ਪੁਲਿਸ ਨੇ ਦਸਿਆ ਕਿ ਨੌਜੁਆਨ ਅਸਾਮ ਦੇ ਧੁਬਰੀ ਜ਼ਿਲ੍ਹੇ ਦਾ ਰਹਿਣ ਵਾਲਾ ਹੈ।
ਮਲਾਪੁਰਮ (ਕੇਰਲ : ਉੱਤਰੀ ਕੇਰਲ ਦੇ ਕੁਟੀਪੁਰਮ ’ਚ ਅਸਾਮ ਦਾ ਇਕ ਨੌਜੁਆਨ ਕਈ ਦਿਨਾਂ ਤਕ ਭੁੱਖੇ ਰਹਿਣ ਤੋਂ ਬਾਅਦ ਬਿੱਲੀ ਦਾ ਕੱਚਾ ਮਾਸ ਖਾਂਦਾ ਪਾਇਆ ਗਿਆ। ਇਹ ਘਟਨਾ ਸਨਿਚਰਵਾਰ ਸ਼ਾਮ ਨੂੰ ਇੱਥੇ ਭੀੜ-ਭੜੱਕੇ ਵਾਲੇ ਬੱਸ ਸਟੈਂਡ ਕੰਪਲੈਕਸ ਦੀ ਹੈ। ਪੁਲਿਸ ਨੇ ਦਸਿਆ ਕਿ ਨੌਜੁਆਨ ਅਸਾਮ ਦੇ ਧੁਬਰੀ ਜ਼ਿਲ੍ਹੇ ਦਾ ਰਹਿਣ ਵਾਲਾ ਹੈ।
ਇਕ ਸੀਨੀਅਰ ਪੁਲਿਸ ਅਧਿਕਾਰੀ ਨੇ ਦਸਿਆ ਕਿ ਉਸ ਨੂੰ ਸੱਭ ਤੋਂ ਪਹਿਲਾਂ ਸਥਾਨਕ ਲੋਕਾਂ ਨੇ ਵੇਖਿਆ ਅਤੇ ਉਸ ਨੂੰ ਬੱਸ ਸਟੈਂਡ ਦੀਆਂ ਪੌੜੀਆਂ ’ਤੇ ਇਕ ਮਰੀ ਹੋਈ ਬਿੱਲੀ ਦਾ ਕੱਚਾ ਮਾਸ ਖਾਂਦੇ ਵੇਖਿਆ। ਉਨ੍ਹਾਂ ਕਿਹਾ, ‘‘ਸੂਚਨਾ ਮਿਲਣ ’ਤੇ ਅਸੀਂ ਮੌਕੇ ’ਤੇ ਪਹੁੰਚੇ। ਪੁੱਛ-ਪੜਤਾਲ ਕਰਨ ’ਤੇ ਉਸ ਨੇ ਦਸਿਆ ਕਿ ਉਸ ਨੇ ਪਿਛਲੇ ਪੰਜ ਦਿਨਾਂ ਤੋਂ ਕੁੱਝ ਨਹੀਂ ਖਾਧਾ ਸੀ।’’
ਉਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਨੇ ਉਸ ਲਈ ਭੋਜਨ ਖਰੀਦਿਆ ਅਤੇ ਉਸ ਨੇ ਖਾ ਲਿਆ। ਪਰ ਕੁੱਝ ਸਮੇਂ ਬਾਅਦ ਉਹ ਬਿਨਾਂ ਕਿਸੇ ਨੂੰ ਦੱਸੇ ਉੱਥੋਂ ਗਾਇਬ ਹੋ ਗਿਆ। ਉਨ੍ਹਾਂ ਕਿਹਾ, ‘‘ਸਾਨੂੰ ਅੱਜ ਸਵੇਰੇ ਸੂਚਨਾ ਮਿਲੀ ਕਿ ਨੌਜੁਆਨ ਰੇਲਵੇ ਸਟੇਸ਼ਨ ’ਤੇ ਮਿਲਿਆ ਹੈ। ਅਸੀਂ ਉਸ ਥਾਂ ’ਤੇ ਪਹੁੰਚੇ ਅਤੇ ਉਸ ਤੋਂ ਪੁੱਛ-ਪੜਤਾਲ ਕੀਤੀ ਅਤੇ ਇਹ ਜਾਣਨ ਦੀ ਕੋਸ਼ਿਸ਼ ਕੀਤੀ ਕਿ ਉਹ ਕਿੱਥੋਂ ਆਇਆ ਹੈ।’’
ਉਸ ਦੇ ਬਿਆਨਾਂ ਅਨੁਸਾਰ, ਉਹ ਉੱਤਰ-ਪੂਰਬੀ ਸੂਬੇ ’ਚ ਇਕ ਕਾਲਜ ਦਾ ਵਿਦਿਆਰਥੀ ਹੈ ਅਤੇ ਅਪਣੇ ਪਰਵਾਰ ਨੂੰ ਦੱਸੇ ਬਗੈਰ ਦਸੰਬਰ ’ਚ ਰੇਲ ਗੱਡੀ ਰਾਹੀਂ ਕੇਰਲ ਆਇਆ ਸੀ। ਅਧਿਕਾਰੀ ਨੇ ਕਿਹਾ, ‘‘ਉਸ ਨੇ ਸਾਨੂੰ ਅਪਣੇ ਭਰਾ ਦਾ ਮੋਬਾਈਲ ਨੰਬਰ ਦਿਤਾ ਜੋ ਚੇਨਈ ’ਚ ਕੰਮ ਕਰਦਾ ਹੈ। ਅਸੀਂ ਉਸ ਨਾਲ ਸੰਪਰਕ ਕੀਤਾ ਅਤੇ ਜਾਣਕਾਰੀ ਸਹੀ ਪਾਈ ਗਈ।’’
ਮੁੱਢਲੀ ਡਾਕਟਰੀ ਜਾਂਚ ਤੋਂ ਬਾਅਦ ਨੌਜੁਆਨ ਨੂੰ ਤ੍ਰਿਸੂਰ ਦੇ ਇਕ ਹਸਪਤਾਲ ’ਚ ਦਾਖਲ ਕਰਵਾਇਆ ਗਿਆ। ਪੁਲਿਸ ਨੇ ਦਸਿਆ ਕਿ ਨੌਜੁਆਨ ਨੂੰ ਕੋਈ ਸਰੀਰਕ ਜਾਂ ਮਾਨਸਿਕ ਸਮੱਸਿਆ ਨਹੀਂ ਹੈ ਅਤੇ ਜਦੋਂ ਉਹ ਪਹੁੰਚਣਗੇ ਤਾਂ ਉਨ੍ਹਾਂ ਨੂੰ ਉਨ੍ਹਾਂ ਦੇ ਪਰਵਾਰਕ ਮੈਂਬਰਾਂ ਦੇ ਹਵਾਲੇ ਕਰ ਦਿਤਾ ਜਾਵੇਗਾ।
