11 ਤੋਂ 13 ਅਕਤੂਬਰ ਤੱਕ ਆਂਧਰਾ ਪ੍ਰਦੇਸ਼ ਤੇ ਓਡੀਸ਼ਾ ਦੇ ਤੱਟੀ ਖੇਤਰਾਂ ਵਿਚ ਬਾਰਿਸ਼ ਹੋਣ ਦੀ ਸੰਭਾਵਨਾ
ਨਵੀਂ ਦਿੱਲੀ: ਭਾਰਤੀ ਮੌਸਮ ਵਿਗਿਆਨ ਵਿਭਾਗ ਦੇ ਚੱਕਰਵਾਤ ਚੇਤਾਵਨੀ ਵਿਭਾਗ ਨੇ ਕਿਹਾ ਹੈ ਕਿ 9 ਅਕਤੂਬਰ ਨੂੰ ਉੱਤਰੀ ਅੰਡੇਮਾਨ ਸਾਗਰ ਵਿਚ ਇਕ ਨਵਾਂ ਘੱਟ ਦਬਾਅ ਦਾ ਖੇਤਰ ਬਣਨ ਦਾ ਅਨੁਮਾਨ ਹੈ। ਵਿਭਾਗ ਅਨੁਸਾਰ ਇਹ ਆਂਧਰਾ ਪ੍ਰਦੇਸ਼ ਅਤੇ ਓਡੀਸ਼ਾ ਤੱਟ ਵੱਲ ਵਧ ਰਿਹਾ ਹੈ।
Heavy Rain
ਘੱਟ ਦਬਾਅ ਦਾ ਖੇਤਰ ਬਣਨ ਕਾਰਨ 2 ਦਿਨ ਬਾਅਦ 11 ਤੋਂ 13 ਅਕਤੂਬਰ ਤੱਕ ਆਂਧਰਾ ਪ੍ਰਦੇਸ਼ ਅਤੇ ਓਡੀਸ਼ਾ ਦੇ ਤੱਟੀ ਖੇਤਰਾਂ ਵਿਚ ਬਾਰਿਸ਼ ਹੋਣ ਦੀ ਸੰਭਾਵਨਾ ਹੈ। ਮੌਸਮ ਵਿਭਾਗ ਵੱਲੋਂ ਜਾਰੀ ਕੀਤੀ ਇਕ ਰਿਪੋਰਟ ਅਨੁਸਾਰ ਆਉਣ ਵਾਲੇ 24 ਘੰਟਿਆਂ ਵਿਚ ਇਸ ਦਾ ਅਸਰ ਦਿਖਣਾ ਸ਼ੁਰੂ ਹੋ ਜਾਵੇਗਾ।
Heavy Rain
ਮੌਸਮੀ ਅਨੁਮਾਨਾਂ ਮੁਤਾਬਕ 9 ਤੋਂ 11 ਅਕਤੂਬਰ ਦੌਰਾਨ ਉੱਤਰ ਭਾਰਤ ਦੇ ਕੁਝ ਸੂਬਿਆਂ ਵਿਚ ਬਾਰਿਸ਼ ਹੋ ਸਕਦੀ ਹੈ। ਇਸ ਦੌਰਾਨ ਤੇਲੰਗਾਨਾ ਵਿਚ ਭਾਰੀ ਬਾਰਿਸ਼ ਦੇਖਣ ਨੂੰ ਮਿਲ ਸਕਦੀ ਹੈ। ਇਸ ਤੋਂ ਬਾਅਦ ਬਾਰਿਸ਼ ਦੱਖਣੀ ਭਾਰਤ ਦਾ ਰੁਖ ਕਰੇਗੀ, ਜਿੱਥੇ ਇਕ ਨਵਾਂ ਚੱਕਰਵਾਤ ਬੰਗਾਲ ਦੀ ਖਾੜੀ ਵਿਚ ਵਿਕਸਿਤ ਹੋ ਰਿਹਾ ਹੈ।
Weather report
ਰਿਪੋਰਟ ਵਿਚ ਇਹ ਵੀ ਕਿਹਾ ਗਿਆ ਹੈ ਕਿ 9 ਅਤੇ 10 ਅਕਤੂਬਰ ਨੂੰ ਬੰਗਾਲ ਦੀ ਦੱਖਣੀ-ਪੂਰਬੀ ਖਾੜੀ ਵਿਚ ਪੂਰਬੀ ਅੰਡੇਮਾਨ ਸਾਗਰ ਅਤੇ ਉਸ ਦੇ ਨਾਲ ਲੱਗਦੇ ਉੱਤਰ ਅੰਡੇਮਾਨ ਸਾਗਰ 'ਤੇ ਸਮੁੰਦਰੀ ਹਾਲਾਤ ਸੰਵੇਦਨਸ਼ੀਲ ਹੋ ਸਕਦੇ ਹਨ।
Weather report
ਇਸ ਦੇ ਨਾਲ ਹੀ 10 ਅਤੇ 11 ਅਕਤੂਬਰ ਨੂੰ ਪੱਛਮੀ ਬੰਗਾਲ ਦੀ ਖਾੜੀ ਦੇ ਨਾਲ ਆਂਧਰਾ ਪ੍ਰਦੇਸ਼ ਅਤੇ ਓਡੀਸ਼ਾ ਦੇ ਤੱਟ 'ਤੇ ਵੀ ਇਸ ਦਬਾਅ ਦਾ ਪ੍ਰਭਾਵ ਪੈ ਸਕਦਾ ਹੈ। ਮੌਸਮ ਵਿਭਾਗ ਵੱਲੋਂ ਮਛਿਆਰਿਆਂ ਨੂੰ ਵੀ ਹਦਾਇਤ ਦਿੱਤੀ ਗਈ ਹੈ ਕਿ ਉਹ 11 ਅਕਤੂਬਰ ਨੂੰ ਸੁਮੰਦਰ ਵੱਲ ਨਾ ਜਾਣ।
Heavy rain
ਦੱਸ ਦਈਏ ਕਿ ਅਕਸਰ ਹਰ ਅਕਤੂਬਰ ਦੇ ਮਹੀਨੇ ਵਿਚ ਬੰਗਾਲ ਦੀ ਖਾੜੀ ਵਿਚ ਚੱਕਰਵਾਤ ਆਉਂਦਾ ਹੈ। ਸਾਲ 2013 ਅਤੇ 2014 ਦੇ ਅਕਤੂਬਰ ਵਿਚ 'ਫੈਲਿਨ' ਅਤੇ 'ਹੁਦਹੁਦ' ਤੂਫਾਨ ਆਏ ਸਨ, ਜਿਨ੍ਹਾਂ ਨੇ ਓਡੀਸ਼ਾ ਅਤੇ ਆਂਧਰਾ ਪ੍ਰਦੇਸ਼ ਦੇ ਤੱਟਾਂ 'ਤੇ ਦਸਤਕ ਦਿੱਤੀ ਸੀ।
