ਬੱਚਿਆਂ ਨੂੰ ਵਰਚੁਅਲ ਟੱਚ ਦੀ ਉੱਭਰ ਰਹੀ ਧਾਰਨਾ ਅਤੇ ਇਸ ਦੇ ਸੰਭਾਵਿਤ ਖਤਰਿਆਂ ਬਾਰੇ ਸਿੱਖਿਅਤ ਕਰਨ ਦੀ ਜ਼ਰੂਰਤ ਹੈ।
Court News: ਦਿੱਲੀ ਹਾਈ ਕੋਰਟ ਨੇ ਕਿਹਾ ਹੈ ਕਿ ਅੱਜ ਦੀ ਵਰਚੁਅਲ ਦੁਨੀਆ 'ਚ ਨਾਬਾਲਗਾਂ ਨੂੰ ‘ਚੰਗੀ ਛੋਹ’ ਅਤੇ ‘ਮਾੜੀ ਛੋਹ' ਦੇ ਸੰਕਲਪ ਬਾਰੇ ਜਾਗਰੂਕ ਕਰਨਾ ਕਾਫੀ ਨਹੀਂ ਹੈ, ਸਗੋਂ ਬੱਚਿਆਂ ਨੂੰ ਵਰਚੁਅਲ ਟੱਚ ਦੀ ਉੱਭਰ ਰਹੀ ਧਾਰਨਾ ਅਤੇ ਇਸ ਦੇ ਸੰਭਾਵਿਤ ਖਤਰਿਆਂ ਬਾਰੇ ਸਿੱਖਿਅਤ ਕਰਨ ਦੀ ਜ਼ਰੂਰਤ ਹੈ। ਅਦਾਲਤ ਨੇ ਕਿਹਾ ਕਿ ਇਸ ਵਿਚ ਉਨ੍ਹਾਂ ਨੂੰ ਉਚਿਤ ਆਨਲਾਈਨ ਵਿਵਹਾਰ ਸਿਖਾਉਣਾ, ਹਿੰਸਕ ਵਿਵਹਾਰ ਦੇ ਸੰਕੇਤਾਂ ਨੂੰ ਪਛਾਣਨਾ ਅਤੇ ਨਿੱਜਤਾ ਸੈਟਿੰਗਾਂ ਅਤੇ ਆਨਲਾਈਨ ਸੀਮਾਵਾਂ ਦੀ ਮਹੱਤਤਾ ਨੂੰ ਸਮਝਾਉਣਾ ਸ਼ਾਮਲ ਹੈ।
ਜਸਟਿਸ ਸਵਰਨ ਕਾਂਤਾ ਸ਼ਰਮਾ ਨੇ ਕਿਹਾ, "ਇਹ ਅਦਾਲਤ ਇਸ ਗੱਲ 'ਤੇ ਜ਼ੋਰ ਦਿੰਦੀ ਹੈ ਕਿ ਅੱਜ ਦੇ ਵਰਚੁਅਲ ਆਧੁਨਿਕ ਸੰਸਾਰ ਵਿਚ ਜਿਥੇ ਵਰਚੁਅਲ ਸਪੇਸ ਵੀ ਕਿਸ਼ੋਰਾਂ ਵਿਚ ਕਥਿਤ ਵਰਚੁਅਲ ਪਿਆਰ ਲਈ ਪਲੇਟਫਾਰਮ ਬਣ ਗਏ ਹਨ, ਉਹ ਵੇਸਵਾਗਮਨੀ ਅਤੇ ਅਪਰਾਧਾਂ ਲਈ ਮਨੁੱਖੀ ਤਸਕਰੀ ਦੇ ਦੂਜੇ ਪੱਖ ਦੁਆਰਾ ਪੈਦਾ ਕੀਤੇ ਸੰਭਾਵਿਤ ਖਤਰਿਆਂ ਨਾਲ ਨਜਿੱਠਣ ਲਈ ਤਿਆਰ ਨਹੀਂ ਹਨ।”
ਹਾਈ ਕੋਰਟ ਨੇ ਕਮਲੇਸ਼ ਦੇਵੀ ਨਾਂ ਦੀ ਔਰਤ ਦੀ ਜ਼ਮਾਨਤ ਪਟੀਸ਼ਨ ਖਾਰਜ ਕਰਦੇ ਹੋਏ ਇਹ ਟਿੱਪਣੀਆਂ ਕੀਤੀਆਂ। ਔਰਤ 'ਤੇ ਅਪਣੇ ਬੇਟੇ ਦੀ ਮਦਦ ਕਰਨ ਦਾ ਦੋਸ਼ ਹੈ, ਜਿਸ 'ਤੇ ਇਕ ਨਾਬਾਲਗ ਲੜਕੀ ਨੂੰ ਅਗਵਾ ਕਰਨ ਅਤੇ ਉਸ ਨੂੰ ਵੇਸਵਾਗਮਨੀ (ਗਲਤ ਧੰਦਾ ਕਰਨ) ਲਈ ਮਜਬੂਰ ਕਰਨ ਤੋਂ ਬਾਅਦ ਉਸ ਦਾ ਜਿਨਸੀ ਸ਼ੋਸ਼ਣ ਕਰਨ ਦਾ ਦੋਸ਼ ਹੈ।
