11 ਵਿਆਹ ਕਰਨ ਦਾ ਮਕਸਦ ਸੀ ਸਿਰਫ ਪੈਸਾ ਕਮਾਉਣਾ (Breaking)

ਨਵੀਂ ਦਿੱਲੀ : ਪੁਲਿਸ ਭਾਵੇਂ ਕਿੰਨੀ ਹੀ ਤੇਜ਼ ਹੋਈ ਜਾਵੇ, ਠੱਗੀ ਮਾਰਨ ਵਾਲੇ ਵੀ ਓਨੇ ਹੀ ਤੇਜ਼ ਹੋਈ ਜਾਂਦੇ ਹਨ। ਠੱਗਾਂ ਨੇ ਠੱਗੀ ਮਾਰਨ ਦੇ ਨਵੇਂ ਤੋਂ ਨਵੇਂ ਤਰੀਕੇ ਲੱਭ ਲਏ ਹਨ। ਤੁਸੀਂ ‘ਡਾਲੀ ਕੀ ਡੋਲੀ’ ਫਿਲਮ ਤਾਂ ਦੇਖੀ ਹੀ ਹੋਵੇਗੀ, ਜਿਸ ਵਿਚ ਸੋਨਮ ਕਪੂਰ ਵੱਖ-ਵੱਖ ਲੋਕਾਂ ਨਾਲ ਵਿਆਹ ਕਰਕੇ ਲੋਕਾਂ ਨੂੰ ਠੱਗਣ ਦਾ ਕੰਮ ਕਰਦੀ ਹੋਈ ਨਜ਼ਰ ਆਈ ਸੀ ਪਰ ਅੱਜ ਅਸਲ ਵਿਚ ਇੱਕ ਅਜਿਹੀ ਹੀ ਠੱਗ ਲਡ਼ਕੀ ਬਾਰੇ ਪਤਾ ਲੱਗਿਆ ਹੈ। ਜੋ ਫਿਲਮ ਵਾਂਗ ਹੀ ਲੋਕਾਂ ਨੂੰ ਵਿਆਹ ਕਰਕੇ ਠੱਗੀ ਮਾਰਦੀ ਸੀ। ਪੁਲਿਸ ਨੇ ਦਿੱਲੀ ਨਾਲ ਲਗਦੇ ਨੋਇਡਾ ਤੋਂ ਉਸ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।

ਜਾਣਕਾਰੀ ਅਨੁਸਾਰ ਗ੍ਰਿਫ਼ਤਾਰ ਕੀਤੀ ਗਈ ਲਡ਼ਕੀ ਵਿਆਹ ਕਰਕੇ ਲੋਕਾਂ ਨਾਲ ਠੱਗੀ ਮਾਰਨ ਦਾ ਕੰਮ ਕਰਦੀ ਸੀ। ਇਸ ਲਡ਼ਕੀ ਨੇ ਇੱਕ ਜਾਂ ਦੋ ਨਹੀਂ ਬਲਕਿ 11 ਵਿਆਹ ਕੀਤੇ, ਜਿਸ ਵਿਚੋਂ ਜ਼ਿਆਦਾਤਰ ਅਪਾਹਿਜ ਅਤੇ ਤਲਾਕਸ਼ੁਦਾ ਲਡ਼ਕਿਆਂ ਨਾਲ ਵਿਆਹ ਕੀਤਾ ਸੀ ਪਰ ਵਿਆਹ ਦੇ ਕੁਝ ਦਿਨ ਬਾਅਦ ਹੀ ਇਹ ਲਡ਼ਕੀ ਘਰ ਦੇ ਸਾਹਰੇ ਗਹਿਣੇ ਅਤੇ ਰੁਪਏ ਲੈ ਕੇ ਫ਼ਰਾਰ ਹੋ ਜਾਂਦੀ ਸੀ।

