image
ਤਾਮਿਲਨਾਡੂ ਵਿਚ ਪਟਾਕਾ ਫ਼ੈਕਟਰੀ 'ਚ ਹੋਏ ਧਮਾਕੇ ਕਾਰਨ 9 ਔਰਤਾਂ ਦੀ ਮੌਤ
ਕੁੱਡਾਲੋਰ, 4 ਸਤੰਬਰ : ਤਾਮਿਲਨਾਡੂ 'ਚ ਕੁੱਡਾਲੋਰ ਜ਼ਿਲ੍ਹੇ ਦੇ ਕਾਰੂਮਬੁੜੀ 'ਚ ਸ਼ੁਕਰਵਾਰ ਨੂੰ ਇਕ ਪਟਾਕਾ ਫ਼ੈਕਟਰੀ 'ਚ ਧਮਾਕਾ ਹੋ ਗਿਆ। ਇਸ ਹਾਦਸੇ 'ਚ 9 ਔਰਤਾਂ ਦੀ ਮੌਤ ਹੋ ਗਈ, ਜਦੋਂ ਕਿ 6 ਹੋਰ ਗੰਭੀਰ ਰੂਪ ਨਾਲ ਝੁਲਸ ਗਏ।
image
ਸੂਤਰਾਂ ਅਨੁਸਾਰ ਫ਼ੈਕਟਰੀ ਦੀ ਮਾਲਕਿਨ ਗੰਧੀਮਤੀ ਅਤੇ ਉਸ ਦੀ ਧੀ ਅਤੇ 13 ਹੋਰ ਲੋਕ ਦੀਵਾਲੀ ਤਿਉਹਾਰ ਲਈ ਪਟਾਕਾ ਫ਼ੈਕਟਰੀ ਦਾ ਕੰਮ ਸ਼ੁਰੂ ਕਰਨ ਗਏ ਸਨ। ਇਸ ਤੋਂ ਪਹਿਲਾਂ ਉਹ ਸਾਰੇ ਪੂਜਾ ਕਰਨ ਬੈਠੇ ਸਨ।
ਇਸੇ ਦੌਰਾਨ ਉੱਥੇ ਪਿਛਲੇ ਸਾਲ ਬਣੇ ਪਟਾਕਿਆਂ ਦੇ ਭੰਡਾਰ 'ਚ ਅਚਾਨਕ ਅੱਗ ਲੱਗ ਗਈ, ਜਿਸ ਨਾਲ ਉੱਥੇ ਭਿਆਨਕ ਧਮਾਕਾ ਹੋ ਗਿਆ। ਧਮਾਕੇ ਨਾਲ ਗੰਧੀਮਤੀ ਅਤੇ 4 ਹੋਰ ਦੀ ਮੌਕੇ 'ਤੇ ਮੌਤ ਹੋ ਗਈ। ਮੌਕੇ 'ਤੇ ਪਹੁੰਚੇ ਪੁਲਿਸ ਅਤੇ ਅੱਗ ਬੁਝਾਊ ਦਲ ਨੇ ਹੋਰ ਲੋਕਾਂ ਨੂੰ ਬਚਾਇਆ ਅਤੇ ਚਿਦਾਂਬਰਮ ਸਰਕਾਰੀ ਹਸਪਤਾਲ 'ਚ ਦਾਖ਼ਲ ਕਰਵਾਇਆ, ਜਿਥੇ 4 ਹੋਰ ਔਰਤਾਂ ਦੀ ਮੌਤ ਹੋ ਗਈ। ਬਾਕੀ ਜ਼ਖਮੀਆਂ ਦਾ ਇਲਾਜ ਚੱਲ ਰਿਹਾ ਹੈ।
ਪੁਲਿਸ ਨੇ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਜ਼ਰੂਰੀ ਜਾਂਚ ਕਰ ਰਹੀ ਹੈ। (ਪੀਟੀਆਈ)