ਇਲਜ਼ਾਮ ਹਨ ਕਿ ਰਾਜੀਵ ਨਾਂ ਦੇ ਵਿਅਕਤੀ ਨੇ ਸੋਸ਼ਲ ਮੀਡੀਆ ਰਾਹੀਂ 16 ਸਾਲਾ ਲੜਕੀ ਨਾਲ ਦੋਸਤੀ ਕੀਤੀ ਅਤੇ ਜਦੋਂ ਉਹ ਉਸ ਨੂੰ ਮਿਲਣ ਗਈ ਤਾਂ ਉਸ ਨੂੰ ਅਗਵਾ ਕਰ ਲਿਆ। ਲੜਕੀ ਨੂੰ ਮੱਧ ਪ੍ਰਦੇਸ਼ ਲਿਜਾਇਆ ਗਿਆ ਅਤੇ ਕਈ ਦਿਨਾਂ ਤਕ ਉਥੇ ਰੱਖਿਆ ਗਿਆ। ਇਸ ਤੋਂ ਬਾਅਦ, ਵਿਅਕਤੀ ਅਤੇ ਹੋਰਾਂ ਨੇ ਕਥਿਤ ਤੌਰ 'ਤੇ ਉਸ ਦਾ ਜਿਨਸੀ ਸ਼ੋਸ਼ਣ ਕੀਤਾ।
ਇਹ ਵੀ ਇਲਜ਼ਾਮ ਹਨ ਕਿ ਲੜਕੀ ਨੂੰ ਪੈਸੇ ਦੇ ਬਦਲੇ 45 ਸਾਲਾ ਵਿਅਕਤੀ ਨਾਲ ਵਿਆਹ ਕਰਨ ਲਈ ਮਜਬੂਰ ਕੀਤਾ ਗਿਆ ਸੀ। ਕਿਸ਼ੋਰ ਨੇ ਦੋਸ਼ ਲਾਇਆ ਕਿ ਦੋਸ਼ੀ ਵਿਅਕਤੀ ਵੱਖ-ਵੱਖ ਆਦਮੀਆਂ ਨੂੰ ਇਮਾਰਤ ਵਿਚ ਲਿਆਉਂਦਾ ਸੀ ਜਿਥੇ ਉਸ ਨੂੰ ਕੈਦ ਕੀਤਾ ਜਾਂਦਾ ਸੀ ਅਤੇ ਜਿਨਸੀ ਸੰਤੁਸ਼ਟੀ ਲਈ ਇਨ੍ਹਾਂ ਆਦਮੀਆਂ ਦੇ ਸਾਹਮਣੇ ਪੇਸ਼ ਹੋਣ ਲਈ ਮਜਬੂਰ ਕੀਤਾ ਜਾਂਦਾ ਸੀ।
ਅਦਾਲਤ ਨੇ ਕਿਹਾ, "ਰਵਾਇਤੀ ਤੌਰ 'ਤੇ, ਨਾਬਾਲਗਾਂ ਨੂੰ ਨੁਕਸਾਨ ਤੋਂ ਬਚਾਉਣ ਲਈ ਸਰੀਰਕ ‘ਚੰਗੀ ਛੋਹ’ ਅਤੇ ‘ਮਾੜੀ ਛੋਹ’ ਬਾਰੇ ਸਿਖਾਉਣ 'ਤੇ ਧਿਆਨ ਕੇਂਦਰਿਤ ਕੀਤਾ ਜਾਂਦਾ ਹੈ। ਹਾਲਾਂਕਿ, ਅੱਜ ਦੇ ਵਰਚੁਅਲ ਸੰਸਾਰ ਵਿਚ, 'ਵਰਚੁਅਲ ਟੱਚ' ਦੇ ਸੰਕਲਪ ਨੂੰ ਸ਼ਾਮਲ ਕਰਕੇ ਇਸ ਸਿਖਲਾਈ ਨੂੰ ਵਧਾਉਣਾ ਮਹੱਤਵਪੂਰਨ ਹੈ। ਨਾਬਾਲਗਾਂ ਨੂੰ ਆਨਲਾਈਨ ਗੱਲਬਾਤ ਕਰਨ ਅਤੇ ਸਾਈਬਰ ਸਪੇਸ ਵਿਚ ਲੁਕੇ ਸੰਭਾਵਿਤ ਜੋਖਮਾਂ ਦੀ ਪਛਾਣ ਕਰਨ ਲਈ ਸੁਰੱਖਿਅਤ ਬਣਾਉਣ ਦੀ ਜ਼ਰੂਰਤ ਹੈ। ”
(For more Punjabi news apart from Teaching Minors Good Touch, Bad Touch Not Enough, Educate Them On Virtual Touch: Court, stay tuned to Rozana Spokesman)
