬ ਧਮਾਕਿਆਂ ਤੋਂ ਬਾਅਦ ਜਦੋਂ ਫ਼ਾਰੂਕ ਭਾਰਤ ਤੋਂ ਦੁਬਈ ਭੱਜ ਗਿਆ ਤਾਂ ਭਾਰਤ ਸਰਕਾਰ ਨੇ ਇੰਟਰਪੋਲ ਦੀ ਮਦਦ ਮੰਗੀ ਸੀ।
ਦਸ ਦਈਏ ਕਿ ਅਹਿਮਦ 'ਤੇ 24 ਸਾਲ ਪਹਿਲਾਂ 12 ਮਾਰਚ 1993 ਵਿਚ ਮੁੰਬਈ ਧਮਾਕਿਆਂ ਦੀ ਸਾਜਿਸ਼ ਰਚਣ ਅਤੇ ਹਥਿਆਰ ਸਪਲਾਈ ਕਰਨ ਦਾ ਦੋਸ਼ ਹੈ। 12 ਮਾਰਚ ਨੂੰ ਮੁੰਬਈ 12 ਲੜੀਵਾਰ ਧਮਾਕਿਆਂ ਨਾਲ ਦਹਿਲ ਉਠੀ ਸੀ। ਇਸੇ ਦੇ ਨਾਲ ਧਮਾਕਿਆਂ ਤੋਂ ਬਾਅਦ ਅਹਿਮਦ ਲੰਬੂ ਨੂੰ ਭਜਾਉਣ ਵਿਚ ਡੋਸਾ ਨੇ ਉਸ ਦੀ ਮਦਦ ਕੀਤੀ ਸੀ।
ਇਸ ਦੇ ਬਾਅਦ ਤੋਂ ਹੀ ਅਹਿਮਦ ਲੰਬੂ ਦੀ ਭਾਲ ਕੀਤੀ ਜਾ ਰਹੀ ਸੀ। ਅਹਿਮਦ ਲੰਬੂ ਨੂੰ ਫੜਨ ਲਈ ਸੀਬੀਆਈ ਨੇ ਲੁੱਟ ਆਊਟ ਨੋਟਿਸ ਅਤੇ ਇੰਟਰਪੋਲ ਨੋਟਿਸ ਜਾਰੀ ਕੀਤਾ ਸੀ। ਇਸ ਤੋਂ ਇਲਾਵਾ ਅਹਿਮਦ ਲੰਬੂ ਦੀ ਜਾਣਕਾਰੀ ਦੇਣ ਵਾਲੇ ਨੂੰ 5 ਲੱਖ ਰੁਪਏ ਦਾ ਇਨਾਮ ਵੀ ਰਖਿਆ ਗਿਆ ਸੀ। ਏਟੀਐਸ ਇਸ ਨੂੰ ਵੱਡੀ ਕਾਮਯਾਬੀ ਦਸ ਰਹੀ ਹੈ।