ਜਦੋਂ ਕਿਸਾਨ ਬੀਜਣ ਲੱਗੇ ਸਿੱਖ,ਹਿੰਦੂ ਨਹੀਂ ਦੇਖਦਾ ਤਾਂ ਸਰਕਾਰ ਕਿਉਂ ਕਰ ਰਹੀ ਵਿਤਕਰਾ- ਮੌਲਾਨਾ ਉਸਮਾਨ ਰਹਿਮਾਨੀ
ਨਵੀਂ ਦਿੱਲੀ (ਹਰਦੀਪ ਸਿੰਘ ਭੋਗਲ): ਖੇਤੀ ਕਾਨੂੰਨਾਂ ਵਿਰੁੱਧ ਕੁੰਡਲੀ ਬਾਰਡਰ ‘ਤੇ ਕਿਸਾਨ ਮੋਰਚਾ ਜਾਰੀ ਹੈ। ਇਸ ਦੌਰਾਨ ਉਸਮਾਨ ਲੁਧਿਆਣਵੀ ਅਪਣੇ ਕਾਫਲੇ ਨਾਲ ਦਿੱਲੀ ਬਾਰਡਰ ਪਹੁੰਚੇ। 26 ਜਨਵਰੀ ਦੀ ਘਟਨਾ ਬਾਰੇ ਗੱਲ ਕਰਦਿਆਂ ਮੌਲਾਨਾ ਉਸਮਾਨ ਰਹਿਮਾਨੀ ਨੇ ਕਿਹਾ ਕਿ ਨੈਸ਼ਨਲ ਮੀਡੀਆ, ਦਿੱਲੀ ਪੁਲਿਸ ਅਤੇ ਕੁਝ ਸਰਕਾਰੀ ਲੋਕਾਂ ਨੇ ਮਿਲ ਕੇ ਕਿਸਾਨਾਂ ਨੂੰ ਬਦਨਾਮ ਕਰਨ ਲਈ ਸਾਜ਼ਿਸ਼ ਰਚੀ। ਪੂਰੀ ਦੁਨੀਆਂ ਨੂੰ ਇਹੀ ਦਿਖਾਇਆ ਗਿਆ ਕਿ ਕਿਸਾਨ ਦੇਸ਼ ਵਿਰੋਧੀ ਹਨ।
Maulana Usman Ludhianvi
ਇਸ ਤੋਂ ਬਾਅਦ ਰਾਕੇਸ਼ ਟਿਕੈਤ ਦੇ ਹੰਝੂਆਂ ਨੇ ਪੂਰੇ ਦੇਸ਼ ਨੂੰ ਕਿਸਾਨੀ ਅੰਦੋਲਨ ਨਾਲ ਜੋੜ ਦਿੱਤਾ। ਉਹਨਾਂ ਕਿਹਾ ਜਦੋਂ ਕਿਸਾਨ ਜ਼ਮੀਨ ਵਿਚ ਬੀਜ ਬੀਜਦਾ ਹੈ ਤਾਂ ਉਹ ਇਹ ਤੈਅ ਨਹੀਂ ਕਰਦਾ ਕਿ ਇਸ ਫਸਲ ਨੂੰ ਹਿੰਦੂ ਖਾਵੇਗਾ ਜਾਂ ਮੁਸਲਮਾਨ ਖਾਵੇਗਾ। ਜੇਕਰ ਕਿਸਾਨ ਵੰਡਣ ਵੇਲੇ ਵਿਤਕਰਾ ਨਹੀਂ ਕਰਦਾ ਤਾਂ ਸਰਕਾਰ ਕਿਉਂ ਵਿਤਕਰਾ ਕਰ ਰਹੀ ਹੈ।
Maulana Usman Ludhianvi
ਉਹਨਾਂ ਕਿਹਾ ਕਿ ਉਹ ਸਰਕਾਰ ਨੂੰ ਇਹੀ ਦੱਸਣ ਮੋਰਚੇ ਵਿਚ ਪਹੁੰਚੇ ਹਨ ਕਿ ਕਿਸਾਨ ਅੰਦੋਲਨ ਕਿਸੇ ਇਕ ਦਾ ਨਹੀਂ। ਕਿਸਾਨ ਅੰਦੋਲਨ ਮਿੱਟੀ ਦਾ ਅੰਦੋਲਨ ਹੈ ਤੇ ਮਿੱਟੀ ਕਦੀ ਨਹੀਂ ਹਾਰਦੀ। ਮੌਲਾਨਾ ਉਸਮਾਨ ਰਹਿਮਾਨੀ ਨੇ ਕਿਹਾ ਜਦੋਂ ਮੁਸਲਿਮ ਕਹਿਦੇ ਹਨ ਕਿ ਸਰਕਾਰ ਗਲਤ ਕਰ ਰਹੀ ਹੈ ਤਾਂ ਉਸ ਨੂੰ ਪਾਕਿਸਤਾਨੀ ਕਿਹਾ ਜਾਂਦਾ ਹੈ। ਜੇਕਰ ਸਿੱਖ ਅਜਿਹਾ ਕਰੇ ਤਾਂ ਉਸ ਨੂੰ ਖਾਲਿਸਤਾਨੀ ਕਿਹਾ ਜਾਂਦਾ ਹੈ।
Maulana Usman Ludhianvi
ਇਸ ਨਾਲ ਸਰਕਾਰ ਅਪਣੇ ਹੀ ਦੇਸ਼ ਦੀ ਜਨਤਾ ਨੂੰ ਬਦਨਾਮ ਕਰ ਰਹੀ ਹੈ। ਪੁਲਿਸ ਵੱਲੋਂ ਦਿੱਲੀ ਬਾਰਡਰ ‘ਤੇ ਕੀਤੀ ਗਈ ਬੈਰੀਕੇਡਿੰਗ ਬਾਰੇ ਬੋਲਦਿਆਂ ਉਹਨਾਂ ਕਿਹਾ ਕਿ ਕਿਸਾਨ ਦਾ ਕੰਮ ਕਿਰਤ ਕਰਨਾ ਹੈ। ਕਿਸਾਨ ਫੁੱਲ ਉਗਾਉਂਦਾ ਹੈ ਅਤੇ ਪੁਲਿਸ ਦਾ ਕੰਮ ਕੰਢੇ ਉਗਾਉਣਾ ਹੈ।