ਜ਼ਿਆਦਾ ਤੋਂ ਜ਼ਿਆਦਾ ਪੈਸੇ ਅਤੇ ਗਹਿਣੇ ਇਕੱਠੇ ਕਰਕੇ ਉਸ ਦੀ ਇੱਛਾ ਅਮੀਰ ਬਣਨ ਦੀ ਸੀ।ਗ੍ਰਿਫ਼ਤਾਰ ਕੀਤੀ ਗਈ ਇਹ ਲਡ਼ਕੀ ਦਾ ਕੱਦ ਪੰਜ ਫੁੱਟ ਦੋ ਇੰਚ ਹੈ ਅਤੇ ਐੱਮਬੀਏ ਪਾਸ ਹੈ। ਅਜਿਹਾ ਨਹੀਂ ਹੈ ਕਿ ਇਹ ਲਡ਼ਕੀ ਕੋਈ ਸੁੰਦਰ ਨਹੀਂ ਬਲਕਿ ਇਹ ਲਡ਼ਕੀ ਕਾਫ਼ੀ ਸੁੰਦਰ ਵੀ ਹੈ ਅਤੇ ਇਸ ਦਾ ਰੰਗ ਗੋਰਾ ਹੈ ਅਤੇ ਇਹ ਪਡ਼੍ਹੇ ਲਿਖੇ ਪਰਿਵਾਰ ਵਿਚੋਂ ਹੈ। ਕਿਸੇ ਅਪਾਹਿਜ ਅਤੇ ਤਲਾਕਸ਼ੁਦਾ ਲਡ਼ਕੇ ਨੂੰ ਜੇਕਰ ਅਜਿਹੀ ਲਡ਼ਕੀ ਮਿਲ ਜਾਵੇ ਤਾਂ ਉਸ ਦੀ ਤਾਂ ਲਾਟਰੀ ਹੀ ਲੱਗ ਜਾਵੇ ਅਜਿਹਾ ਸਮਝ ਕੇ ਲਡ਼ਕੇ ਉਸ ਨਾਲ ਵਿਆਹ ਕਰਵਾ ਲੈਂਦੇ ਸਨ ਪਰ ਬਾਅਦ ਵਿਚ ਪਛਤਾਉਂਦੇ ਸਨ। ਇਸ ਲਡ਼ਕੀ ਦਾ ਨਾਮ ਮੇਘਾ ਭਾਰਗਵ ਹੈ ਅਤੇ ਇਸ ਦੀ ਉਮਰ 26 ਸਾਲ ਹੈ। ਪੁਲਿਸ ਅਨੁਸਾਰ 11 ਵਿਆਹ ਕਰਨ ਦਾ ਉਸ ਦਾ ਮਕਸਦ ਪੈਸਾ ਕਮਾਉਣਾ ਸੀ। ਵਿਆਹ ਤੋਂ ਬਾਅਦ ਉਹ ਲਾਡ਼ੇ ਅਤੇ ਉਸ ਦੇ ਘਰ ਵਾਲਿਆਂ ਨੂੰ ਨੀਂਦ ਦੀਆਂ ਗੋਲੀਆਂ ਦੇ ਕੇ ਪੈਸੇ ਅਤੇ ਗਹਿਣੇ ਲੈ ਕੇ ਫ਼ਰਾਰ ਹੋ ਜਾਂਦੀ ਸੀ। ਇਹੀ ਨਹੀਂ ਉਸ ਦੀ ਵੱਡੀ ਭੈਣ ਅਤੇ ਜੀਜਾ ਉਸ ਦੇ ਇਸ ਕੰਮ ਵਿਚ ਉਸ ਦੀ ਮਦਦ ਕਰਦੇ ਸਨ।

ਇਹ ਲਡ਼ਕੀ ਅਲੱਗ-ਅਲੱਗ ਰਜਾਂ ਵਿਚ 11 ਲਾਡ਼ਿਆਂ ਨਾਲ ਵਿਆਹ ਕਰਕੇ ਉਨ੍ਹਾਂ ਨੂੰ ਆਪਣਾ ਸ਼ਿਕਾਰ ਬਣਾ ਚੁੱਕੀ ਹੈ।ਨੋਇਡਾ ਪੁਲਿਸ ਨੇ ਦੱਸਿਆ ਕਿ ਮੁਲਜ਼ਮ ਮੇਘਾ ਭਾਰਗਵ ਮੂਲ ਰੂਪ ਨਾਲ ਗਵਾਲੀਅਰ ਦੀ ਰਹਿਣ ਵਾਲੀ ਹੈ ਅਤੇ ਠੱਗੀ ਦੇ ਮਾਮਲੇ ਵਿਚ ਕੇਰਲ ਪੁਲਿਸ ਨੂੰ ਵੀ ਇਸ ਲਡ਼ਕੀ ਦੀ ਭਾਲ ਹੈ। ਮੇਘਾ ਨੇ ਹਾਲ ਹੀ ਵਿਚ ਕੇਰਲ ਸੂਬੇ ਦੇ ਕੋਚੀ ਵਿਚ ਲਾਰੇਲ ਨਾਂਅ ਦੇ ਇੱਕ ਲਡ਼ਕੇ ਨਾਲ ਵਿਆਹ ਕੀਤਾ ਸੀ ਅਤੇ ਉਸ ਤੋਂ ਬਾਅਦ ਉਸ ਦੇ ਘਰ ਤੋਂ 15 ਲੱਖ ਰੁਪਏ ਅਤੇ ਗਹਿਣੇ ਲੈ ਕੇ ਫ਼ਰਾਰ ਹੋ ਗਈ ਸੀ।

ਠੱਗੀ ਦਾ ਸ਼ਿਕਾਰ ਹੋਏ ਪਰਿਵਾਰ ਵਾਲਿਆਂ ਨੇ ਇਸ ਤੋਂ ਬਾਅਦ ਉਸ ਦੇ ਖਿ਼ਲਾਫ਼ ਪੁਲਿਸ ਕੋਲ ਐੱਫਆਈਆਰ ਦਰਜ ਕਰਵਾਈ ਸੀ, ਜਿਸ ਤੋਂ ਬਾਅਦ ਪੁਲਿਸ ਨੇ ਮਾਮਲੇ ਦੀ ਜਾਂਚ ਕੀਤੀ ਤਾਂ ਪਤਾ ਚੱਲਿਆ ਕਿ ਕੇਰਲ ਵਿਚ ਹੀ ਉਸ ਨੇ ਕਈ ਵਿਆਹ ਕੀਤੇ ਹੋਏ ਹਨ। ਇਸ ਤੋਂ ਇਲਾਵਾ ਮੇਘਾ ਨੇ ਮੁੰਬਈ, ਪੁਣੇ ਅਤੇ ਰਾਜਸਥਾਨ ‘ਚ ਵੀ 6 ਵਿਆਹ ਕਰਕੇ ਇਨ੍ਹਾਂ ਪਰਿਵਾਰਾਂ ਨੂੰ ਲੁੱਟਿਆ ਹੈ।