Colombo News : ਭਾਰਤ ਦੀ ਸਹਾਇਤਾ ਨਾਲ ਬਣਨਗੇ ਦੋਵੇਂ ਪ੍ਰਾਜੈਕਟ, ਸ੍ਰੀਲੰਕਾ ਦੇ ਅਨੁਰਾਧਾਪੁਰਾ ’ਚ ਬੋਧੀ ਮੰਦਰ ਦੇ ਦਰਸ਼ਨ ਵੀ ਕੀਤੇ
Colombo News in Punjabi : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਐਤਵਾਰ ਨੂੰ ਉੱਤਰ-ਮੱਧ ਸ੍ਰੀਲੰਕਾ ਦੇ ਇਤਿਹਾਸਕ ਸ਼ਹਿਰ ਅਨੁਰਾਧਾਪੁਰਾ ਦਾ ਦੌਰਾ ਕੀਤਾ ਅਤੇ ਭਾਰਤ ਦੀ ਸਹਾਇਤਾ ਨਾਲ ਦੋ ਰੇਲਵੇ ਪ੍ਰਾਜੈਕਟਾਂ ਦੀ ਸ਼ੁਰੂਆਤ ਕੀਤੀ।
ਮੋਦੀ ਨੇ ਸ਼੍ਰੀਲੰਕਾ ਦੇ ਰਾਸ਼ਟਰਪਤੀ ਅਨੁਰਾ ਕੁਮਾਰ ਦਿਸਾਨਾਇਕੇ ਨਾਲ ਜਯਾ ਸ਼੍ਰੀ ਮਹਾ ਬੋਧੀ ਮੰਦਰ ਦਾ ਦੌਰਾ ਕੀਤਾ ਅਤੇ ਕੋਲੰਬੋ ਤੋਂ ਕਰੀਬ 200 ਕਿਲੋਮੀਟਰ ਦੀ ਦੂਰੀ ’ਤੇ ਸਥਿਤ ਅਧਿਆਤਮਕ ਸ਼ਹਿਰ ਅਨੁਰਾਧਾਪੁਰਾ ’ਚ ਪੂਜਨੀਕ ਬੋਧੀ ਮੰਦਰ ’ਚ ਸ਼ਰਧਾਂਜਲੀ ਦਿਤੀ।
ਮੰਦਰ ਦੇ ਦੌਰੇ ਤੋਂ ਬਾਅਦ ਦੋਹਾਂ ਨੇਤਾਵਾਂ ਨੇ 9.127 ਕਰੋੜ ਡਾਲਰ ਦੀ ਭਾਰਤੀ ਸਹਾਇਤਾ ਨਾਲ ਨਵੀਨੀਕਰਨ ਕੀਤੀ ਗਈ 128 ਕਿਲੋਮੀਟਰ ਲੰਬੀ ਮਾਹੋ-ਓਮਾਨਥਾਈ ਰੇਲਵੇ ਲਾਈਨ ਦਾ ਉਦਘਾਟਨ ਕੀਤਾ ਅਤੇ ਇਸ ਤੋਂ ਬਾਅਦ ਮਾਹੋ ਤੋਂ ਅਨੁਰਾਧਾਪੁਰਾ ਤਕ ਇਕ ਉੱਨਤ ਸਿਗਨਲਿੰਗ ਪ੍ਰਣਾਲੀ ਦੇ ਨਿਰਮਾਣ ਦੀ ਸ਼ੁਰੂਆਤ ਕੀਤੀ। ਸਿਗਨਲਿੰਗ ਪ੍ਰਣਾਲੀ 14.89 ਮਿਲੀਅਨ ਡਾਲਰ ਦੀ ਭਾਰਤੀ ਗ੍ਰਾਂਟ ਸਹਾਇਤਾ ਨਾਲ ਬਣਾਈ ਗਈ ਹੈ।
