ਸਿੱਖ ਵੋਟਰਾਂ ਨੂੰ ਸਾਰਾ ਸੱਚ ਦਸਣ ਲਈ ਸਿਆਸੀ ਪਾਰਟੀਆਂ ਤੇ ਉਮੀਦਵਾਰ ਹੋਣਗੇ ਪਾਬੰਦ: ਰਾਜ ਕੁਮਾਰ ਅਨੰਦ
Delhi Gurdwara Elections: ਹੁਣ ਦਿੱਲੀ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ ਲੜਨ ਵਾਲੇ ਉਮੀਦਵਾਰਾਂ ਨੂੰ, ਇਕ ਫ਼ਾਰਮ ਭਰ ਕੇ, ਮੋਟੇ ਅੱਖਰਾਂ ਵਿਚ ਲਿਖ ਕੇ, ਅਪਣੇ ਵਿਰੁਧ ਚਲ ਰਹੇ ਅਪਰਾਧਕ ਮਾਮਲਿਆਂ ਬਾਰੇ ਵੇਰਵਾ ਦੇਣਾ ਲਾਜ਼ਮੀ ਹੋਵੇਗਾ।
ਦਿੱਲੀ ਸਰਕਾਰ ਦੇ ਗੁਰਦਵਾਰਾ ਚੋਣ ਮੰਤਰੀ ਰਾਜ ਕੁਮਾਰ ਅਨੰਦ ਨੇ ਇਹ ਜਾਣਕਾਰੀ ਦਿੰਦੇ ਹੋਏ ਸੁਪਰੀਮ ਕੋਰਟ ਦੇ ਇਕ ਹੁਕਮ ਦਾ ਹਵਾਲਾ ਦਿੰਦਿਆਂ ਕਿਹਾ,“ਭਾਵੇਂ ਸੁਪਰੀਮ ਕੋਰਟ ਦਾ ਇਹ ਹੁਕਮ ਦਿੱਲੀ ਸਿੱਖ ਗੁਰਦਵਾਰਾ ਐਕਟ-1971 ਅਤੇ ਗੁਰਦਵਾਰਾ ਨਿਯਮਾਂ ’ਤੇ ਲਾਗੂ ਨਹੀਂ ਹੁੰਦਾ, ਬਾਵਜੂਦ ਇਸ ਦੇ ਗੁਰਦਵਾਰਾ ਚੋਣ ਮਹਿਕਮਾ ਗੁਰਦਵਾਰਾ ਚੋਣ ਅਮਲ ਵਿਚ ਪਾਰਦਰਸ਼ਤਾ ਲਿਆਉਣ ਲਈ ਕੰਮ ਕਰ ਰਿਹਾ ਹੈ। ਇਸ ਅਧੀਨ ਹੁਣ ਕਿਸੇ ਵੀ ਸਿਆਸੀ ਪਾਰਟੀ ਦੀ ਟਿਕਟ ’ਤੇ ਚੋਣ ਲੜਨ ਵਾਲੇ ਉਮੀਦਵਾਰ ਨੂੰ ਅਪਣੇ ਅਪਰਾਧਕ ਕੇਸਾਂ ਬਾਰੇ ਅਪਣੀ ਪਾਰਟੀ ਨੂੰ ਵੀ ਦਸਣਾ ਜ਼ਰੂਰੀ ਹੋਵੇਗਾ, ਅੱਗੋਂ ਪਾਰਟੀ ਇਸ ਨੂੰ ਅਪਣੀ ਵੈੱਬਸਾਈਟ ਰਾਹੀਂ, ਉਮੀਦਵਾਰ ਦੇ ਅਪਰਾਧਕ ਰੀਕਾਰਡ ਬਾਰੇ ਵੋਟਰਾਂ ਨੂੰ ਦਸਣ ਲਈ ਪਾਬੰਦ ਹੋਵੇਗੀ।”
ਉਨ੍ਹਾਂ ਦਸਿਆ ਕਿ ਸੁਪਰੀਮ ਕੋਰਟ ਦੀਆਂ ਹਦਾਇਤਾਂ ਨੂੰ ਲਾਗੂ ਕਰਨ ਲਈ ਇਹ ਇਸ ਬਾਰੇ ਕਦਮ ਚੁਕੇ ਜਾ ਰਹੇ ਹਨ। ਦਿੱਲੀ ਸਰਕਾਰ ਵਲੋਂ ਜਾਰੀ ਕੀਤੇ ਗਏ ਬਿਆਨ ਵਿਚ ਮੰਤਰੀ ਨੇ ਦਸਿਆ ਕਿ ਉਮੀਦਵਾਰ ਅਤੇ ਸਿਆਸੀ ਪਾਰਟੀ ਦੋਹਾਂ ਨੂੰ ਅਖ਼ਬਾਰਾਂ ਅਤੇ ਇਲੈਕਟ੍ਰੋਨਿਕ ਮੀਡੀਆ ਰਾਹੀਂ ਇਹ ਐਲਾਨ ਕਰਨਾ ਚਾਹੀਦਾ ਹੈ ਤਾਕਿ ਲੋਕਾਂ ਨੂੰ ਚੋਣ ਲੜ ਰਹੇ ਉਮੀਦਵਾਰਾਂ ਦੇ ਕਿਰਦਾਰ, ਪਿਛੋਕੜ ਤੇ ਅਪਰਾਧਕ ਰੀਕਾਰਡ ਬਾਰੇ ਪਤਾ ਲੱਗ ਸਕੇ।
ਮੰਤਰੀ ਨੇ ਦਸਿਆ ਕਿ ਇਸ ਬਾਰੇ ਗੁਰਦਵਾਰਾ ਚੋਣ ਮਹਿਕਮਾ ਗੁਰਦਵਾਰਾ ਨਿਯਮਾਂ ਵਿਚ ਲੋੜੀਂਦੀਆਂ ਸੋਧਾਂ ਕਰ ਕੇ, ਲੋੜੀਂਦੇ ਕਦਮ ਪੁੱਟ ਰਿਹਾ ਹੈ ਜਿਸ ਨਾਲ ਸਿੱਖ ਵੋਟਰਾਂ ਨੂੰ ਠੋਸ ਜਾਣਕਾਰੀ ਹਾਸਲ ਹੋ ਸਕੇ ਜਿਸ ਨਾਲ ਜਮਹੂਰੀ ਕਦਰਾਂ ਕੀਮਤਾਂ ਦੀ ਰਾਖੀ ਕੀਤੀ ਜਾ ਸਕੇ ।
(For more Punjabi news apart from Candidates need to declare pending criminal cases for participation in Delhi Gurdwara Elections, stay tuned to Rozana Spokesman)
