ਪਿਛਲੇ ਸਾਲ ਵੀ ਫੌਜੀਆਂ ਨਾਲ ਮਨਾਈ ਸੀ ਦੀਵਾਲੀ
ਨਵੀਂ ਦਿੱਲੀ: ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੌਸ਼ਹਿਰਾ, ਰਾਜੋਰੀ ਵਿੱਚ ਐਲਓਸੀ ਦੀਆਂ ਅਗਲੀਆਂ ਚੌਕੀਆਂ 'ਤੇ ਸੈਨਿਕਾਂ ਨਾਲ ਦੀਵਾਲੀ ਮਨਾਉਣਗੇ। ਸਾਲ 2019 ਵਿੱਚ ਵੀ ਪ੍ਰਧਾਨ ਮੰਤਰੀ ਨੇ ਰਾਜੋਰੀ ਵਿੱਚ ਹੀ ਫਾਰਵਰਡ ਖੇਤਰ ਵਿੱਚ ਦੀਵਾਲੀ ਮਨਾ ਕੇ ਸੈਨਿਕਾਂ ਦਾ ਮਨੋਬਲ ਵਧਾਇਆ ਸੀ।
ਪ੍ਰਧਾਨ ਮੰਤਰੀ ਦਾ ਵੀਰਵਾਰ ਨੂੰ ਐਲਓਸੀ ਦੇ ਨੌਸ਼ਹਿਰਾ ਸੈਕਟਰ ਦਾ ਦੌਰਾ ਪ੍ਰਸਤਾਵਿਤ ਹੈ। ਇਸ ਦੀਆਂ ਤਿਆਰੀਆਂ ਮੁਕੰਮਲ ਕਰ ਲਈਆਂ ਗਈਆਂ ਹਨ। ਰਾਜੋਰੀ-ਪੁੰਛ ਸਰਹੱਦੀ ਖੇਤਰ 'ਚ ਅੱਤਵਾਦੀਆਂ ਵਿਰੁੱਧ ਤਿੰਨ ਹਫ਼ਤਿਆਂ ਤੋਂ ਚੱਲੇ ਆਪ੍ਰੇਸ਼ਨ ਦੌਰਾਨ ਪ੍ਰਧਾਨ ਮੰਤਰੀ ਦੇ ਦੌਰੇ ਕਾਰਨ ਸੁਰੱਖਿਆ ਏਜੰਸੀਆਂ ਨੂੰ ਹਾਈ ਅਲਰਟ 'ਤੇ ਰੱਖਿਆ ਗਿਆ ਹੈ।
ਸੂਤਰਾਂ ਮੁਤਾਬਕ ਪ੍ਰਧਾਨ ਮੰਤਰੀ ਸਵੇਰੇ 11 ਵਜੇ ਤੱਕ ਨੌਸ਼ਹਿਰਾ ਪੁੱਜਣ ਵਾਲੇ ਹਨ। ਸਭ ਤੋਂ ਪਹਿਲਾਂ ਉਹ ਜੰਮੂ ਏਅਰਪੋਰਟ ਆਉਣਗੇ, ਜਿੱਥੋਂ ਉਹ ਨੌਸ਼ਹਿਰਾ ਲਈ ਰਵਾਨਾ ਹੋਣਗੇ। ਪੀਐਮ ਮੋਦੀ ਰਾਜੋਰੀ ਵਿੱਚ ਤਿੰਨ ਤੋਂ ਚਾਰ ਘੰਟੇ ਰੁਕ ਸਕਦੇ ਹਨ।
ਇਸ ਦੌਰਾਨ ਉਹ ਸੈਨਿਕਾਂ ਨਾਲ ਦੀਵਾਲੀ ਮਨਾਉਣ ਤੋਂ ਬਾਅਦ ਫੌਜ ਦੇ ਸੀਨੀਅਰ ਅਧਿਕਾਰੀਆਂ ਨਾਲ ਰਾਜੋਰੀ ਅਤੇ ਨੌਸ਼ਹਿਰਾ ਸੈਕਟਰਾਂ ਵਿੱਚ ਫੌਜੀ ਤਿਆਰੀਆਂ ਦਾ ਜਾਇਜ਼ਾ ਵੀ ਲੈਣਗੇ। ਸੁਰੱਖਿਆ ਨੂੰ ਲੈ ਕੇ ਮੀਟਿੰਗ ਦੀ ਵੀ ਤਜਵੀਜ਼ ਹੈ। ਚੀਫ ਆਫ ਡਿਫੈਂਸ ਸਟਾਫ ਜਨਰਲ ਬਿਪਿਤ ਰਾਵਤ ਵੀ ਪ੍ਰਧਾਨ ਮੰਤਰੀ ਦੇ ਨਾਲ ਜਾ ਸਕਦੇ ਹਨ।