ਵਿਦੇਸ਼ ਮੰਤਰਾਲੇ ਨੇ ਕਿਹਾ ਕਿ ਭਾਰਤ-ਸ਼੍ਰੀਲੰਕਾ ਵਿਕਾਸ ਭਾਈਵਾਲੀ ਤਹਿਤ ਲਾਗੂ ਕੀਤੇ ਗਏ ਇਹ ਇਤਿਹਾਸਕ ਰੇਲਵੇ ਆਧੁਨਿਕੀਕਰਨ ਪ੍ਰਾਜੈਕਟ ਸ਼੍ਰੀਲੰਕਾ ਵਿਚ ਉੱਤਰ-ਦਖਣੀ ਰੇਲ ਸੰਪਰਕ ਨੂੰ ਮਜ਼ਬੂਤ ਕਰਨ ਵਿਚ ਇਕ ਮਹੱਤਵਪੂਰਨ ਮੀਲ ਪੱਥਰ ਹਨ। ਇਹ ਦੇਸ਼ ਭਰ ’ਚ ਮੁਸਾਫ਼ਰਾਂ ਅਤੇ ਮਾਲ ਆਵਾਜਾਈ, ਦੋਹਾਂ ਦੀ ਤੇਜ਼ ਅਤੇ ਕੁਸ਼ਲ ਆਵਾਜਾਈ ਦੀ ਸਹੂਲਤ ਪ੍ਰਦਾਨ ਕਰਨਗੇ।
ਭਾਰਤ ਰਵਾਨਾ ਹੋਣ ਤੋਂ ਪਹਿਲਾਂ ਮੋਦੀ ਨੇ ਕਿਹਾ ਕਿ ਉਨ੍ਹਾਂ ਦੀ ਸ਼੍ਰੀਲੰਕਾ ਯਾਤਰਾ ਨੇ ਦੋਹਾਂ ਦੇਸ਼ਾਂ ਦਰਮਿਆਨ ਡੂੰਘੇ ਸਭਿਆਚਾਰਕ, ਅਧਿਆਤਮਕ ਅਤੇ ਸੱਭਿਅਤਾ ਸੰਬੰਧਾਂ ਦੀ ਪੁਸ਼ਟੀ ਕੀਤੀ ਹੈ। ਮੋਦੀ ਨੇ ਸੋਸ਼ਲ ਮੀਡੀਆ ’ਤੇ ਇਕ ਪੋਸਟ ’ਚ ਕਿਹਾ, ‘‘ਮੇਰੀ ਯਾਤਰਾ ਦੌਰਾਨ ਦਿਤੇ ਸਨਮਾਨ ਲਈ ਰਾਸ਼ਟਰਪਤੀ ਦਿਸਾਨਾਇਕੇ, ਸ਼੍ਰੀਲੰਕਾ ਦੇ ਲੋਕਾਂ ਅਤੇ ਸਰਕਾਰ ਦਾ ਤਹਿ ਦਿਲੋਂ ਧੰਨਵਾਦ। ਚਾਹੇ ਉਹ ਕੋਲੰਬੋ ਹੋਵੇ ਜਾਂ ਅਨੁਰਾਧਾਪੁਰਾ, ਇਸ ਯਾਤਰਾ ਨੇ ਸਾਡੇ ਦੋਹਾਂ ਦੇਸ਼ਾਂ ਦਰਮਿਆਨ ਡੂੰਘੇ ਸਭਿਆਚਾਰਕ, ਅਧਿਆਤਮਕ ਅਤੇ ਸੱਭਿਅਤਾ ਸੰਬੰਧਾਂ ਦੀ ਪੁਸ਼ਟੀ ਕੀਤੀ ਹੈ। ਇਸ ਨਾਲ ਨਿਸ਼ਚਿਤ ਤੌਰ ’ਤੇ ਸਾਡੇ ਦੁਵਲੇ ਸਬੰਧਾਂ ਨੂੰ ਗਤੀ ਮਿਲੇਗੀ।’’ ਜੈ ਸ਼੍ਰੀ ਮਹਾ ਬੋਧੀ ਮੰਦਰ ’ਚ ਪ੍ਰਧਾਨ ਮੰਤਰੀ ਨੇ ਮੰਦਰ ਦੇ ਮੁੱਖ ਸਾਧੂ ਤੋਂ ਆਸ਼ੀਰਵਾਦ ਵੀ ਲਿਆ।
ਪ੍ਰਧਾਨ ਦਿਸਾਨਾਇਕੇ ਨਾਲ ਅਨੁਰਾਧਾਪੁਰਾ ’ਚ ਪਵਿੱਤਰ ਜੈ ਸ਼੍ਰੀ ਮਹਾ ਬੋਧੀ ਵਿਖੇ ਪ੍ਰਾਰਥਨਾ ਕੀਤੀ। ਮੋਦੀ ਨੇ ਸੋਸ਼ਲ ਮੀਡੀਆ ’ਤੇ ਇਕ ਪੋਸਟ ’ਚ ਕਿਹਾ ਕਿ ਬੁੱਧ ਧਰਮ ਦੇ ਸੱਭ ਤੋਂ ਸਤਿਕਾਰਯੋਗ ਸਥਾਨਾਂ ’ਚੋਂ ਇਕ ’ਤੇ ਪਹੁੰਚਣਾ ਬਹੁਤ ਹੀ ਨਿਮਰਤਾ ਭਰਿਆ ਪਲ ਹੈ। ਵਿਦੇਸ਼ ਮੰਤਰਾਲੇ ਨੇ ਕਿਹਾ ਕਿ ਮੋਦੀ ਨੇ ਮੰਦਰ ਵਿਚ ਪੂਜਨੀਕ ਮਹਾਬੋਧੀ ਰੁੱਖ ’ਤੇ ਪੂਜਾ ਕੀਤੀ।
