ਡ੍ਰੋਨ ਨਾਲ ਹੁੰਦੀ ਹੈ ਸਮੇਂ ਦੀ ਬੱਚਤ
ਨਵੀਂ ਦਿੱਲੀ: ਇਕ ਜਹਾਜ਼ ਜੋ ਕਿ ਮਨੁੱਖ ਤੋਂ ਬਿਨਾ ਚਲਦਾ ਹੈ (ਡ੍ਰੋਨ) ਦੇ ਜ਼ਰੀਏ ਸ਼ੁੱਕਰਵਾਰ ਨੂੰ ਟਿਹਰੀ ਜ਼ਿਲ੍ਹੇ ਦੇ ਇਕ ਸਥਾਨ ਤੋਂ ਦੂਜੇ ਸਥਾਨ ਤਕ 36 ਕਿਲੋਮੀਟਰ ਦੂਰ ਖ਼ੂਨ ਦੇ ਨਮੂਨੇ ਸਫ਼ਲਤਾਪੂਰਵਕ ਪਹੁੰਚਾਏ ਗਏ। ਇਸ ਕਾਮਯਾਬੀ ਨਾਲ ਗ੍ਰਾਮੀਣ ਇਲਾਕਿਆਂ ਵਿਚ ਸਿਹਤ ਸੇਵਾਵਾਂ ਦੀ ਉਪਲੱਬਧਤਾ ਵਿਚ ਕ੍ਰਾਂਤੀ ਆ ਸਕਦੀ ਹੈ। ਡ੍ਰੋਨ ਨਾਲ ਬਹੁਤ ਘਟ ਸਮੇਂ ਵਿਚ ਖ਼ੂਨ ਦੇ ਨਮੂਨੇ ਹਸਪਤਾਲ ਪਹੁੰਚਾਏ ਗਏ। ਇਹ ਸਮੇਂ ਦੀ ਬੱਚਤ ਵੀ ਕਰਦਾ ਹੈ।
Drone
ਜ਼ਿਲ੍ਹਾ ਹਸਪਤਾਲ ਦੇ ਚੀਫ਼ ਮੈਡਿਕਲ ਸੁਪਰਡੈਂਟ ਡਾ ਐਸਐਸ ਪਾਂਗਤੀ ਨੇ ਦਸਿਆ ਕਿ ਇਹ ਪ੍ਰਯੋਗ ਟਿਹਰੀ ਗੜ੍ਹਵਾਲ ਵਿਚ ਚਲ ਰਹੇ ਟੈਲੀ ਮੈਡੀਕਲ ਪ੍ਰੋਜੈਕਟ ਦਾ ਇਕ ਹਿੱਸਾ ਸੀ। ਡਾ ਪਾਂਗਤੀ ਨੇ ਕਿਹਾ ਕਿ ਡ੍ਰੋਨ ਨੇ ਨੰਦ ਪਿੰਡ ਪੀਐਚਸੀ ਤੋਂ ਬੁਰਾੜੀ ਹਸਪਤਾਲ ਤਕ ਦੀ 36 ਕਿਲੋਮੀਟਰ ਦੀ ਦੂਰੀ ਤਕਰੀਬਨ 18 ਮਿੰਟਾਂ ਵਿਚ ਪੂਰੀ ਕੀਤੀ ਜਦਕਿ ਸੜਕ ਦੇ ਜ਼ਰੀਏ ਇੱਥੇ ਪਹੁੰਚਣ ਵਿਚ 70 ਤੋਂ 100 ਮਿੰਟ ਲਗਦੇ ਹਨ।
Blood Sample
ਡ੍ਰੋਨ ਵਿਚ ਬਲੱਡ ਸੈਂਪਲ ਤੋਂ ਇਲਾਵਾ ਇਕ ਕੂਲਿੰਗ ਕਿਟ ਵੀ ਸੀ ਤਾਂਕਿ ਸੈਂਪਲ ਖ਼ਰਾਬ ਨਾ ਹੋ ਜਾਵੇ। ਇਸ ਡ੍ਰੋਨ ਨੂੰ ਸੀਡੀ ਸਪੇਸ ਰੋਬਾਟਿਕਸ ਲਿਮਿਟੇਡ ਨਾਮ ਦੀ ਫਾਰਮ ਨੇ ਬਣਾਇਆ ਸੀ ਜਿਸ ਦੇ ਮਾਲਕ ਨਿਖਿਲ ਉਪਾਧੇ ਹਨ ਜੋ ਆਈਆਈਟੀ ਕਾਨਪੁਰ ਦੇ ਵਿਦਿਆਰਥੀ ਰਹਿ ਚੁੱਕੇ ਹਨ। ਇਹ ਕੰਪਨੀ ਭਵਿੱਖ ਦੇ ਯਾਤਾਯਾਤ ਦੇ ਨਜ਼ਰੀਏ ਤੋਂ ਅਤਿ ਆਧੁਨਿਕ ਡ੍ਰੋਨ ਵਿਕਸਿਤ ਕਰ ਰਹੀ ਹੈ।
ਉਪਾਧੇ ਦਾ ਕਹਿਣਾ ਹੈ ਕਿ ਉਹਨਾਂ ਨੇ ਜੋ ਡ੍ਰੋਨ ਬਣਾਇਆ ਹੈ ਉਸ ਵਿਚ ਕੂਲਿੰਗ ਕਿਟ ਦੇ ਨਾਲ ਨਾਲ ਆਪਾਤਕਾਲੀਨ ਦਵਾਈਆਂ ਅਤੇ ਬਲੱਡ ਯੂਨਿਟ ਨੂੰ ਟ੍ਰਾਂਸਪੋਰਟ ਕਰਨ ਦੀ ਸਮਰੱਥਾ ਹੈ। ਕੁਲ ਮਿਲਾ ਕੇ ਇਹ 500 ਗ੍ਰਾਮ ਵਜਨ ਚੁੱਕਣ ਦੀ ਸਮਰੱਥਾ ਰੱਖਦਾ ਹੈ ਅਤੇ ਇਕ ਵਾਰ ਵਿਚ ਚਾਰਜ ਕਰਨ 'ਤੇ 50 ਕਿਲੋਮੀਟਰ ਤਕ ਦਾ ਸਫ਼ਰ ਕਰ ਸਕਦਾ ਹੈ।
ਉਪਾਧੇ ਨੇ ਦਸਿਆ ਕਿ ਇਕ ਡ੍ਰੋਨ ਨੂੰ ਬਣਾਉਣ ਵਿਚ ਲਗਭਗ 10 ਲੱਖ ਰੁਪਏ ਦਾ ਖ਼ਰਚ ਆਉਣ ਦਾ ਅਨੁਮਾਨ ਹੈ। ਉਹਨਾਂ ਨੇ ਜਾਣਕਾਰੀ ਦਿੱਤੀ ਹੈ ਕਿ ਆਉਣ ਵਾਲੇ ਹਫ਼ਤਿਆਂ ਵਿਚ ਆਪਾਤਕਾਲੀਨ ਦਵਾਈਆਂ ਨੂੰ ਇਸ ਤਰ੍ਹਾਂ ਭੇਜ ਕੇ ਟ੍ਰਾਇਲ ਰਨ ਕੀਤਾ ਜਾਵੇਗਾ।