ਜਯਾ ਸ਼੍ਰੀ ਮਹਾ ਬੋਧੀ ਮੰਦਰ ਭਾਰਤ-ਸ਼੍ਰੀਲੰਕਾ ਸਭਿਅਤਾ ਸੰਬੰਧਾਂ ’ਚ ਵਿਸ਼ੇਸ਼ ਮਹੱਤਵ ਰੱਖਦਾ ਹੈ। ਇਹ ਮੰਨਿਆ ਜਾਂਦਾ ਹੈ ਕਿ ਮੰਦਰ ’ਚ ਪਵਿੱਤਰ ਬੋਧੀ ਰੁੱਖ ਦੀ ਉਤਪਤੀ ਭਾਰਤ ਦੇ ਬੋਧਗਯਾ ’ਚ ਹੋਈ ਹੈ। ਬੋਧੀ ਰੁੱਖ ਦਾ ਬੂਟਾ ਭਾਰਤ ਤੋਂ ਸਮਰਾਟ ਅਸ਼ੋਕ ਦੀ ਧੀ ਥੇਰੀ ਸੰਘਮਿੱਤਾ ਵਲੋਂ ਲਿਆਂਦਾ ਗਿਆ ਸੀ ਅਤੇ ਮੰਦਰ ਦੇ ਖੇਤਰ ’ਚ ਲਗਾਇਆ ਗਿਆ ਸੀ। ਇਹ ਮੰਦਰ ਭਾਰਤ-ਸ਼੍ਰੀਲੰਕਾ ਦੀ ਨਜ਼ਦੀਕੀ ਭਾਈਵਾਲੀ ਦੀ ਨੀਂਹ ਰੱਖਣ ਵਾਲੇ ਮਜ਼ਬੂਤ ਸੱਭਿਅਤਾ ਸੰਬੰਧਾਂ ਦਾ ਸਬੂਤ ਹੈ।
ਪ੍ਰਧਾਨ ਮੰਤਰੀ ਥਾਈਲੈਂਡ ਦੀ ਅਪਣੀ ਯਾਤਰਾ ਸਮਾਪਤ ਕਰਨ ਤੋਂ ਬਾਅਦ ਸ਼ੁਕਰਵਾਰ ਸ਼ਾਮ ਨੂੰ ਕੋਲੰਬੋ ਪਹੁੰਚੇ ਸਨ।
ਸਨਿਚਰਵਾਰ ਨੂੰ ਮੋਦੀ ਅਤੇ ਦਿਸਾਨਾਇਕੇ ਨੇ ਵਿਆਪਕ ਗੱਲਬਾਤ ਕੀਤੀ, ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਰੱਖਿਆ, ਊਰਜਾ ਅਤੇ ਡਿਜੀਟਲਾਈਜ਼ੇਸ਼ਨ ਵਰਗੇ ਕਈ ਖੇਤਰਾਂ ’ਚ ਸਬੰਧਾਂ ਨੂੰ ਵਧਾਉਣ ਲਈ ਸੱਤ ਸਮਝੌਤਿਆਂ ਸਮੇਤ 10 ਤੋਂ ਵੱਧ ਵਿਸ਼ੇਸ਼ ਨਤੀਜਿਆਂ ਦਾ ਪ੍ਰਗਟਾਵਾ ਕੀਤਾ ਸੀ।
(For more news apart from PM Modi launches two railway projects in Sri Lanka News in Punjabi, stay tuned to Rozana Spokesman)
